00:00:00 IGIHE NETWORK KN KINYARWANDA EN ENGLISH FR FRANCAIS

Uko Abanyarwanda dukwiye gukomeza kurema ibyishimo

Yanditswe na Kwezi Jean
Kuya 28 March 2022 saa 12:39
Yasuwe :

Mbere yo kugera ku ngingo nyamukuru itumye nandika iki gitekerezo, reka tubanze dusubize amaso inyuma turebe aho twavuye aho turi n’aho turimo kugana. Tubanze twibukiranye ko u Rwanda atari akarwa kaba ahantu runaka konyine, turi mu Isi irimo ibihugu n’abantu babyo kandi mu buryo bumwe cyangwa ubundi, imibereho y’abatuye isi hari aho ihurira muri rusange.

Duhereye aha rero twibukiranye ko mu myaka itari myinshi itambutse hari byinshi byagiye biba mu isi bikagira icyo byahungabanya ku bukungu bw’isi muri rusange kandi natwe turimo bikaba byaba intandaro yo kubura ibyishimo muri rusange.

Ariko by’umwihariko Abanyarwanda turacyafite ibikomere haba ku mubiri, mu mutima no mu nzego z’ubukungu bishingiye ku mateka yacu y’ahahise twasigiwe no kuba mu Rwanda harabaye jenoside yakorewe abatutsi hapfuye abasaga miliyoni hakaba hashize gusa imyaka 27.

Kuba hari ibimaze gukorwa hakabaho kubaka igihugu guhera ku busa bintera gushimira ubuyobozi bw’igihugu bwakoresheje uko bushoboye tukaba turi aho turi ubu.

Hagiye habaho ihungabana ry’ubukungu ku isi aho twavuga muri rusange iryabaye muri Leta Zunze Ubumwe za Amerika ryabaye ahagana mu 2009. Iri hungabana mu buryo bumwe cyangwa ubundi ryatugizeho ingaruka, gusa icyabaye cyiza ni uko inzego zacu zishinzwe ubukungu zakoze iyo bwabaga ntitugwe hasi ngo turambarare ariko muri rusange iyo igihugu kimwe mu bibumbatiye ubukungu bw’isi gihungabanye byanze bikunze natwe bitugeraho.

Nubwo itangazamakuru ryo mu Burengerazuba bw’isi ririmo kuvuga cyane ku ntambara ya Ukraine n’u Burusiya nk’ikibazo kirimo guhungabanya ubukungu bw’isi ariko hari ibindi bihugu haba muri Afurika n’ahandi byahuye n’intambara birasenyuka kandi byari bifatiye runini ubukungu bw’isi.

Aho twavuga nka Libia, Irak, Afaganistan, Syria, Somalia, Ethiopie n’ibindi bihugu bimaze igihe mu ntambara byiyoyengeraho coup d’état zayogoje Uburengerazuba bwa Afurika mu bihe bishize, ibi na byo mu buryo bumwe cyangwa ubundi byatugizeho ingaruka twese ku isi mu rwego rw’ubuhahirane n’iterambere.

Hamwe n’ibyo byose icyorezo cya Covid-19 kimaze igihe kijegeza ubukungu bw’isi muri rusange byumvikane ko bigeze ku bihugu bimwe bya Afurika natwe turimo byahazahariye.

Imyaka igera kuri ibiri turacyahanganye n’iki cyorezo ubuyobozi bukora uko bushoboye ngo Abanyarwanda babeho badahitanwe na cyo ari benshi kandi ubukungu bukomeza gusigasirwa.

Ubwo nasomaga icyegeranyo kivuga ku byishimo mu bantu batuye isi nabonye u Rwanda ruri mu bihugu biri ku rutonde rw’inyuma gusa nk’uko bisanzwe abakora urwo rutonde nta kabuza ko abenshi baba baturuka mu bihugu byo mu Burengerazuba bw’isi hakaba aho bagera bagashyira muri raporo zabo icengezamatwara ryo kwireherezaho ibyiza byose ikigamijwe ari ukuturangaza ngo tugire ngo iwabo niho paradizo yifuzwa mu isi kandi ibibazo tubisangiye cyangwa wenda twaba dufite n’uko tubyitwaramo neza kubarusha.

Ku ruhande rwacu nk’Abanyarwanda, icyo dukwiriye gutekerezaho ni uko aba bakora uru rutonde bubatse ubukungu bw’ibihugu byabo imyaka amagana kandi benshi nta byago n’amakuba banyuzemo nk’ayo twanyuzemo hashize imyaka 27 gusa dutangiriye kubaka igihugu ku busa.

Kuba rwose baza n’imbere nta gitangaza cyakagombye kubamo, igitangaje ahubwo ni ukuntu twe nk’Abanyarwanda tugerageza kwiyubaka mu gihe gito.

Icyo nise icengezamatwara mu gukora ibyegeranyo by’aba banyamahanga bo mu Burengezabuba bw’isi ni uko bashima ibyo tugenda dukora nyuma bagasa n’abivuguruza ku byo bashimye.

Birazwi neza ko u Rwanda ruza inshuro nyinshi muri raporo zikorwa nk’igihugu gifite umutekano usesuye, kirangwa n’isuku, gifite ubukungu buzamuka neza mu bihe byose, gifite ibikorwa bigamije kuzamura umuturage kandi byose ni ibifasha umuturage kugira akanyamuneza, bivuze ko rimwe na rimwe tuba tugomba gukora cyane tudakoreye ijisho ry’ibyegeranyo kuko babikora bitewe n’uko baramutse; igikuru ni uko twe nk’Abanyarwanda dufite icyerekezo kizima tuyobowemo na Nyakubahwa Perezida wa Repubulika Paul Kagame.

Ni gute rero twakomeza kurema ibyishimo muri twe ?

Numva byaba byiza abashoramari b’Abanyarwanda bashyize ingufu mu gushora imari mu buhinzi n’ubworozi mu cyaro, abantu bakibumbira hamwe mu makoperative bagahinga bakorora.

Nyuma hakabaho kubaka ibikorwaremezo nk’inganda ziciriritse zitunganya ibikomoka kuri ubwo buhinzi n’ubworozi. Ibi byarema akazi muri rusange cyane ko abaturage benshi ijanisha rinini baba mu cyaro. Muri uru rwego bitewe n’ibihingwa dushyizemo imbaraga bishobora kuba intwaro dukoresha kugira ijambo mu karere no ku isi, nk’uko numvise u Burusiya, u Bushinwa, Leta Zunze Ubumwe za Amerika bagize igihingwa cy’ingano intwaro barwanisha mu by’ubukungu kuva kera kugeza n’ubu kuko zikenerwa na benshi ku isi.
Gushyira imbaraga mu bikorerwa mu Rwanda bizatuma ifaranga ryacu rirushaho kugira agaciro kuko ibyo twohereza hanze bizaba byinshi ibyo duhahayo bikaba bike.

Gahunda z’ubwizigame mu bigega by’imari bikwiriye kuba umuco ndetse tukaba twasubira ku muco wo guhunika ibihingwa mu buryo bwa kijyambere ku buryo bimara igihe kirekire.

Hari byinshi byakozwe kandi bigikorwa byakomeza kongerwamo imbaraga byatuma umuturage atekana bityo akagira imibereho imutera kurushaho kwishima ariko na we abigizemo uruhare.

Ku isonga, gahunda ya mituweli kuri bose, gahunda ya Ejo Heza kuri buri wese igomba kwitabwaho kandi Abanyarwanda bakayitabira ku bwinshi kuko igena amasaziro meza.

Gahunda y’ubudehe na Girinka izakomeze n’iyo itaba inka wenda hagenda hakorwa n’izindi wenda inyito igahinduka ‘Gira Itungo’ yaba amatungo magufi cyangwa amaremare. Gahunda y’uturima tw’igikoni ni nziza cyane Abanyarwanda bakwiriye gukomeza kuyitabira. Utu turima tw’igikoni tukunganirwa na gahunda ya ‘Tera igiti cyera imbuto munyarwanda’, yaba ipapayi, umwembe, ipera, ikinyomoro n’ibindi.

Ibi bizadufasha kurwanya imirire mibi muri rusange. Muri uru rwego Abanyarwanda bige kuba abasirimu kuko hari abahinga imbuto cyangwa bakabona umukamo bakabimarira ku isoko bumva ko bitabareba na bo kurya imbuto cyangwa kunywa amata.

Nsoma bimwe mu bitekerezo by’abavugaga ku cyegeranyo cyakozwe cy’ibyishimo ku isi hari bamwe batungaga agatoki inzego zimwe na zimwe ko hari ibyo zarushaho kunoza. Izo nzego zavuzwe nta kabuza hari icyizere ko zizakomeza intambwe yo kunoza imikorere cyane ko kimwe nabonye kandi nakunze ndetse nemeranya na cyo ari uko Abanyarwanda dufite umukuru w’Igihugu Nyakubahwa Perezida wa Repubulika Paul Kagame uhora iteka ari maso ku cyateza imbere Umunyarwanda.

U Rwanda nirweme.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .