00:00:00 IGIHE NETWORK KN KINYARWANDA EN ENGLISH FR FRANCAIS

Hashyizweho agace k’imyidagaduro katageramo imodoka mu mujyi wa Musanze

Yanditswe na Claude Bazatsinda
Kuya 8 June 2022 saa 07:07
Yasuwe :

Bamwe mu baturage bo mu Mujyi wa Musanze bavuga ko bishimiye kuba barashyiriweho agace katageramo imodoka kazwi nka Car Free Zone, kuko bigiye kujya bibafasha mu kwidagadura no kuruhuka nyuma yo gukika ku mirimo mu mpera z’icyumweru.

Guhera mu mpera z’icyumweru gishize, hafunzwe umuhanda uri mu Mujyi rwagati uva ku muhanda munini Musanze- Rubavu ukanyura ku isoko rinini rizwi nka Goico, ugaca kuri Hotel Urumuri werekeza kuri Gare ya Musanze.

Ubuyobozi bwatangaje ko ari igikorwa kigomba guhoraho mu mpera z’icyumweru guhera ku gicamunsi cyo kuwa Gatanu.

Mu gihe uwo muhanda ufunzwe, abaturage batembera badakoresheje ibinyaniziga nibo baba bemerewe kuwukoresha, bakahiyakirira haba ku bashaka kugura amafunguro n’icyo kunywa.

Bamwe mu bitabiriye ifungurwa ry’aka gace bavuze ko byabanejeje cyane kuko ari ingirakamaro ndetse n’abacuruzi bakaba barabonye uburyo bwiza bwo gucuruza.

Noheli Clement amafunguro n’ibinyobwa yagize ati “Iki gikorwa twarakishimiye cyane kuko cyaje gikenewe. Ni ubwa mbere mbonye abanya-Musanze bishimye muri iyi myaka. Twaracuruje ku buryo ihene enye naraye nzirangije.”
Ndayizeye Sadi na we yagize ati" Nacuruje liqueur ziranshirana njya no kurangura. Ibi birori twari tubimenyereye i Kigali ariko natwe murabona ko byaje. Ubundi weekend yabaga nziza ari uko twagiye za Rubavu ariko ubu nabo bagiye kujya baza hano iwacu.”

Umwali Angelique wabashije gutemberera aho hantu yagize ati “Ibi birori byarantunguye ariko natashye nkerewe kuko numvaga ntashaka kuhava. Narabyinnye, ndiyakira ndetse nahakuye n’inshuti nyinshi nazo zari zaje kuhatemberera. Nzagerageza ibishoboka njye mpagera buri weekend nje kuruhuka. Turashimira ubuyobozi bwatuzirikanye bakadushyiriraho aha hantu.”

Umuyobozi w’Akarere ka Musanze wungirije ushinzwe imari, ubukungu n’Iterambere, Rucyahana Mpuhwe Andrew, yavuze ko bahisemo gushyiraho iyi Car Free Zone bagamije kongera aho abantu bashobora guhurira bakishima.

Ati “Abaturage bazajya bahahurira bahidagadurire kandi inyungu ikomeye ni ukugira umuturage wishimye, indi nyungu ni uko abacuruzi bazacuruza bunguke kandi nibo basora dufite.”

Akomeza agira ati" Ni igikorwa cyatangiye muri kiriya cyumweru kandi abantu ntibumve ko cyateguriwe CHOGM gusa ahubwo kigomba gukomeza ahubwo nibahashore imari kuko ni n’uburyo bwiza bwo gucuruza umuntu yabashishikariza.”

Ahari hamenyerewe Car free zone ni mu mujyi wa Kigali mu duce nka Remera-Gisimenti, mu mujyi rwagati na Biryogo, aho mu mpera z’icyumweru utwo duce tuberamo ibitaramo by’imyidagaduro, kuruhuka n’ibindi.

Abitembera muri Car Free Zone ya Musanze basusurukijwe n'abahanzi barataramana
Icyo kurya no kunywa biba byateguwe kugira ngo abitabiriye banezerwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .