00:00:00 IGIHE NETWORK KN KINYARWANDA EN ENGLISH FR FRANCAIS

Ugutsindwa gukomeye kw’amadini n’amatorero muri Jenoside yakorewe Abatutsi

Yanditswe na Urinzwenimana Mike
Kuya 13 April 2022 saa 09:55
Yasuwe :

Mu 1994, mu gihe cya Jenoside yakorerwaga Abatutsi, bivugwa ko Abanyarwanda barenga 90% bari abakirisitu. Birumvikana ko bake basigaye atari bo bonyine bishe Abatutsi barenga miliyoni mu gihe gito, bakabikorana ubugome ndengakamere bwatangaje Isi yose.

Kiliziya Gatolika n’Itorero ry’Abaprotesitanti b’aba-Presbyteriene ni amwe mu madini amaze imyaka igera kuri 120 ageze mu Rwanda.

Ku butegetsi bw’Abadage mu Rwanda Abaprotesitanti baragutse bikomeye. Nyuma y’uko Abadage batsinzwe mu Ntambara ya Mbere y’Isi byagize ingaruka zikomeye mu butegetsi bwabo no mu bihugu bari barafashe birimo n’u Rwanda. U Bubiligi ni bwo bwagabiwe u Rwanda. Bahageze, bakoranye cyane na Kiliziya Gatolika ariko haza amatorero nk’Abangilikani, Abadivantisti, Ababatisita, Aba-Methodisite n’abandi.

Igihe hari inkubiri yo kuza muri Afurika kw’abamisiyoneri b’Abanyaburayi iwabo hari ubushyamirane bukomeye bw’amadini ndetse usanga bwaragiye bubakurikirana igihe bari bageze no muri Afurika. Ubutegetsi bwa gikoloni bwahaye intebe benewabo bava mu bihugu bimwe abandi barabaheza.

Ibyo byagize ingaruka zikomeye mu gutanguranwa abayoboke, ibibanza byo kubakaho za misiyoni ari nako bigira ingaruka mu mibanire y’Abanyarwanda bari bazaniwe Ivanjiri babwirwa ko yubakiye ku rukundo n’amahoro ariko ibyo ababivugaga bakoraga kenshi bikaba bitandukanye kure n’uko bitwaraga. Byarangiye bamwe mu Banyarwanda batangiye kwita abandi abapagani, urwikekwe rwinjira mu bana b’u Rwanda batangira no kurwanya Umwami Musinga.

Kuva mu 1930 kugeza mu 1960, mu Rwanda habaye impinduka nyinshi mu gihugu mu itorero ry’Abaprotesitanti bagerageje gushyiramo imbaraga nyinshi ngo ijwi ryabo ryumvikane muri politiki y’u Rwanda. Bashinze ihuriro rigamije ubufanye mu mirimo y’ivugabutumwa no gukemura amakimbirane yari yatangiye kugaragara hagati yabo, gusa byarangiye ijwi ryabo ritumvikanye mu rwego rwa politiki.

Mu 1933 Abaprotesitanti bagize ububyutse bukomeye bwatangiriye i Gahini bukwira mu Rwanda hose no mu bihugu by’Uburasirazuba bwa Afurika.

Muri iyo myaka Kiliziya Gatolika nayo ntabwo yari yicaye kuko Umwami Musinga amaze kubatizwa yazanye abo bayoboranaga muri Kiliziya nabo bategeka rubanda rwose kubakurikira, benshi bajyayo atari uko babwirijwe ubutumwa bwiza ahubwo kubera gutinya no kubaha abayobozi babo.

Izi nkubiri z’amakimbirane n’amacakubiri n’ivangura bishingiye ku madini bimaze kugera mu Rwanda byagize ingaruka zikomeye bigera no mu mu mashuri maze amoko ahabwa intebe cyane mu mashuri yashinzwe n’abamisiyoneri na Leta ariko ikayaragiza amadini mu rwego rwo kuyacunga.

Muri icyo gihe ni bwo habibwe ingengabitekerezo mbi y’amoko yatandukanyije Abanyarwanda maze ubumwe bwabo burasenyuka burundu.

Nk’uko bigaragazwa n’ibitabo by’abahanga mu mateka y’ubukirisitu mu Rwanda, usanga intego abanyamadini bavugaga ko bafite itandukanye n’ibyo bakoraga cyangwa ibyanditse muri Bibiliya birimo guhindura abantu kuba abigishwa ba Yesu. Wasangaga bibanda ku bindi birimo kugwiza abayoboke, gushinga insengero nyinshi no kugira ubudahangarwa muri politiki.

Hagiye habaho ubushyamirane no kutumvikana kw’amadini gushingiye ku mbaraga za politiki z’ibihugu bavagamo byabakoreshaga aho babaga bagiye gushinga insengero.

Urugero ni amakimbirane yabaye hagati y’Abagatolika bari barageze mu Rwanda tariki 2 Gashyantare 1900 n’Abaprotesitanti b’Abangilikani, bitewe n’akarere ka Gisaka gaherere mu Burasirazuba bw’u Rwanda kari kashyizwe mu maboko y’Abongereza.

Padiri Klass wari ufite ubwenegihugu bw’Abafaransa wayoboraga Vikariyati ya Rwanda yumvise ko Gisaka igiye gutwarwa n’u Bwongereza arahaguruka arwana umuhenerezo avuganira Musinga n’abakoloni b’Ababiligi ngo badatakaza Gisaka ariko ntibyabuza ko Abongereza bari kumwe n’idini ryabo ry’Abangilikani muri Mutarama 1922 batangiye kuhayobora.

Iyi nkubiri yarangiye ubwo umugambi wabo wo gucisha gari ya moshi muri Gisaka wimuriwe Karagwe muri Tanzania.

Gisaka imaze kuba iy’u Rwanda ntabwo byoroheye abogezabutumwa b’Abongereza ndetse n’abo bari barabwirije mu kwagura itorero ryabo rya Angilikani mu Rwanda, ibi byatumwe bacika intege ariko ntibasibangana burundu bakomeza umutsi.

Mu 1907, Aba-Presbyteriene, Abangilikani mu 1922, Ababatisita b’Abadanwa (1928), Abapentekote (1940) n’abandi bari bamaze gushinga imizi mu Rwanda.

Iyo ugenzuye n’ubushishozi ibikorwa byabo bigari batangije n’uko byakozwe, ntibyari bworohere Abanyarwanda kwakira mu mitima yabo ubutumwa bwiza bwa Yesu Kirisitu.

Kubera uburyo bwakoreshejwe hogezwa ubutumwa bwiza no gukurikira Yesu by’ukuri ahubwo abenshi bajyagamo kubera izi mpamvu.

Amahirwe bahaga ababaga bemeye kubayoboka arimo kubona amashuri, kwivuza, impano n’ibindi byatumwe bamwe babakurikira buhumyi atari uko bumvise ubutumwa bwiza ahubwo kubera ibyo bagiye bakurikiye mu gihiriri no kuba nta kundi babigenza, bahitamo kwibera abapagani bo mu rusengero.

Ku itariki 3 Ugushyingo 1959 muri Politiki y’u Rwanda hajemo ikibazo cyo kwanga Abatutsi urunuka bamwe batangira no kwicwa abandi barahunga; ibi byarakomeje biza kubyara Jenoside yakorewe Abatutsi mu 1994.

Iyo ngengabitekerezo yo kwanga Abatutsi yagiye ikwira buhoro buhoro mu Banyarwanda igahemberwa n’ibikorwa bya politiki n’iyobokamana.

Nk’uko byagiye byerekanywa n’inkiko zo mu gihugu no hanze y’u Rwanda, zerekanye ko igihe hicwaga Abatutsi, hari abihayimana bishoye mu bikorwa byo kwanga Abatutsi ndetse bagafatanya n’interahamwe n’impuzamugambi kubica. Urugero ni i Nyange muri Diyoseze ya Nyundo n’ahandi.

Uretse Kiliziya Gatolika, no mu yandi madini bamwe mu bahagararaga imbere y’abakirisitu babwiriza, bafashe iya mbere mu kwica. Uyu munsi hamwe mu hahoze insengero na Kiliziya habaye inzibutso.

Ubu ikibazo buri wese yibaza ni ukumenya impamvu igihugu nk’u Rwanda rwabarirwagamo abakirisitu bagera kuri 90% byashobotse ko batakaza ubumuntu, amahoro, urukundo n’ubuvandimwe bigatuma Jenoside yakorewe Abatutsi ishoboka.

Bamwe mu bakoze Jenoside barahanwe abandi baracyidegembya mu mahanga, igitangaje kugeza ubu ni uko amwe mu madini yitwara muri iki kibazo nk’umutu ugenda hejuru y’amagi ngo atameneka.

Icyakora twibuke ko mu bayoboke n’abayobozi b’amatorero hari ababaye intangarugero mu kwanga ikibi no kurwanya ubwicanyi bwakorerwaga Abatutsi mu 1994.

Nyuma ya Jenoside yakorewe Abatutsi mu 1994, abakirisitu benshi bazinutswe amadini basengeragamo mbere kubera nta ruhare rufatika yigeze agaragaza mu guhagarika Jenoside ahubwo bamwe bishoye mu bikorwa byayo.

Muri icyo gihe hari Abanyarwanda benshi cyane bari batahutse bava mu mahanga, bari bafite uburyo basengaga, bamwe bahita bashinga amatorero menshi bashaka gukora impinduka mu gihugu no mu miryango yashegejwe na Jenoside.

Uburyo bwakoreshejwe bashinga aya madini na bwo ntabwo butandukanye cyane n’ubwakoreshejwe n’abamisiyoneri bera mu 1900 kuko abenshi inyigisho bari bafite zari zishingiye ku gucuranwa abayoboke no kubashakamo indonke bidatandukanye n’abakora ubushabitsi. Ibi nabyo byagiye bibyara ibibazo bikomeye byatumwe amwe mu matorero yashinzwe icyo gihe asenyuka.

Nk’uko bigaragazwa n’Urwego rw’Imiyoborere mu Rwanda (RGB) ari na rwo rwandika amadini n’amatorero yemewe gukorera mu Rwanda, kuva mu 1962 kugeza mu 2012 habarurwaga amadini n’amatorero abarirwa mu 180, nyamara nyuma y’uko iki kigo gitangiye kuyandika kugeza ubu harabarurwa arenga 1500 hatabariwemo amwe akorera mu bwihisho.

Nubwo nta wakwiyibagiza umusanzu ukomeye amadini agira mu iterambere ry’igihugu nko kubaka amashuri, amavuriro n’ibindi, ntitwabura kuvuga ko yatsinzwe guhuza ubuzima busanzwe n’ibyanditswe muri Bibiliya n’ibindi bitabo byera bigisha. Ntacyo byaba bimaze igihe twaba dufite imibare iri hejuru ya 98% by’abayoboke b’amadini ariko badahuza ibyo bigisha n’ubuzima babaho bwa buri munsi.

Ibyanditswe muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .