Radisson igiye kunguka hoteli 11 nshya muri Afurika

Yanditswe na Evariste Nsengimana
Kuya 25 Nzeri 2019 saa 01:04
Yasuwe :
0 0

Radisson Hotel Group, ibarizwamo Radisson Blu and Convention Centre na Park Inn mu Rwanda, ikomeje kwagura ibikorwa byayo ku mugabane wa Afurika aho mu mezi icyenda ya mbere ya 2019 yashyize umukono ku masezerano yo kubaka hoteli 11 nshya kuri uwo mugabane.

Ibi bizafasha iki kigo kimaze kubaka izina muri Afurika kugira hoteli 100 zifite ibyumba birenga ibihumbi 17 mu bihugu 32 byo kuri uwo mugabane no kugera ku ntego cyihaye yo kugira izisaga 130 zifite ibyumba ibihumbi 23 bitarenze mu 2022.

Visi Perezida akaba n’umuyobozi ushinzwe iterambere rya Radisson Hotel Group muri Afurika yo munsi y’Ubutayu bwa Sahara, Andrew McLachlan, yavuze ko uyu ari umwaka wo kwagura ibikorwa byayo kuri uwo mugabane.

Ati “Uyu mwaka twasinye amasezerano yo kubaka hoteli muri buri minsi 25 byose bijyanye n’intego z’ingamba z’iterambere dufite zirimo gutangiza ubwoko bushya no kwagurira ibikorwa mu mijyi mishya no kugira hoteli nyinshi mu mijyi imwe.”

McLachlan yavuze ko bahanze amaso imijyi 23 muri 60 ikomeye muri Afurika kandi ko mu myaka 19 bamaze bakorera muri Afurika ibikorwa byivugira, bakanaterwa ishema no kubona ibendera rya Radisson Blu nka hoteli itekanye.

Visi Perezida wa Radisson Group muri Afurika yo hagati n’Iburasirazuba, Tim Cordon, yavuze ko icyo kigo cyaciye agahigo mu 2018 aho ubukungu bwacyo bwazamutse ku masoko gikoreraho yose.

Ati “Uyu mwaka twakomeje gutera intambwe ishimishije aho umusaruro w’ikigo wazamutseho 14%, umusaruro ukomoka ku nama twakiriye wazamutseho 30%, twabonye ibihembo birenga 50 kandi 90% bya hoteli zacu zahawe icyemezo gihabwa izitekanye.”

Iki kigo cyahawe igihembo cya hoteli itekanye kandi iyobowe neza nyuma y’iminsi micye gusa Radisson Blu Hotel & Conference Center Niamey ifunguwe.
Cardon avuga ko icyo kigo kizakomeza gushora imari muri Afurika no kongera inkunga kuri hoteli zacyo n’abaziyobora.

McLachlan yavuze ko intego z’imyaka itanu Radisson Group yihaye harimo gukomeza kwagurira ibikorwa mu mijyi yo muri Afurika yo hagati irimo Addis Ababa, Nairobi na Kampala.

Ati “Hari amahirwe menshi muri Ethiopia kuko hari abaturage benshi, ubwikorezi bwo mu kirere buroroshye kuko icyo gihugu gifite ikigo gikomeye mu by’ingendo z’indege cya Ethiopian Airlines.”

McLachlan yasobanye ko banategura imishinga yo kubyaza umusaruro ubucuruzi bushingiye ku bukerarugendo muri Pariki zo mu Rwanda, Uganda na Kenya no gushora imari mu mishinga yo kubyaza umusaruro amahirwe agaragara ku byambu bya Mombasa, Zanzibar na Dar es Salaam.

Muri uyu mwaka Radisson Group yafunguye hoteli ebyiri muri Afurika zirimo nka Radisson Blu Hotel & Conference Center, Niamey, ikaba iya mbere ifite inyenyeri eshanu muri Niger na Radisson Blu Hotel, Algiers Hydra yo muri Algeria.

Iki kigo giteganya gufungura izindi ebyiri mbere y’uko uyu mwaka urangira mu bihugu birimo Kenya gisanzwe gifitemo eshatu, kikazahafungura iya gatatu yitwa Radisson Blu Hotel & Residence Nairobi Arboretum mu kwezi gutaha. Hari na Radisson Blu Hotel Casablanca giteganya gufungura muri Marroc mu Ugushyingo.

Uretse amasezerano yo kubaka hoteli esheshatu mu Misiri iki kigo cyasiye muri uyu mwaka, kiranateganya kubaka izindi mu bihugu bitandukanye zirimo nka Radisson RED Johannesburg Rosebank kizubaka muri Afurika y’Epfo.

Iyi hoteli izaba ibaye iya kabiri muri icyo gihugu biteganyijwe ko izafungurwa muri Gashyantare 2021, ikazaba ifite ibyumba 222.

Iki kigo kandi kigaragaza ko giteganya kubaka muri Algeria iyitwa Radisson Hotel La Baie d’Alger Algiers izaba igiye kuba iya kabiri kihagize. Biteganyijwe ko izafungurwa mu 2022 ifite ibyumba 184 bitangirwamo serivisi z’amahoteli.

Amakuru ubuyobozi bwa Radisson Group bwatangarije mu nama yigaga ku ishoramari ry’amahoteli muri Afurika(Africa Hotel Investment Forum) yabereye muri Ethiopia ku wa 23-24 Nzeri uyu mwaka, harimo ko iki kigo kinateganya gufungura inyubako eshatu muri Madagascar zirimo Radisson Blu Hotel Antananarivo Waterfront, Radisson Hotel Antananarivo Waterfront na Radisson Serviced Apartments Antananarivo City Center.

Radisson Hotel Group ni kimwe mu bigo by’amahoteli bikomeye ku Isi aho ifite hoteli zisaga 1400 zifite amazina akomeye nka Radisson Collection, Radisson Blu, Radisson , Radisson RED, Park Plaza , Park Inn na Country Inn & Suites .

Radisson Blu Kigali ni imwe muri hoteli zikomeye ziri mu Rwanda
Hashize imyaka itatu Radisson Blu itangiye gukorera mu Rwanda
Hotel Park Inn iherereye mu Kiyovu ni imwe muri hoteli zigezweho mu Rwanda
Park Inn ni izindi hoteli zubakwa na Radisson Hotel Group

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza