Umunyarwanda n’undi wese wabonye ikibi amenya guhitamo icyiza

Yanditswe na Tom Ndahiro
Kuya 13 Nyakanga 2017 saa 10:33
Yasuwe :
0 0

Urubyiruko rw’u Rwanda rukura ntawe uruhagurutsa mu ishuri ngo rwivuge ubwoko. Nta bana, abasore n’inkumi bavutswa amahirwe yo kwiga cyangwa bakabura akazi kubera ibyanditse mu ndangamuntu zabo cyangwa iz’ababyeyi babo ndetse ntawe ubuza Umunyarwanda kugira aho ajya cyangwa gushakana n’uwo bashimanye kubera icyanditse mu ndangamuntu.

Ibi ariko siko byahoze, hari benshi batazi ko intambara yo kurwanya imishinga na politiki bitanya Abanyarwanda imaze igihe kinini, hari n’abatazi ko indangamuntu n’izindi nyandiko za leta zashimangiraga amoko bifitanye isano n’ivangura na Jenoside yakorewe Abatutsi.

Ibyo byarabaye mu Rwanda aho indangamuntu kuri bariyeri yakijije bamwe ikicisha abandi mu gihe cya Jenoside yakorewe Abatutsi muri Mata 1994.

Ibi kandi no mu mateka yo hambere biragaragara aho mu 1938, ubutegetsi bwa Adolf Hitler bwashyizeho itegeko ko buri ndangamuntu y’Umuyahudi wese iterwamo kashi idasibama y’inyuguti ‘J’ biza gukurikirwa no kubategeka kwambara ikarita (badge) ishushanyijeho “Inyenyeri ya Dawudi” (Star of David) y’umuhondo.

Icya mbere mu byahagurukije Umuryango FPR-Inkotanyi benshi bakahasiga ubuzima, abandi bakahavana ubumuga, cyari ukurengera Umunyarwanda, Ubunyarwanda n’ubuzima bw’igihugu, nk’uko bigaragara mu migambi ya FPR kuva yatangira mu 1987 ndetse no mu ya Rwandese Alliance for National Unity (RANU) yayibanjirije mu 1979.

Uko guharanira ubumwe n’uburenganzira bw’Umunyarwanda byaragaragaye cyane mu mishyikirano yabereye Arusha mu gihugu cya Tanzania kuva muri Nyakanga kugeza muri Kanama 1993. Iyo mishyikirano ikaba yarabaye nyuma y’uko Leta Habyarimana yari imaze kubona imbaraga za FPR ku rugamba no muri politiki.

Gutsindwa k’umuzi w’icyaha

Ku wa 3 Kanama 2017, nibwo Abanyarwanda baba mu mahanga bazatora Perezida wa Repubulika y’u Rwanda, ababa mu gihugu bo bakazatora ku wa 4 Kanama. Iyi tariki ifite icyo ivuze cyane mu mateka y’u Rwanda, kuko ku itariki ya 3 Kanama mu 1993, hari amasezerano abiri akomeye yasinywe hagati ya Leta y’u Rwanda na FPR- Inkotanyi.

Amasezerano ya mbere yasinywe yari ayo guhuza Ingabo za Leta ya Habyarimana n’Ingabo z’Inkotanyi (RPA); andi yabaye amasezerano yiswe “Ay’Ingingo Zinyuranye n’Izisoza.” Yaje agizwe n’ibintu byatinze kujya mu masezerano y’amahoro yasinyiwe Arusha ku wa 4 Kanama 1993, kubera ko Leta ya Habyarimana yasetaga ibirenge mu kwemera ibiyakubiyemo.

Bimwe mu bikubiye muri ayo masezerano ya kabiri ni amahame agenga imiterere, imikorere n’imikoranire by’inzego z’iperereza, iz’umutekano, imiterere y’ubushinjacyaha, indahiro z’abayobozi n’uko begura.

Nyuma y’imyaka 60, ingingo ya 16 y’ayo masezerano ivuga iby’amoko yaciriye urwo gupfa. “Amoko” yazanywe mu Banyarwanda ndetse ashyirwa mu mategeko n’Ababiligi mu wa 1933. Kuva icyo gihe Umunyarwanda yavukiraga, agakurira ndetse agapfira muri Tutsi, Twa na Hutu.

Mu gihe cy’iyo mishyikirano y’amahoro, amashyaka yari ashyigikiye abateguraga umugambi wa Jenoside barwanyije cyane ko iyo ngingo yemezwa kuko FPR-Inkotanyi yabikomeyeho, ndetse haza no kwiyongeraho igitsure cy’indorerezi n’umuhuza w’imishyikirano.

Nta gihe guharanira Ubunyarwanda bitabayeho. Mu wa 1997 abacengezi batifuzaga Ubunyarwanda bateye abanyeshuri b’i Nyange babategeka kwitandukanya mo Abahutu n’Abatutsi. Abo banyeshuri barabyanze bemera gupfa no gukomereka bazira ko ari Abanyarwanda kurusha kubaho bitwa icyo batari cyo.

Muri iki gihe tujya mu matora, twibuke ko ubwo bumwe iz’Amarere zitangiye, n’Abana b’i Nyange bakabuzira ari igihango giha Umunyarwanda imbaraga zidasanzwe.

Mu gihe twibuka abo b’ingirakamaro, tunazirikane ko hari Abanyarwanda nka FDLR, FDU-Inkingi, Ishema Party n’abandi nkabo bakiri mu byaciriwe iteka mu myaka 24 ishize. Si n’abo gusa kuko hari n’abanyamahanga nka Filip Reyntjens, Jean Herve Bradol n’abandi barwanya ubumwe bw’Abanyarwanda, bituma berura bakarwanya igikorwa cyo kugira inyandiko za leta zidashyira imbere “ubwoko”.

Ibikorwa byo kurwanya Ubunyarwanda si ibya vuba aha; kuva mu 1957 kugera mu 1959, hari Abanyarwanda barimo abiyise abagaragu bakuru b’i Bwami; Joseph Habyarimana Gitera na Gregoire Kayibanda bavuze ko “Abahutu n’Abatutsi ntacyo bapfana.”

Kubera ko hari Abanyarwanda bari bamaze igihe batangiye guharanira ko icyitwa “Amoko” kiva mu ndangamuntu, hasohotse inyandiko “Note sur l’aspect social du problème racial indigène au Ruanda” izwi nka “Manifesto de Bahutu” ku wa 24 Werurwe 1957 ivuga ko ishaka ko amoko akomeza kwandikwa.

Bivugwa ko guhera muri Kamena 1957 kugeza muri Kamena 1958, Inama Nkuru y’Igihugu yize kuri icyo kibazo cy’amacakubiri yazanywe n’Ababiligi. Inama yasojwe hasabwa gusiba amagambo “Abahutu, Abatwa n’Abatutsi” mu bitabo no mu zindi nyandiko za Leta y’Abakoloni. Ibyo byarananiranye Leta Mbiligi ishyigikira abaharanira ivangura bashakaga ko ayo moko mahimbano ariyo aranga Abanyarwanda.

Mu 2010, Perezida Paul Kagame nka Perezida wa FPR yagize ati “Duharanira UBUMWE kuko tuzi ko umuryango ushobora kuzima iyo ujemo amacakubiri ntahoshwe; naho umuryango wunze ubumwe urasugira, ugasagamba.”

Twabonye akamaro k’uyu mugambi, twanabonye n’icyo ayo macakubiri yatugejejeho, ahasigaye ni uguhitamo, kandi guhitamo kwiza ni uguhitamo Umuryango w’Abanyarwanda, guhitamo kwiza ni ugusugira ugasagamba.

Biracyakomeza…


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .