00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda ruzakomeza gufungurira amarembo impunzi n’abimukira - Busingye

Yanditswe na Johnston Busingye
Kuya 15 September 2022 saa 08:44
Yasuwe :

Ubwanditsi: Ibikubiye muri iyi nyandiko ni ibitekerezo bya Johnston Busingye, Ambasaderi w’u Rwanda mu Bwongereza. Yigeze kuba Minisitiri w’Ubutabera w’u Rwanda ndetse n’Intumwa Nkuru ya Leta mbere yo kwinjira muri dipolomasi. Iyi nyandiko yayinyujije muri The Eastafrican mu rurimi rw’Icyongereza.

Ubucamanza bukomeje gusuzuma iby’ubufatanye bw’u Rwanda n’u Bwongereza mu bijyanye no gukemura ikibazo cy’abimukira. Hagati aho ukwezi kwa Nzeri kwibutsa ko uyu ari umwaka wa gatatu indege ya mbere igejeje mu Rwanda impunzi n’abasaba ubuhungiro baturutse muri Libya.

Ayo masezerano yashyizweho umukono mu 2019 hagati ya Guverinoma y’u Rwanda, Ishami ry’Umuryango w’Abibumbye ryita ku Mpunzi, UNHCR na Afurika Yunze Ubumwe, yatumye kugeza ubu abantu 1075 b’abanyantege nke bari barafungiranywe ahantu hashyira ubuzima bwabo mu kaga muri Libya bagezwa mu Rwanda aho bafite umutekano n’umudendezo byuzuye.

Ishuri ricumbikira abanyeshuri

Muri Nzeri 2021, Ishuri ryigisha iby’imiyoborere ryo muri Afghanistan, ishuri rukumbi ryakira abakobwa biga bacumbikiwe muri iki gihugu, mu buryo bwihuse ryimuriye abakozi baryo n’abanyeshuri 250 mu Rwanda rikomeza ibikorwa byaryo i Kigali.

Shabana Basij-Rasikh washinze iri shuri, ubwo yitabiraga ihuriro ry’abagore bo mu muryango wa Commonwealth muri Kamena uyu mwaka, yagize ati “ Mu by’ukuri turashimira ubupfura bw’u Rwanda n’Abanyarwanda batwakiriye ubwo Aba-Taliban bigaruriraga Afghanistan.”

Kuva mu 1996 gukomeza, u Rwanda rwakiriye impunzi zigera ku 76.530 zivuye muri Repubulika Iharanira Demokarasi ya Congo, igihugu gihana imbibi n’u Rwanda bitewe n’umutekano muke mu bihe bitandukanye muri iki gihugu.

Ku bufatanye na UNHCR twafashije izi mpunzi kubona aho zitura mu mutekano ndetse zibona n’ibindi bizifasha mu buzima bwa buri munsi.

Kugeza ubu u Rwanda rucumbikiye impunzi n’abasaba ubuhungiro barenga ibihumbi 130 bose bakiriwe hashingiwe ku biteganywa n’mategeko mpuzamahanga.

Abo bose bashaka ubuhungiro mu Rwanda bafite amahirwe angana n’abenegihugu mu by’imibereho yabo. Bafite uburenganzira ku burezi, barareshya imbere y’amategeko, uburenganzira ku murimo na serivisi z’ubuvuzi n’ibindi.

Amateka y’umwijima

Politiki z’igihugu zifite umuzi ku mateka ababaje twanyuzemo. Imyaka 28 irashize Jenoside yakorewe Abatutsi itwaye ubuzima bw’abarenga miliyoni ndetse igasiga ishegeshe sosiyete yacu. Ariko u Rwanda rwabohowe iminyururu y’ubutagondwa bushingiye ku moko, ihezwa n’itotezwa ruhinduka ishyanga rishya.

Abanyarwanda bahanye igihango na guverinoma yabo na bo ubwabo biyemeza kuba umwe.

Abayobozi b’u Rwanda rushya bubatse sosiyete idaheza aho Abanyarwanda bose n’abaturarwanda bareshya imbere y’amategeko, bagacungirwa umutekano kimwe kandi bakabona ibibafasha mu buryo bungana. Gahunda yacu yo gufungurira amarembo impunzi ikomoka kuri uwo mugambi udatsikira.

Baba ababikeneye bava muri Libiya, Afghanistan, RDC, u Burundi cyangwa mu Bwongereza, u Rwanda ruzakira na yombi abashaka ubuhungiro bose kandi rufite ubushake bwo kubagarurira icyizere, kubaha ahandi bafata nko mu rugo n’amahirwe yo kongera kubaho muri sosiyete no gutanga umusanzu mu kuyubaka.

Igishya cyangwa ikidasanzwe

Nta kintu gishya cyangwa kidasanzwe mu kuba abimukira bavuye mu Bwongereza cyangwa ahandi bakwemererwa koherezwa mu Rwanda.Tumaze imyaka tubikora mu buryo buhamye, budashidikanywaho kandi duhora tubivugurura.

Ubushake bw’u Rwanda n’ubumuntu bwarwo mu gutabara mu bibazo by’impunzi mu maso y’amahanga nta kizabikoma mu nkokora. Tuzakomeza gukorana n’Umuryango w’Abibumbye n’ibindi bihugu harimo u Bwongereza, tugira uruhare mu gushaka ibisubizo.

Ibikubiye muri iyi nkuru ni ibitekerezo bya Johnston Busingye, Ambasaderi w’u Rwanda mu Bwongereza.

Mu bihe bitandukanye abimukira n'abasaba ubuhungiro baturutse muri Libya bagejejwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .