Ni akarere gafite ibihe bikonje, akagoroba kaho n’igitondo hagira imbeho ubundi imenyerewe mu bihugu by’u Burayi kubera imiterere yabyo n’aho biherereye ku Isi. Iyo uturutse mu bindi bice by’igihugu bigusaba kwifubika mu gihe abahatuye cyangwa ba kavukire usanga umubiri wabo waramenyereye, ubukonje bwamaze kuba mu byo babana na byo.

Gicumbi ni akarere gafite ubuso bungana na kilometero kare 829. Gaherereye Iburasirazuba bw’iyi Ntara. Mu Majyaruguru, gahana imbibi n’Akarere ka Burera na Uganda.

Iburasirazuba hari Uturere twa Nyagatare na Gatsibo, mu Majyepfo hari Akarere ka Gasabo n’agace gato ka Rwamagana ku nkengero z’ikiyaga cya Muhazi cyizwi mu bukerarugendo mu byiza bitatse u Rwanda. Mu Burengerazuba gahana imbibi n’Akarere ka Rulindo.

Utu turere twose nafashe igihe ndatugenda cyane mu rwego rwo kumenya neza u Rwanda mu mpande zose. Nasanze dufite byinshi byiza muri iki gihugu usanga abanyamahanga baza bakabiturusha ariko igihe ni iki ngo Umunyarwanda ufashe umwanya akaruhuka, na we atembere igihugu cye mu mpande zose mu bihe bitandukanye. Byatuma arushaho kugikunda kurusha uko acyumva mu mateka.

Hari amazina meza umuntu yumva n’uturere n’ibyatubereyemo ukagira ngo ni umugani ariko iyo uhageze ukirebera aho ibyo wumva byabereye urushaho gukunda no kumenya ibigukikije.

Kugera i Gicumbi bamwe bibuka ku izina rya Byumba uturutse nko muri Kigali cyangwa se Gasabo, ugenda ubona ubwiza bw’imisozi y’u Rwanda mu buryo butandukanye n’uko wari usanzwe uyizi, hagomba kuba ari ho havuye izina ko u Rwanda ari ‘urw’imisozi igihumbi’.

Urenze Gasabo ugenda usa n’uzamuka buhoro buhoro winjira mu misozi miremire, ari na ko ubona hirya no hino utubande twiza duhinzemo imyaka yeze neza ku buryo bwa kijyambere n’imisozi myiza isa nk’ishushanyije muri bwa buryo mu gifaransa bita (tableaux – oeuvre d’art) zimanitse.

Uko ukomeza kandi ugenda ubona imirima myiza y’icyayi kera muri ako karere, ukabona ubwiza bw’imihanda mishya ihari, amakorosi magari asaba ko kuhatwara imodoka cyangwa igare n’ipikipiki uca ukubiri n’agatama, ndavuga ka manyinya cyangwa ‘Mucyurabuhoro’.

Iyo winjiye muri Gicumbi wakirwa n’iterambere ry’inzu nziza zirimo kuhubakwa z’ibigo bitandukanye byahagabye amashami mu bijyanye n’ubuhinzi n’ubworozi. Aha umuntu yavuga nka Green Gicumbi, umushinga ugamije kubaka ubudahangarwa bw’abatuye Akarere ka Gicumbi, binyuze mu kubafasha kurwanya isuri, hacibwa amaterasi hanaterwa ibiti.

Ni umushinga w’Ikigega gishinzwe gutera inkunga imishinga ijyanye n’ibidukikije (FONERWA) gikorera muri Minisiteri y’Ibidukikije, ukaba waratewe inkunga na Leta y’u Rwanda ku bufatanye n’Ikigega cy’Isi gishyigikira imishinga yo guhangana n’imihindagurikire y’ibihe (GCF).

Mu myaka yashize, uwashakaga kuva i Gicumbi agana mu Mutara (Nyagatare y’ubu), byamusabaga guca i Kigali mu rugendo rurerure cyane kubera imihanda itari myiza, iyo atabishoboraga ubwo yahitagamo kumara igihe kirekire mu nzira ivunanye.

Ubu siko bimeze, ibintu byarahindutse ! Kuva i Gicumbi ugana i Nyagatare ni amasaha make kubera umuhanda mushya Base-Gicumbi-Rukomo-Nyagatare uri gushyirwamo kaburimbo nyuma y’aho Perezida Paul Kagame yemereye abahatuye ko uzakorwa ukabafasha guhahirana n’utundi turere.

Gicumbi-Gatsibo-Nyagatare ni rumwe mu ngendo ziryoheye ijisho ku bakunda ibidukikije kimeza mu Rwanda kuko ugenda usa n’umanuka imisozi myiza cyane wegera ibibaya bya Gatsibo, ugana imirambi ya Nyagatare n’isura y’igitaka, imiterere bigenda bihinduka mu maso yawe.

Kuhatembera ni ukuruhura umutwe no kwirebera uko u Rwanda rugenda ruhinduka mu maso y’urusura.

Ni n’amahirwe kuba tugifite igihugu kidahumanyijwe n’inganda kugeza ubu nk’uko bigaraga cyane mu Burayi, Amerika n’ahandi, aho usanga hose harabaye ibyo bita [béton] mu gifaransa, Isima n’umucanga, nta gitaka kibobereye ubona cyane cyangwa ibimera byinshi hirya no hino.

Dusubiye inyuma i Gicumbi, ni umujyi witeje imbere mu bijyanye n’ubuzima bwiza bw’abatuye aka karere. Ibitaro bya Byumba biriranga ukigera muri uwo mujyi mu nyubako zabyo nziza ziri ahirengeye. Ntitwakwibagirwa amasoko, imihanda y’imigenderano irimo gushyirwamo kaburimbo n’ibindi.

Ucyinjira mu Mujyi kandi ubona Ibiro byiza bishya by’akarere, Ibiro bya Polisi, Hotel Urumuri n’izindi nyubako z’ubucuruzi zitandukanye.

Ni akarere kandi karimo amashuri menshi abanza, ayisumbuye ndetse na Kaminuza y’Ubugeni n’Ikoranabuhanga ya Byumba.

Gicumbi igira amacumbi ku bayisuye. Hotel Urumuri iteye ku buryo bwihariye butanga umutuzo n’ikaze ku buryo uharaye yifuza kuhagaruka. Ni ahantu icyumba cyawe usanga gifite ubusitani bwihariye ibintu bidasanzwe ku ma Hotel yo kuri urwo rwego.

Gicumbi ni ku gicumbi cy’amateka y’urugamba rwo kubohora igihugu no guhagarika jenoside yakorewe Abatutsi.

Uhasanga indaki yari iy’umugaba mukuru w’Ingabo ubu uyobora u Rwanda, Perezida Paul Kagame, hakaba n’inzira z’urugamba aho ugera ugasobanurirwa uko urugamba rwagiye rupangwa.

Gicumbi uhasanga n’amateka y’Ibwami nk’ahitwa Rutare hahoze hatabarizwa Abami n’Abagabekazi. Hakagira kandi umwihariko mu bijyanye n’Imbyino nziza nk’ikinimba, ni kimwe mu birango by’umuco muri ako gace kazwi nko mu Rukiga.

Ushaka gutarama kandi ku marwa ukizihirwana n’abahatuye ku kagoroba cyangwa ikiruhuko, umujyi wa Gicumbi ubonekamo ikigage cyenzetse cyiza cyane, kimwe cy’umwimerere.

Umunyarwanda yaravuze ngo ijisho ry’undi ntirukurebera umugeni. Irebere muri amwe mu mafoto ubwiza bw’ako karere gatuje mu Majyaruguru y’u Rwanda.

Ubwiza bw’umujyi wa Gicumbi

Gicumbi ni umujyi utuje kandi uri gutera imbere ku bakunda ibijyanye n'ibidukikije

Muri Gicumbi uhasanga uburyo bwo kwereka abagenzi aho bagana bijyanye n'imiterere y'Umujyi

Umujyi wa Gicumbi urimo utuyira duto two gutemberamo

Umujyi wa Gicumbi ukomeje kugaragaramo imihanda myiza ya kaburimbo ijyanye n'igihe

Mu marembo ya Hotel Urumuri iherereye muri Gicumbi rwagati, imwe mu zifatiye runini abagenda n'abakorera muri Gicumbi. Ikorerwamo inama n'ubukwe butandukanye

Hotel Urumuri ni imwe mu mahoteli meza mu mujyi wa Gicumbi, ifasha abasuye uwo mujyi kumererwa neza bafata akayaga hanze

Uyu ni umwe mu mihanda isohoka mu mujyi wa Gicumbi

Cathedrale ya Byumba ni imwe mu nyubako zimaze igihe mu mujyi wa Gicumbi, ikaba ku cyicaro cya Diyosezi Gatolika ya Byumba

Inyubako nshya zigezweho ziri kubakwa ubutitsa mu mujyi wa Gicumbi

Mu busitani bwa bar ya hotel Urumuri, umuntu afata amahumbezi n'amafu by'i Gicumbi

Nk'ahandi hose mu gihugu, uhasanga ibyapa bikangurira abantu kwirinda no kurwanya ruswa. Aha ni rwagati mu mujyi wa Gicumbi

Uko u Rwanda rugenda rutera imbere, inzu z'ubucuruzi zigenda zimukira mu nyubako zigezweho. Iyi ni imwe zo iri muri Gicumbi

Ku nkengero z'imihanda muri Gicumbi, uhasanga imiyoboro ituma idatwarwa n'amazi ariko igitangaje ni isuku uhasanga

Abatuye i Gicumbi batuye mu nzu zigezweho zijyanye n'icyerecyezo u Rwanda rwihaye, kandi byose bikorwa mu buryo bufite isuku nkuko bigaragara

Mu mujyi rwagati uhasanga abamotari, abanyonzi batwara abagenzi bava hirya no hino

Uyu ni umuhanda ugana ku biro bishya by'Akarere ka Gicumbi

Ibiro bishya by'akarere ka Gicumbi byitezweho gufasha abayobozi kurushaho guha abaturage serivisi zinoze

Uko inzu zo muri hoteli Urumuri zakira abaharara zimeze. Zifite umwihariko wo kugira ubusitani bwa buri muntu imbere y'inzu

Icyapa kiyobora ahari urwibutso rwa Jenoside yakorewe Abatutsi rwa Mukeri, mu mujyi wa Gicumbi

Mu muhanda uhura n'abacunga ingorofani, nka bumwe mu buryo bwifashishwa mu kwikorera imizigo

Umuhanda uva kuri Kiliziya i Gicumbi ugana mu mujyi rwagati

Gicumbi ni umujyi ubarizwamo amashuri atandukanye. Iki cyapa kirerekana ahari ishuri rya Kibali TVET School

Imbere y'iyi nzu yubatswe mu buryo bwa kijyambere, haragaragara umuhanda mwiza w'imodoka, inzira y'amanyamaguru, inzira y'amanyamagare n'ubusitani

Umwihariko w'amacumbi ya Hotel Urumuri ni uko imodoka yawe ushobora kuyiparika imbere y'inzu yawe

Aha ni mu masangano y'imihanda rwagati mu mujyi wa Gicumbi

Iyi ni imwe mu nyubako ziri kuzamurwa mu mujyi wa Gicumbi

Abaturage bavuye mu bikorwa byabo bagenda batekanye mu muhanda

Imwe mu nzu za kera mu mujyi Gicumbi ikorerwamo ibikorwa bitandukanye by'ubucuruzi

Abatwara ibinyabiziga, abanyamaguru buri wese agenda yisanzuye mu muhanda we

Muri Gicumbi hoteli Urumuri ni imwe mu zifite ibyumba biberamo inama zitandukanye

Imbere y'ibyumba bya hoteli Urumuri, uhasanga ibihangano by'ubugeni bijyanye n'inyamaswa ziboneka muri pariki z'igihugu

Gicumbi ni umujyi ujyanye n'iterambere ariko utirengagiza akamaro ko kurengera ibidukikije. Mu bice bitandukanye hagiye hateye ibiti

Kimwe mu bice bigize Gicumbi ukirebeye ahirengeye

Kubera ko ibikorwa bitandukanye bigenda byiyongera muri Gicumbi, sitasiyo za lisansi zigenda zubakwa hirya no hino kugira ngo ubwikorezi bw'abantu n'ibintu budahungabana

Iyi ni imwe mu nzu za hoteli Urumuri izwi ku izina rya 'VIP' ikaba yarakiriye Perezida Mobutu ubwo yasuraga Byumba

Iminara y'itumanaho ituma abari Gicumbi babasha gutumanaho n'abari mu binde bice by'igihugu n'Isi

Ibitaro bya Byumba ubirebeye ahirengeye

Ibikorwa remezo n'iby'iterambere bimaze kugera muri Gicumbi ku bwinshi

Iterambere ryageze kuri buri wese mu Majyaruguru. Uyu mukobwa ari kugenda avugira kuri telefone, iminara ituma itumanaho ryoroha nayo iri hakurya

Mu masangano y'imihanda (Rond point) yo muri Gicumbi, ni kimwe mu kirango cy'uko uwo mujyi ugendwa kandi uri gutera imbere

Ikibuga cy'Umupira w'amaguru cya Stade ya Gicumbi

Igice kimwe cy'ibitaro bya Byumba

Ibigo by'imari ntibyatanzwe muri Gicumbi itera imbere. Aha ni ku ishami rya Banki ya Kigali muri uwo mujyi

Agace kubatseho Diyosezi ya Byumba uyirebeye mu mujyi hagati

Imibereho y’abaturage ba Gicumbi

Muhura n'abaturage bibereye mu mirimo yabo ya buri munsi, irimo gucuruza ibiribwa kuko ari agace k'ubuhinzi. Aba bari bari kwifashisha amagare mu kugeza umusaruro w'urutoki ku isoko

Imyuga nka moteri y'iterambere ntiyibagiranye i Gicumbi. Aha ni muri atelier Tuzamurane Badozi

Nk'ahandi hose mu gihugu, mu marembo y'isoko rya Gicumbi hashyizweho uburyo bwo kubanza gukaraba intoki, hirindwa Covid-19

Uhura n'abaturage mu mirimo yabo ya buri munsi, batekanye

Gicumbi ni akarere keza ibishyimbo byiza kandi byinshi

Muri Gicumbi nk'ahandi hose mu gihugu bakajije umutekano no kwirinda icyorezo cya Covid-19

Nubwo ari mu misozi miremire, ntibibuza gukoresha igare nk'igikoresho gikomeye mu buzima bwabo bwa buri munsi

Imirimo yo kubaka umuhanda Gicumbi-Rukomo-Nyagatare irarimbanyije

Abaturage batambuka bemye mu muhanda bagiye mu mirimo itandukanye ya buri munsi

Isura y'akarere ka Gicumbi iri kubungabungwa binyuze mu kurwanya isuri, mu mushinga Green Gicumbi

Abaturage barimo Bariyanga Sylvestre (ibumoso) na Imanizabayo Alice basobanurira umunyamakuru Karirima ibijyanye n'umushinga Green Gicumbi, ugamije kurengera ibidukikije

Ibiribwa ni nk'uburo buhuye i Gicumbi. Ubucuruzi bw'imyaka nk'ibishyimbo n'ibindi ni bumwe mu buhigaragaza cyane

Umwuga w'ubudozi ni umwe mu ishyirwamo imbaraga mu kwihangira imirimo

Ibishyimbo biri mu biribwa abanyarwanda bakunda. I Gicumbi bikahera cyane

Nta duka ry'ibiribwa i Gicumbi waburamo ibitoki n'ibirayi

Abashinzwe gukora umuhanda Gicumbi-Rukomo-Nyagatare bakora amanywa n'ijoro ngo uyu mwaka uzarangire umuhanda wose ari nyabagendwa

Umurenge wa Shangasha ni umwe mu igize Akarere ka Gicumbi urangwa n'indangagaciro na kirazira nkuko bigaragara kuri iki cyapa

Ibirayi, ni kimwe mu bihingwa usanga muri Gicumbi nk'ahandi mu Majyaruguru

Umunyamakuru Karirima aganira na Kagenza Jean Marie Vianney, Umuyobozi mukuru wa Green Gicumbi umushinga ugamije kubakaka ubudahangarwa bw’abatuye Akarere ka Gicumbi, binyuze mu kubafasha kurwanya isuri yari yarakibasiye hagacibwa amaterasi hanaterwa ibiti.

Abakozi b'umushinga Green Gicumbi bereka umunyamakuru wa IGIHE uko abaturage bahinga bijyanye n'amaterasi ngo ubutaka budatwarwa n'isuri

Umurenge wa Cyumba ni umwe mu igaragaza ubwiza n'umwimerere w'aka karere

Aka karere karera bikiagaragara ugiye ku isoko

Imboga ni kimwe mu bihingwa byera i Gicumbi

Atelier Tuzamurane Badozi yo mu karere ka Gicumbi

Ba rwiyemezamirimo b'abadozi b'igitsinagore bibumbiye muri 'Atelier Tuzamurane Badozi'

Gicumbi ni kamwe mu turere duhingwamo cyane icyayi. Aha umunyamakuru Karirima yari ahagaze rwagati mu mirima y'icyayi

Ubwiza bw’imisozi ya Gicumbi

Iyo ugeze mu karere ka Gicumbi, wakirwa n'imisozi igiye isobetse ubwiza

Gicumbi ifite imisozi n'imibande myiza kandi byera

Imisozi ya Gicumbi ni icyatsi kibisi, bigaragaza akarere gafite ikirere kidahumanye

Umuhanda Gicumbi-Rukomo-Nyagatare uri kubakwa witezweho guteza imbere ubuhahirane hagati y'Intara y'Amajyaruguru n'Iburasirazuba

Imisozi ya Gicumbi iteze neza ikabera ba mukerarugendo

Gicumbi ni akarere gatoshye cyane

Umuhanda Gicumbi-Rukomo-Nyagatare uri kubakwa, wagiye ushyirwamo amateme akomeye. Iri teme rihuza Gicumbi na Gatsibo

Ubwiza bw'akarere ka Gicumbi buriranga bitewe n'imisozi myiza ihari

Ku misozi yo muri Gicumbi, abaturage bahinga ku butaka buhuje nkuko biri muri gahunda ya Guverinoma

Uko ugenda urenga Gicumbi winjira muri Gatsibo, imisozi iba mike ugasatira ibibaya n'imirambi

Umuhanda Gicumbi-Rukomo-Nyagatare uri kubakwa, urimo amateme akomeye. Iri teme rihuza Gicumbi na Gatsibo

Iyo urebye imisozi ya Gicumbi ubona imeze neza nka bimwe Abanyaburayi bita tableaux (oeuvre d’art)

Iyo uvuye muri Gicumbi winjira muri Gatsibo, akarere k'imirambi

Umunyamakuru Karirima muri studio za Radio Ishingiro mu mujyi wa Gicumbi

Studio za Radio Ishingiro mu mujyi wa Gicumbi

[email protected]