Ibibuga by’indege 20 byakoreshejwe n’abantu benshi mu 2018

Yanditswe na Evariste Nsengimana
Kuya 16 Werurwe 2019 saa 12:45
Yasuwe :
0 0

Ikibuga cy’indege cya Atlanta International Airport’ giherereye muri Leta ya Geogia muri Amerika, nicyo kiyoboye urutonde rw’ibindi 20 bihiga ibindi ku Isi mu kugira urujya n’uruza rw’abagenzi benshi mu 2018.

Atlanta International Airport umwaka ushize cyagize abagenzi barenga miliyoni 107, bituma kiba icya mbere kigendwa n’urujya n’uruza ry’abantu benshi mu kinyejana cya 21.

Raporo ya 2018 y’Inama Mpuzamahanga y’ibibuga by’indege igaragaza urujya n’uruza ku bibuga by’indege, iheruka gutangazwa ku wa 13 Werurwe, igaragaza ko abagenzi ku kibuga cy’indege cya Atlanta biyongereye ku kigero cya 3.3%.

Umwaka ushize Ku Isi abagenzi biyongereyeho miliyoni 8.8, bingana na 6% naho imizigo yiyongera ku kigero cya 3.2%.

Raporo igaragaza ko umubare w’abagenzi ku bibuga by’indege 20 bigendwa cyane wiyongereye ku kigero cya 4.7% mu 2018, aho byagize abagenzi basaga miliyari 1.5 ariko nta kibuga na kimwe cyo ku mugane wa Afurika kirimo.

Atlanta International Airport gikurikirwa n’icyo mu Bushinwa ‘Beijing Capital International’ cyagize abagenzi bagera kuri miliyoni 101 n’ubwiyongere bwa 4.5% naho icya Dubai muri Leta Zunze Ubumwe z’Abarabu kiza ku mwanya wa gatatu, cyakiriye abagenzi miliyoni 89 n’ubwiyongere bwa 1%.

Bimwe mu bituma ikibuga cya Atlanta gikomeza guca agahigo harimo kuba kiri ahantu heza hegeranye n’ibyambu byinjira muri Amerika ya ruguru, aho mu masaha abiri, abanya Amerika barenga 80% (basaga miliyoni 300) bakora ingendo mu ndege.

Gusa ikibuga cy’indege cya Chicago ‘O’Hare International’ kiza imbere ya Atlanta mu byagize ingendo nyinshi z’indege aho cyagize hafi ibihumbi 904, Atlanta ikagira ibihumbi 895 naho icya Los Angeles International kikagira ibihumbi 708.

Ikibuga cy’indege cya Hong Kong nicyo kiza imbere mu byatwaye imizigo myinshi ingana na Metero Cube zirenga miliyoni 5.1 kigakurikirwa na Memphis International Airport naho Shanghai Pudong International Airport ikaza ku mwanya wa gatatu.

Umuyobozi w’inama mpuzahanga y’ibibuga by’indege, Angela Gittens, yavuze ko bishimishije kubona umubare w’abagenzi wiyongera umunsi ku wundi n’igiciro cy’urugendo kikagabanuka hamwe na hamwe nk’uko CNN yabyanditse.

Uko ibibuga bikurikirana mu gukoreshwa n’abagenzi

1. Hartsfield-Jackson Atlanta International Airport (Georgia, USA) cyagize abagenzi miliyoni 107.4.
2. Beijing Capital International Airport (u Bushinwa), cyagize abagenzi miliyoni 101.
3. Dubai International Airport (Leta Zunze Ubumwe z’Abarabu) cyagize abagenzi miliyoni 89.1.

4. Los Angeles International Airport (California, USA) cyagize abagenzi miliyoni 87.5.

5. Tokyo’s Haneda Airport (u Buyapani) cyagize abagenzi miliyini 87.1.

6. Chicago’s O’Hare International Airport (Illinois, USA) cyagize abagenzi miliyoni 83.3.

7. London’s Heathrow Airport (u Bwongereza) cyagize abagenzi miliyoni 80.1

8. Hong Kong International Airport (u Bushinwa) cyagize abagenzi miliyoni 74.5.

9. Shanghai Pudong International Airport (u Bushinwa) cyagize abagenzi miliyoni 74

10. Paris Charles de Gaulle Airport (u Bufaransa) cyagize abagenzi miliyoni 72.2.

11. Amsterdam Airport Schiphol (u Buholande) cyagize abagenzi miliyoni 71.

12. New Delhi’s Indira Gandhi International Airport (u Buhinde) cyagize abagenzi miliyoni 69.9.

13. Guangzhou Baiyun International Airport (u Bushinwa) cyagize abagenzi miliyoni 69.8.

14. Frankfurt Airport (u Budege) cyagize abagenzi miliyoni 69.5.

15. Dallas/Fort Worth International Airport (Texas, USA) cyagize abagenzi miliyoni 69.1.

16. Seoul’s Incheon International Airport (Korea y’Epfo) cyagize abagenzi miliyoni 68.4

17. Istanbul’s Atatürk International Airport (Turikiya) cyagize abagenzi miliyoni 68.2,

18. Jakarta’s Soekarno-Hatta International Airport (Indonesia) cyagize abagenzi miliyoni 66.9

19. Singapore Changi Airport (Singapore) cyagize abagenzi miliyoni 65.6

20. Denver International Airport (Colorado, USA) cyagize abagenzi miliyoni 64.5


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza