Nibyo koko Beijing ni umujyi mwiza, uteye imbere, urangwa n’isuku n’ikoranabuhanga, ariko niba ukiri mu myaka y’urubyiruko ubuzima bwaho bushobora kutakuryohera.

Nk’urubyiruko twese turabizi ko dukunda kuba ahantu ushobora kuryoshya, kuri Beijing siko bimeze kuko uyu Mujyi wiganjemo cyane ibikorwa bya politike, ambasade n’ibindi bigo bya leta. Mbese usanga kuhaba ari nk’uko waba muri Kiyovu yagutse. Icyakora mu mpera z’icyumweru uyu mujyi upfa gushyuhamo gake.

Ukwezi namaze Beijing ntahava kwagiye kurangira numva nta nkuru! Ibyishimo byasaze umutima wanjye ubwo namenyaga ko ngiye kuva muri uyu Murwa Mukuru gato nkajya mu wundi mujyi witwa Chengdu.

Ntababeshye ni ubwa mbere nari numvise uyu mujyi, kimwe nanjye wasanga nawe wari uzi ko Beijing, Shanghai, Hong Kong na Guangzhou ariyo mijyi u Bushinwa bufite.

U Bushinwa bufite imijyi yose hamwe irenga 700, bitandukanye na henshi muri Afurika usanga abaturage batuye muri iyi mijyi baba bafite ibikorwaremezo byose bakeneye ndetse na serivisi zose babasha kuzibona hafi aho ku buryo bitabasaba kujya mu Murwa Mukuru, Beijing.

Kubera ibi ntibizagutungure nuhura n’Umushinwa w’imyaka 40 akakubwira ko mu buzima bwe atarakandagira Beijing cyangwa ahaheruka ari muto ubwo yoherezwagayo kwiga kaminuza.

Iyi nkuru ikingeraho ikintu cya mbere nakoze ni ugushaka amakuru arambuye kuri uyu mujyi, icyo nahereyo ni ikijyanye n’ubushyuhe! Uti kubera iki?

Beijing yari imaze igihe ishyushye ku kigero cya dogere 40, ureke bimwe i Kigali bigera muri dogere 29 tugatabaza. Numvaga Chengdu ishobora kuba ubuhungiro bw’igihe gito ariko nasanze ari uguhungira ubwayi mu kigunda kuko uyu mujyi nawo ushyuha cyane mu gihe cy’impeshyi.

Chengdu ni umujyi uherereye muri Sichuan ndetse ukaba Umurwa Mukuru w’iyi Ntara iri mu majyepfo ashyira uburengerazuba bw’u Bushinwa.

Kuva Beijing ujya Chengdu igihe wakoresheje indege bigutwara 3h15, wakoresha gari ya moshi yihuta cyane bikagufata amasaha umunani.

Amateka y’uyu mujyi ahera mu kinyejana cya kane mbere y’ivuka rya Yezu kuko muri icyo gihe wari Umurwa mukuru w’ubwami bwa Shu. Kimwe n’indi mijyi myinshi yo mu Bushinwa uyu nawo ugizwe n’imiturirwa miremire.

Uyu mujyi utuwe n’abarenga miliyoni 20 uri ku buso bwa 14,378 km². ni umwe mu ikunzwe mu Bushinwa bitewe n’imibereho yaho itandukanye cyane n’iyo mu bindi bice byo mu Bushinwa.

Tukigera Chengdu mu byo twakirijwe harimo amazi akonje cyane n’akantu ko kwihungiza. Ibi birakwereka uko uyu mujyi wari ushyushye bikabije. Kuri njye byari igitangaza kubona abaturage bagendana twa ‘ventilateurs’ duto bihungiza.

Iyo ugikandagira muri uyu mujyi, ugendeye ku bikorwaremezo ntushobora kuwutandukanya na Beijing, ufite imiturirwa miremire cyane, imihanda igezweho yaba iy’imodoka na gari ya moshi ndetse n’ibibuga by’indege bibiri.

Abaturage ba Chengdu bakunda ubuzima bworoshye, ku manywa uzasanga abenshi bicaye ahantu binywera icyayi cy’u Bushinwa cyane ko ari naho gifite inkomoko.

Ku mugoroba abenshi bo baba batembera mu nzira nto zahariwe abanyamaguru zirimo n’izwi nka ‘Kuanzhai alley’. Imiterere y’iyi nzira ni nk’uko wafata ‘Car free zone’ yo mu mujyi wa Kigali rwagati ukayigira ndende cyane ubundi ukayikikiza ibikorwa by’ubucuruzi bitandukanye nk’amaduka, restaurants n’ibindi.

Aka gace ni nako kabarizwamo restaurants Michelle Obama yasuye mu 2014 ndetse akagaragaza ko nawe yatunguwe n’ubwiza bwa Chengdu.

Kimwe n’abandi baturage b’u Bushinwa, aba Chengdu nabo baratuje, usanga ari abantu bavuga make, bubaha kandi bakamenya kwakira neza ababagana.

Benshi mu Banyafurika basura Chengdu birangira bakunze imirire yaho kuko irangwa n’ibiryo birimo urusenda rwinshi ndetse n’agasembuye ko kubimanuza.

Chengdu ni umujyi mwiza kandi kuri ba mukerarugendo kuko ariwo urimo ikigo cyahariwe gutuzwamo Pandas, iri munyamaswa ziboneka mu Bushinwa gusa.

Uyu mujyi niwo urimo kandi umushinga wo kuhira uzwi nka ‘Dujiangyan Irrigation System’ ufatwa nk’aho ariwo ukuze mu Bushinwa kuko wubatswe mu 256 mbere y’ivuka rya Yesu.

Chengdu Shuangliu International Airport ni kimwe mu bibuga by’indege bikoreshwa cyane n’abasura uyu mujyi

Kubera umubare munini w’abakoresha iki kibuga cy’indege byabaye ngombwa ko hubakwa Ikindi, Chengdu iba umujyi wa gatatu mu Bushinwa ugize ikibuga cy’indege kirenze kimwe

Iyi miturirwa y'impanga iherereye mu gace ka Tianfu iri mu birango bya Chengdu

Ikiyaga cya 'Xinglong' kiri mu bikurura umubare munini w'abasura Chengdu

'Chengdu Tianfu Bio-town' ni igicumbi cy'imishinga y'ikoranabuhanga muri uyu mujyi

Ukinjira muri Chengdu utangira kubona ibibumbano by'inyamaswa ya Panda isigaye hake ku Isi

Uyu mujyi ubarizwamo amashuri makuru na kaminuza bitandukanye ndetse n'ibibuga abanyeshuri babyo bakiniraho

Iyi muturirwa iri mu byo ubona ukinjira mu gace ka Tianfu

Chengdu iri mu mijyi ifite isuku ku Isi, aho uba uri kwinjira mu mujyi rwagati

Kurengera ibidukikije byarimakajwe kugeza n'aho inkingi z'imihanda ziterwaho ibyatsi birandaranda

Muri Chengdu uzasanga abenshi bigendera ku magara, afite imikorere nk'iya Guraride mu Rwanda

Inzu abagenzi bategererezamo imodoka muri Chengdu ni uko ziteye

Uyu muhanda uzwi nka Huaxing, iyo nzu nibyo biro by'iposita bishaje cyane muri Chengdu

Shake Shack ikomoka i New York ifite restaurant ikomeye muri Chengdu

Uyu mushinga mugari uherereye mu gace ka Longquan aho ugamije kubaka umujyi muri parike

Iyo Umujyi wa Chengdu uwurebeye ahitaruye ni uko ugaragara, uwo munara muremure uzwi ku izina rya 'West Pearl'

Zebra-crossing zo muri uyu mujyi nazo zikoze mu buryo bwihariye

Muri uyu mujyi hari uburyo bwose bushoboka bw'ingendo, iyi ni imwe muri bisi zifite ubushobozi bwo gutwara abantu hejuru no hasi

Imihanda migari inyura hejuru y’indi ni imwe mu yoroshya urujya n’uruza muri uyu mujyi utuwe n’abagera kuri miliyoni 20

Iterambere ry'Umujyi wa Chengdu rijyanishwa no kubungabunga amateka y'uyu mujyi cyane cyane inyubako za kera

West Pearl Tower ni umwe mu minara izwi cyane muri Chengdu

Umujyi wa Chengdu uwurebeye hejuru ubona ko ugizwe n’inyubako za kera zirimo na ‘Chengdu Sports Center Stadium’ n’izizamuwe mu myaka ya vuba

Uyu mugezi uzwi ku izina rya ‘Jin’ ni umwe mu minini iri mu Ntara ya Sichuan

Nubwo Chengdu ari umujyi urimo imiturirwa miremire n’inyubako gakondo zifite igice zahariwe ndetse zisurwa cyane n’abashaka kumenya amateka y’u Bushinwa

Iyo nyubako iri hakurya ikoreramo isomero n’inzu icuruza ibitabo izwi nka ‘CITIC Bookstore’ ifite umwihariko w’uko ushobora gusoma igitabo wibereye munsi y’amazi y’iki kiyaga

Ubukerarugendo nabwo bwarimakajwe muri Chengdu

Ikiyaga cya 'Xinglong' ni kimwe mu byongera ubwiza bw’uyu mujyi, iyo ukiriho uba witegeye imiturirwa miremire iri mu mujyi rwagati

Uyu mujyi ubarizwamo ibiyaga bitandukanye

Iyo utembera hirya no hino muri Chengdu, usanga abantu benshi biganjemo abato bafata amafoto y’urwibutso

Igihe hari kuba ibikorwa by’imikino, usanga hateguwe inzu zicururizwamo ibintu bitandukanye bikomoka mu gihugu runaka, aha ushobora kuhasanga ibyo muri Australia

Chengdu ni umwe mu mijyi yo mu Bushinwa yimakaje politike yo kurengera ibidukikije, aho ugiye hose usanga imihanda ikikijwe n’ibiti

Inyamaswa ya Panda ifite amateka yihariye muri Chengdu aho ugiye hose uhasanga ibipupe cyangwa ibibumbano byayo

Ukigera muri Chengdu uhita ubona ko ari umujyi ufite amateka yihariye agendanye na ‘Panda’ uyu mukobwa yifotozanyaga igipupe cy’iyi nyamaswa

Uyu Mujyi wa Chengdu ni umwe mu yakira ibikorwa bitandukanye mu Bushinwa cyane cyane ibijyanye n’imikino

Kimwe n’ahandi henshi mu Bushinwa, mu Mujyi wa Shengdu naho hashyizwe amagare ashobora gukoreshwa n’ababishaka bakishyura amafaranga make cyane

Chengdu ibarizwamo amaduka atandukanye y’inganda zikomeye ku Isi, iribanza rikoreramo Adidas rigakurikirwa n’irikoreramo VolksWagen, hagaheruka irikoreramo Li-Ning iri mu nganda zikora inkweto n’imyenda zigezweho mu Bushinwa

Mu Bushinwa, Chengdu izwi nk'Umujyi w'abakundana, iyo ugenda ku nkengero z'ibiyaga bitandukanye uhahurira n'inkumi n'abasore bato basohokanye

Kirazira kuva muri Chengdu udasha ifoto y'urwibutso

Mu mpera z'icyumweru abatuye Chengdu bajya ku nkombe z'imigezi iri muri uyu mujyi kuruhuka

Ku manywa usanga abatuye Chengdu bihahira ibintu bitandukanye

Muri Chengdu ibyari inzozi bihinduka impamo, iyi niyo ntero y’uyu mujyi

Ku bakunda agahiye cyane cyane imivinyu muri Chengdu kaboneka ku bwinshi, gusa biragora kuhabona izwi k urwego mpuzamahanga

Mu nkengero za 'Kuanzhai Alley' uhasanga restaurants nyinshi zigiye zifite umwihariko n'amafunguro atandukanye

Inyama z'inkoko ni zimwe mu zihendutse muri Chengdu, iz'inka zo zigondera umugabo zigasiba undi

Imirire yo muri Chengdu iba yiganjemo urusenda rwinshi

Kubera ubushyuhe bwinshi usanga mu mpera z’icyumweru, benshi basohokeye ku nkengero z’imigezi n’ibiyaga

Hamwe na hamwe mu nkengero z’imihanda yo muri Chengdu uhasanga abakobwa nk’aba bakora umuziki gakondo, baba bari gususurutsa abahisi n’abagenzi

Uyu mugabo afasha abakeneye imbuto zo kurya ako kanya, arazibahatira akazibaha zitunganyije

Inyinshi muri restaurants zo muri Chengdu usanga zikoresha intebe n’ameza bikoze mu buryo bwa gakondo hifashishijwe imigano

Muri Chengdu usangamo abo wagereranya n’abazunguzayi bagenda bacuruza imbuto ku ngorofani

Chengdu iri mu mijyi yo mu Bushinwa igendwa n'abanyamahanga benshi ku mwaka

Chengdu iri mu mijyi yo mu Bushinwa igendwa n'abanyamahanga benshi ku mwaka

Aba banyamakuru bo mu Burasirazuba bw'u Burayi bishimiye kubona ibyiza biri mu Mujyi wa Chengdu

Ntuzatungurwe nujya mu Bushinwa ugasanga ibyo gushyira isukari mu cyayi babyumva nk’inkuru

Abaturage ba Chengdu bazwiho kugira urugwiro, aha bakiraga itsinda ry'abanyamakuru bavuye hirya no hino ku Isi bari babasuye

Bifatwa nk’amahano kuba wasura Chengdu ugataha udasuye ikigo gikora ubushakashatsi kuri Panda ari naho zicumbikiwe

Panda ni imwe mu nyamaswa zitangaje ku munsi imara amasaha 12 isinziriye andi 12 ikayamara iri kurya

Inyamaswa za panda zifatwa nk'ikirango cy'Umujyi wa Chengdu ari nayo mpamvu washyize imbaraga nyinshi mu kuzibungabunga

Benshi mu basura Chengdu bashimishwa no kubona bwa mbere n'amaso yabo inyamaswa ya panda

Muri Chengdu restaurants za McDonald's ziri mu zikundwa na benshi cyane cyane ab'urubyiruko

Muri Chengdu ijoro ntirishyira iherezo ku bikorwa by'imyidagaduro n'ubukerarugendo

Hari aho ugera ugasanga izina ry'uyu mujyi ryanditswe ku nkuta z'inzu

Chengdu ibarizwamo inyubako nyinshi gakondo z’Abashinwa zizwi nka ‘Pagoda’

Mu masaha y'ijoro 'West Pearl Tower' iba igaragara byoroshye aho waba uri hose muri Chengdu

Ubwiza bwa Chengdu burushaho kugaragara mu masaha y'ijoro

Iyi miturirwa y’impanga yo muri Chengdu mu masaha y’ijoro ni uko iba yaka