Forest of Hope Guest House and Camp Site yafunguye imiryango muri Pariki ya Gishwati-Mukura

Yanditswe na IGIHE
Kuya 1 Ukuboza 2020 saa 01:24
Yasuwe :
0 0

Inyubako ya Forest of Hope Guest House and Camp Site izajya icumbikira ba mukerarugendo basura Pariki ya Gishwati-Mukura yafunguye imiryango.

Forest of Hope Guest House and Camp Site yashyizweho na Forest of Hope Association (FHA) isanzwe ibungabunga Ishyamba rya Gishwati ifatanyije n’Urwego rw’Igihugu rw’Iterambere (RDB).

Ba mukerarugendo bazacumbikirwa mu nyubako yabugenewe ndetse no mu ihema ryubatswe mu buryo bugezweho mbere cyangwa nyuma yo gutambagizwa muri Pariki ya Gishwati-Mukura bitegereza ibyiza biyitatse.

Iyi nyubako ifite ibyumba bibiri bishobora kwakira abantu bane, bahabwa serivisi zose bakenera zirimo amafunguro atatu ku munsi, aherekejwe n’ikinyobwa kidasembuye. Ihema ryubatswe hafi ya Pariki ya Gishwati-Mukura ryo rishobora gukambikwamo nibura n’abantu umunani.

Ba mukerarugendo basura iyi pariki bazoroherwa no kubona ibimera gakondo n’ubwoko bw’inyamaswa zinyuranye ziganjemo inkende n’impundu (chimpanzee) n’inkima (golden monkey), inyoni n’izindi nyamaswa nto zinyuranye.

Mu rwego rwo gukomeza kubungabunga urusobe rw’ibinyabuzima ndetse n’ibidukikije, buri mukerarugendo uhasura azajya asabwa gutera igiti.

Umuhuzabikorwa wa FHA, Thierry Aimable Inzirayineza, yavuze ko biteguye kwakira ba mukerarugendo ba mbere muri Forest of Hope Guest House and Camp Site.

Yagize ati “Turi gukorana na Wilderness Safaris mu bijyanye no kubungabunga urusobe rw’ibinyabuzima no guteza imbere umuryango, twita ku gukurikirana inguge, gutanga uburezi ndetse tuzabisangira n’abashyitsi bacu.

“Forest of Hope Association yishimira umubano twubatse n’abafatanyabikorwa bacu muri sosiyete mu myaka ishize ndetse imyumvire ihuriweho ku gaciro ko kurinda no kubungabunga Gishwati yatumye tugera kuri iyi ntambwe yo kuyibyaza umusaruro mu buryo burimo no gukurura ba mukerarugendo.’’

Umuyobozi w’Ishami ry’Ubukerarugendo muri RDB, Belise Kariza, yashimangiye ko Forest of Hope Guest House and Camp Site ari inyongera ku bikorwa remezo byakirirwamo ba mukerarugendo, bituma bishimira serivisi zinoze bahabwa.

Yakomeje ati “Ndashimira Forest of Hope Association na Wilderness Safaris ku kongera imbaraga muri gahunda y’u Rwanda yo kuba igicumbi cya ba mukerarugendo giha agaciro, kikanarinda umutungo wacu kamere.’’

RDB iheruka gutangaza ko Pariki ya Gishwati-Mukura iherutse no gushyirwa mu murage w’Isi n’Ishami ry’Umuryango Mpuzamahanga ryita ku Burezi n’Umuco (UNESCO), igomba gutangira kwakira abakerarugendo mu Ukuboza 2020.

Iyi ntambwe ni irindi tafari ryiyongereye mu rugendo u Rwanda rufite rwo kongera amafaranga rukura mu bukerarugendo, ku buryo mu 2024, ruzaba rwinjiza miliyoni $800 ku mwaka avuye kuri miliyoni 438$ mu 2017.

Mu 2014 nibwo u Rwanda rwakiriye miliyoni 9,5$ agamije kurufasha gutunganya neza ishyamba rya Gishwati-Mukura, yavuye mu Kigo Mpuzamahanga cyita ku Bidukikije, kibinyujije muri Banki y’Isi.

Muri Gashyantare 2016 nibwo ishyamba cyimeza rya Gishwati - Mukura riherereye mu ruhererekane rw’Imisozi y’isunzu rya Congo-Nil, ryemejwe nka Pariki y’Igihugu ya kane, yitezweho gutanga umusanzu mu kwinjiza amadevize binyuze mu bukerarugendo n’izindi nyungu zituruka ku bidukikije.

Iyi pariki iherereye mu Turere twa Rutsiro na Ngororero mu Ntara y’i Burengerazuba bw’igihugu, ingana na hegitari 3 558, harimo icyanya cya Gishwati gifite ubuso bungana na hegitari 1 570, n’icya Mukura kingana na hegitari 1 988.

Ayo mashyamba azwimo ibimera gakondo n’ubwoko bw’inyamaswa zinyuranye ziganjemo inkende n’impundu n’inkima, amoko arenga 130 y’inyoni, harimo 15 aboneka muri iyi pariki gusa, n’izindi nyamaswa nto zinyuranye.

Ni pariki yabashije kubaho kubera uruhare rwa leta n’abaturage, kuko nyuma ya Jenoside yakorewe Abatutsi yari yakendereye, ituzwamo abaturage ndetse ibindi bikorwa byabo birushaho kuyangiza.

Mu 2009 nibwo yatangiye kubungabungwa no gusubiranywa, ngo yongere ibe igicumbi cy’urusobe rw’ibinyabuzima. Muri Mata 2019, RDB yagiranye amasezerano y’imyaka 25 n’Ikigo Imizi Eco-Tourism Development Ltd yo gutunganya no gucunga Pariki y’Igihugu ya Gishwati-Mukura, ku buryo ihinduka igice gikorerwamo ubukerarugendo.

Forest of Hope Guest House and Camp Site yafunguye imiryango muri Pariki ya Gishwati-Mukura
Ababishaka bashobora no kuzajya bacumbika mu mahema yubakanye ubuhanga yashinzwe muri Pariki ya Gishwati-Mukura
Inkende ziri mu nyamaswa ziboneka muri Pariki ya Gishwati-Mukura
Pariki ya Gishwati-Mukura iherereye mu Turere twa Rutsiro na Ngororero mu Burengerazuba bw’igihugu, ingana na hegitari 3558

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .