Bimwe mu birwa bitatse ibyiza nyaburanga mu kiyaga cya Kivu

Yanditswe na Mukahirwa Diane
Kuya 7 Werurwe 2021 saa 06:46
Yasuwe :
0 0

U Rwanda ni igihugu cyuje ibyiza bitandukanye bituma hahora urujya n’uruza rwa ba mukerarugendo bagamije kwirebera ibyo byiza, muri byo harimo no gusura ibirwa bitandukanye biri mu kiyaga cya Kivu.

Ikiyaga cya Kivu ni cyo kiyaga kinini mu Rwanda cyikaba gikurura imbaga y’abantu haba Abanyarwanda ndetse n’abandi baturutse mu bihugu bitandukanye. Igice cyacyo kimwe kiri ku ruhande rw’u Rwanda mu gihe ikindi kiri muri Repuburika Iharanira Demokarasi ya Congo.

Ku ruhande rw’u Rwanda gikora ku turere tune aritwo Rusizi, Nyamasheke, Karongi na Rubavu, aha hakaba harangwa n’ibyiza nyaburanga bitandukanye birimo nk’amahoteri akikije ikiyaga ndetse n’umucanga abantu bidagaduriramo.

Ibi ni ibigaragara inyuma ariko imbere muri iki kiyaga harimo ibirwa bitandukanye byuje ubwiza butandukanye bituma uwabigezeho atifuza gutaha.

Mu gushaka kumenya amakuru kuri ibyo birwa, IGIHE yaganiriye n’umwe mu bakozi ba sosiyete “Golden Rwanda Safaris Ltd”, izobereye mu gutembereza ba mukerarugendo.

Umwe mu bayikorera yavuze ko igikurura abantu kujya kuri ibi birwa ari ukurira imisozi bizwi nka ‘Hiking’ ndetse no kureba inyoni.

Ati “Abantu bajya ku turwa ni abantu baba bagira amatsiko cyane, wa wundi uba ushaka kumenya ikiri imbere mu kiyaga. Abajyayo rero ibyo bakorayo ni ukurira imisozi ndetse no kureba inyoni kuko zibamo cyane haba ari heza iyo ukunda ibyo bintu.”

Ibirwa biri mu kiyaga cya Kivu

Ikirwa cya Nkombo

Nkombo ni cyo kirwa kinini mu kiyaga cya Kivu kuko gifite ubuso bungana na kilometero kare 29,7 harimo 22,7 km2 z’ubutaka na 7 km2 z’amazi, uyu akaba ari umurenge wose uri mu Karere ka Rusizi.

Iki kirwa gituwe n’abaturage bakabakaba ibihumbi 18, gikurura abatari bake bashaka kujya kureba ukuntu abantu batuye hagati mu mazi ndetse bakururwa n’imico yaho itandukanye n’isanzwe irimo nk’ururimi rw’Amashi rwumvwa n’abaho gusa ndetse n’imbyino zabo zizwi nko gusama.

Abaturage baho benshi batunzwe no kuroba n’ubundi bucuruzi butandukanye bakorera muri Repubulika Iharanira Demokarasi ya Congo. Ba mukerarugendo barahakunda kuko ubuzima bwaho butandukanye n’ubw’ahandi mu gihugu.

Iki kirwa nta terambere ryaharangwaga mu myaka yashize ariko muri iyi myaka ryarahageze kuko haboneka ibikorwa remezo bitandukanye nk’umuriro, amazi meza, amashuri, ivuriro ndetse na hoteli.

Ikirwa cya Gihaya

Gihaya na ho ni mu Karere ka Rusizi ndetse ni hafi na Nkombo ariko ho ni hato. Ni ikirwa ba mukerarugendo bakunda kujya gusura bashaka kurira imisozi ndetse no gutembera mu bwato. Ubuzima bwaho ni nk’ubwo ku Nkombo.

Akarwa k’Abakobwa

Aka ni akarwa kari mu Karere ka Nyamasheke gafite amateka akomeye mu Rwanda, kera bajyaga ku kajugunyaho abakobwa babaga baratwaye inda z’indaro ngo badateza ishyano ku musozi.

Abantu baturutse imihanda yose biganjemo igitsina gore bajya kuhasura bagira ngo barusheho kumenya amakuru y’uko byagendaga ku bakobwa bahajugunywaga.

Ikirwa cya Nyamunini
Nyamunini izwi cyane nka Napoleon Island, ni ikirwa kiri mu kiyaga cya Kivu ku ruhande rwa Karongi. Iki ni kimwe mu birwa bikurura ba mukarerugendo bitewe n’ubwoko bw’inyoni butandukanye buhari ndetse n’imbuto zihari.

Ikirwa cy’Amahoro

Amahoro na cyo kiri ku ruhande rwa Karongi, nk’uko cyitwa amahoro koko ngo gitemberwa n’abantu babuze amahoro muri bo kandi ngo bahageze bakabona amazi agikikije n’amajwi y’inyoni ziririmba bakumva buzuye amahoro muri bo.

Ikirwa cya Nyakarwa

Nyakarwa ni ikirwa giherereye mu Karere ka Karongi cyizwiho kugira inyoni zitandukanye. Uwahegeze nta yandi majwi aba yumva usibye urusobe rw’amajwi atandukanye y’inyoni.

Ikirwa cya Mpembe

Mpembe na yo iherereye muri Karongi akaba ari icyirwa kigengwa n’umuntu ku giti cye, aho yashyizeho ahantu hangana n’ibilometero bine abantu bagenda n’amaguru. Gikurura benshi kuko kibafasha kuruhuka mu buryo bwihariye.

Si ibi birwa gusa biri muri iki kiyaga kuko muri 2012, Ikigo cy’Igihugu cyo Kubungabunga Ibidukikije (REMA),cyatangaje ko mu kiyaga cya Kivu habarizwamo ibirwa 250. Muri byo, 56 biri ku rahande rw’u Rwanda. Ibi twavuzeho ni ibyo ba mukerarugendo bakunze muri gusura muri iki gihe.

Abantu bajya ku birwa bitandukanye bakuruwe no kujya kureba ubwoko bw'inyoni zitandukanye (Ifoto: Niyonzima Moise)
Abaturage bo ku kirwa cya Nkombo mu ngendo bakoresha ubwato (Ifoto: Niyonzima Moise)
Ikirwa cy'Amahoro iyo ukigiyeho udafite amahoro utaha unezerewe
I Kivu gitatswe n'ibirwa biteye amabengeza kuva i Rubavu kugera i Rusizi
Ikirwa cya Nkombo gikundwa na bamukerarugendo benshi (Niyonzima Moise)
Ikirwa cya Nyamunini kizwiho kubaho inyoni zitandukanye
Imbere mu kiyaga cya Kivu hari ibyiza bitandukanye
Ubwiza bw'ikiyaga cya Kivu bukurura benshi by'umwihariko izuba rirenga
Ikiyaga cya Kicu kigizwe n'ibirwa bitandukanye biriho ibyiza nyaburanga bikurura ba mukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .