Berlin: U Rwanda rwahawe igihembo kiruta ibindi mu imurika ry’Ubukerarugendo

Yanditswe na

Jean Claude Ntawitonda

Kuya 8 Werurwe 2015 saa 10:29
Yasuwe :
0 0

U Rwanda rwongeye kwegukana igihembo cy’Ubukerarugendo muri Afurika mu imurikagurisha mpuzamahanga ribera i Berlin mu Budage (ITB/Internationale Tourismus Börse), runahabwa igihembo kiruta ibindi mu bihugu byitwaye neza muri iri murikagurisha rihuriramo abamurika ibikorwa by’ubukerarugendo baturutse mu ibihugu bitandukanye.

Amakuru Ambasade y’u Rwanda mu Budage yacishije ku rukuta rwayo rwa Twitter avuga ko u Rwanda rwongeye kuba urwa mbere ku Mugabane wa Afurika (Best Exhibitor Award in the Category "Africa") ku nshuro ya 14 rwitabiriye kumurika ibikorwa, ndetse runagororerwa ku mwanya wa mbere muri rusange (Best of the Best Award).

U Rwanda rwongeye guseruka neza muri iri murikagurisha ryahereye tariki 4 kugeza kuri iki Cyumweru tariki 8 Werurwe, nyuma yo kwitwara neza mu mwaka wa 2007, 2008, 2009, 2010, na 2014 uretse ko muri iyi myaka yose rutahabwaga ibihembo by’ubukerarugendo gusa.

Abanyarwanda bashyikirijwe igihembo cyo kwitwara neza kuruusha ibindi bihugu byo muri Afurika

Mu mwaka ushize u Rwanda rwahembewe uyu mwanya kimwe n’ibihugu bya Afurika y’Uburasirazuba nka Kenya, Uganda n’u Burundi, byahanganye mu bamurikaga ibikorwa babarirwa muri 200 bahagarariye ibihugu byabo.

Nubwo u Rwanda rwaje ku mwanya wa mbere mu 2014, ibi bihugu uko ari bitatu byagaragaye mu bihugu bitanu byahembewe kugira imurikagurisha ry’umwimerere kandi rigezweho.

Icyo gihe igihugu cyakurikiye u Rwanda ni u Burundi, Kenya iza ku mwanya wa gatatu na ho Uganda yo iza ku mwanya wa gatanu mu bindi bihugu bigize Umugabane wa Afurika.

Nyuma yo gushyikirizwa igihembo igihembo kiruta ibindi muri iri murika

Umwimerere w’ibyo ibi bihugu byamuritse muri iri murikagurisha wagaragajwe n’uko byari bifite ibikoresho gakondo, ababyinnyi gakondo n’utundi tuntu dukurura utasanga ahandi hatari muri Afurika y’Uburasirazuba.

Mu muhango wo gutangaza ibihugu byahize ibindi wabaye ku wa 9 Werurwe 2014, Kenya, Rwanda na Uganda byari bifite ibimurikwa bigera ku 11,000 byatoranyijwe hagendewe ku ngingo zitandukanye: ibigatika, ubwiza, udushya, uburambe, imitako n’ibindi.

Icyo gihe RDB yasobanuye impamvu zitandukanye zateye u Rwanda kuza ku mwanya wa mbere kuko akenshi byaturutse ku buryo bakiraga abakiriya mu imurikagurisha, byiyongereyeho imbyino gakondo.

Mu 2009 u Rwanda rwaje mu bihugu birindwi byahembewe imurikagurisha ku bijyanye n’isoko ry’ubukerarugendo (World Travel Market/WTM) mu birori byabereye i London mu Bwongereza.

Ibi bijyana n’iterambere ry’ubukerarugendo bw’u Rwanda mu ruhando muzamahanga, aho bivugwa ko ba mukerarugendo basura u Rwanda bikubye inshuro zisaga 40 mu myaka 10 ishize.

Imibare ya hafi yerekana ko mu mwaka wa 2013 ubukerarugendo bwakuruye abanyamahanga basaga miliyoni n’ibihumbi 137, basize amadevize miliyoni 293.6 z’amadolari ya Amerika; ayinjijwe yiyongereyeho 4% by’ayabonetse mu 2012.

Ba mukerarugendo basaga miliyoni imwe basuye u Rwanda mu mwaka wa 2014, na bo bavugwaho kuba barazamuye umusaruro ukomoka ku bukerarugendo ugera kuri miliyoni 303 z’amadolari ya Amerika (asaga miliyari 212 z’amafaranga y’u Rwanda).

Itorero ry'igihugu (Urukerereza) nyuma y'ibihembo bacinye akadiho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza