Mantis uBuranga, ubwato bw’akataraboneka buzakora nka hotel mu Kivu bugiye gutahwa

Yanditswe na Muhonzire Sylvine
Kuya 27 Gashyantare 2021 saa 08:11
Yasuwe :
0 0

Ubwato bw’akataraboneka buzakora nka hotel mu kiyaga cya Kivu, bushobora gutangira gukora mu kwezi kwa Karindwi uyu mwaka, maze abafite agatubutse bagatangira kuryoherwa n’ubuzima baruhukira muri Hotel igenda hejuru y’amazi.

Ubu bwato bwiswe Mantis Kivu Queen uBuranga byari biteganyijwe ko buzatangira gukora mu kwezi kwa Kane uyu mwaka, ariko kubera imbogamizi zitandukanye zatewe n’icyorezo cya Covid-19, imirimo yo kubaka yagiye idindira.

Umuyobozi uhagarariye ibikorwa bya Mantis mu Rwanda, Dino Urbani, yabwiye IGIHE ko bataramenya neza igihe buzarangirira ariko bateganya ko buzatangira gukoreshwa mu kwezi kwa Karindwi.

Ati “Ntituramenya neza igihe ubwato buzaba bwarangiye, bityo sinakubwira ngo ni iyi tariki, cyangwa ni uku kwezi […] gusa turifuza ko mu kwezi kwa Karindwi bwaba bwarangiye.”

Yakomeje avuga ko nyuma y’ukwezi n’igice ni ukuvuga mu mpera za Werurwe, hazaba hamenyekanye igihe nyacyo buzaba bwarangiye.

Ibikoresho byo kubaka ubu bwato bituruka muri Afurika y’Epfo bigateranyirizwa mu Rwanda.

Dino yakomeje agira ati “Twahuye n’imbogamizi nyinshi, kubera Covid-19 ibintu byose byarafunze, nta kintu cyavaga mu gihugu kimwe kijya mu kindi [...] imvura nyinshi yaraguye muri Kibuye abantu ntibabona uko bakora bituma ibikorwa bitinda.”

Yakomeje avuga ko uretse izo mbogamizi bahuye nazo, ibikorwa byo kubaka byasubukuwe ndetse ko hari gutegurwa aho ubwato buzakorera, kandi ko hari gushyirwamo imbaraga nyinshi kugira ngo burangire.

Mantis Kivu Queen uBuranga ni ubwato buzaba bufite ibyumba bigezweho (cabin) icumi, kimwe gishobora kwakira abantu bo ku rwego rwo rw’abakuru b’ibihugu n’ikindi cy’abanyacyubahiro basanzwe.

Buri cyumba kizaba kirimo ikintu cyose umuntu yakenera, nk’uko nyine yaba ari muri Hotel, ni ukuvuga ubwiherero n’ubwogero, ibyuma bitanga ubushyuhe n’ubukonje, televiziyo, restaurant, bar, n’ibindi bitandukanye.

Ubu bwato buri kubakwa na sosiyete yo muri Afurika y’Epfo yitwa AfriNest, imikorere yabwo ikazagenzurwa na Mantis izobereye mu gucunga amahoteli.

Mantis isanzwe ifite hotel mu Rwanda mu Karere ka Rusizi nayo yo ku rwego rwo hejuru. Yitwa Mantis Kivu Marina Bay, ifite ibyumba 79 birimo kimwe gishobora kwakira nk’Umukuru w’Igihugu.

Imirimo yo kubaka Mantis Kivu Queen uBuranga irakomeje, mu mri Nyakanga biteganyijwe ko izatahwa / Ifoto: Mantis
Ubu bwato bw’akataraboneka buzaba bumeze nka Hotel, buzakorera mu kiyaga cya Kivu / Ifoto: Mantis
Ubwiza bw'Ikiyaga cya Kivu bukurura ba mukerarugendo benshi ndetse n'abashoramari / Ifoto: Mantis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .