Urugo rwa Gatarayiha Norman w’imyaka 61 rumaze kuba ahantu nyaburanga rusurwa n’abakerarugendo, rukakira abageni baje kuhifotoreza. Uru rugo rutatswe n’ubusitani burimo amoko menshi y’indabyo n’ibiti biteye amabengeza; hari utuyira tureture tugenda tukagera ahantu hisanzuye hakunze gufatirwa ayo mafoto.

Gatarayiha utuye Kimironko haruguru gato y’aho bita "Kwa Mushimire", amaze imyaka 12 atunganya ubu busitani. Mu 2003 ubwo yagarukaga mu Rwanda ahungutse, yatangiye asa n’utaka urugo rwe bisanzwe, ateramo indabo n’ibiti bitanga impumuro nziza n’ubuhehere. Uko umubare w’abamusura wiyongeraga, Gatarayiha yaje kugira igitekerezo cyo kuhagira ahantu nyaburanga, ku buryo abakerarugendo bashobora kuhasura bakaharuhukira.

Aha ni kwa Gatarayiha iwe ari naho hari ubusitani abageni bifotorezamo

Mu 2012 abantu benshi bafite ubukwe batangiye kujya bamusaba kuhifotoreza, nuko atangira atyo kujya ahabyaza amafaranga make make. Uko bagendaga biyongera, Gatarayiha yasanze ari ubucuruzi ashobora kubyaza umusaruro nuko muri ubu busitani bwe ashyiramo ibisimba by’amoko anyuranye n’izindi nyamanswa nyaburanga nk’umusambi, inkende n’ibindi. Izi nyamanswa ariko yaje gusabwa n’abashinzwe ibijyanye n’ubukerarugendo mu Rwanda (RDB) kuzisubiza mu mashyamba, asobanurirwa ko atemerewe kuzitunga iwe mu rugo kuko zitisanzura kandi ko zifitiwe impungenge z’uko zishobora gucika ku Isi.

Kuri ubu, avuga ko yinjiza amafaranga agera kuri miliyoni ku kwezi ayavanye mu kwakira abakerarugendo baza kumusura, abaza kugura imiramba y’indabyo n’abaza kuhifotoreza ku minsi mikuru y’ubukwe bwabo.

Uretse ubu busitani, mu nzu he hatatse imitako myinshi ya Kinyarwanda ku buryo abageni bageze mu busitani bwe banifuza kwifotoreza mu nzu ye.

Amaze imyaka 12 atunganya iwe ngo habe hasa gutya

Ati “Kwifotoreza mu busitani no mu nzu banyishyura ibihumbi ijana, kandi nibura ubu buri cyumweru nsigaye nakira amakwe arenga ane, mu kwezi nakira amafaranga agera kuri miliyoni nkuye muri uko kwakira amakwe.”

Uku gutaka iwe, mu buryo bwo kwihangira umurimo, Gatarayiha yabikuye mu kuba yarakunze kuba hanze, by’umwihariko mu Burusiya.

Gusa ibi Gatarayiha avuga ko yanabyize dore ko ari inzobere mu by’ubuhinzi bw’indabyo (Horticultural Engineering) bikiyongeraho ko ari byo yakunze gukora nk’akazi kamutunze. Uretse gutaka iwe mu rugo, Gatarayiha afasha abantu banyuranye guhanga no gutunganya ubusitani bwo mu ngo zabo, aho bakorera, kandi akoresha abakozi benshi batunzwe n’ibi bikorwa.

Gatarayiha ni umwe mu bashobora kubera abandi Banyarwanda urugero mu kwihangira umurimo binyuze mu byo wize, mu byo ukunda, mu mpano zawe no guhanga udushyamu mibereho.

Mu rugo iwe hatatswe n'ubusitani n'indabyo z'amoko menshi zibereye ijisho

Iwe yahise Rwanda Unique Nurseries, aho afite imirama y'ibiti n'indabyo agurisha

Iwe uhasanga ibibumbano by'inyoni z'amoko anyuranyeziri mu busitani

Mu rugo kwa Gatarayiha hari ibiti by'amoko menshi bikurura ba mukerarugendo

Yari atunze imisambi 12 yagiye agura muri za parike, ubu iwe hari ibishushanyo n'ibibumbano byayo

Urugo rwe rukikijwe n'ibyiza nyaburanga binyuranye birimo n'ibi bitako

Uko mu nzu iwe hatatse bikurura ba mukerarugendo baba bifuza kumenya byinshi ku biranga ibikoresho gakondo by'u Rwanda

Uko hasa n'imitako irimo bishimisha benshi mu bageni baza kuhifotoreza

Aha ni mu ruganiriro kwa Gatarayiha, ahakodesha abageni bakahifotoreza

Mu nzu iwe hatatse kinyarwanda

Abageni kwifotoreza aha bishyura ibihumbi 50

Gatarayiha mu nzu imbere iwe

Gatarayiha w'imyaka 61

Iyi ni imbwa y'umutako iri ku muryango w'inzu ye mu gikari

Imbwa iba mu rugo kwa Gatarayiha; iyi yo ni nzima si umutako

Kuri ubu yoroye inkoko z'amoko menshi akura muri Kenya, Uganda, Inyarwanda n'izindi

Kuva winjira kugeza usohotse hatatswe n'ubusitani n'ibindi byiza nyaburanga

[email protected]

Photo: Octave Byiringiro