Sena ya Amerika ikwiye kumenya ko Ingabire uticuza yari mu buyobozi bw’imitwe y’iterabwoba

Yanditswe na Albert Rudatsimburwa
Kuya 27 Gicurasi 2020 saa 01:12
Yasuwe :
0 0

Victoire Ingabire akomeje kuririra ku kutamenya k’umupasiteri wo muri Leta Zunze Ubumwe za Amerika, Innocent Justine, utuye muri Leta ya North Carolina.

Mu ibaruwa ye ku wa 18 Gicurasi 2020 yandikiye “Komisiyo ya Sena ishinzwe Afurika na Gahunda Mpuzamahanga z’Ubuzima, igaragaza impungenge ku burenganzira bwa muntu", uyu mupasiteri wahawe amakuru atariyo yavuganiye iterabwoba abyita guteza imbere uburenganzira bwa muntu, bitewe n’uko yahisemo kwemera ibintu byose abwirwa n’uwahamijwe ibyaha utaricuza, wanze kwamagana Jenoside n’iterabwoba.

Kimwe na Kabuga Felicien wagize uruhare rukomeye muri Jenoside uheruka gufatwa; inkuru ya Ingabire ni nk’iy’umunyabyaha ushakishwa, uhora ahinduranya imyirondoro ye ngo arebe ko atafatwa.

Ubuzima bwose bwa Ingabire yabuhariye ibikorwa bitiza umurindi guhakana Jenoside no gushyigikira iterabwoba. Gusa ahari ntibitangaje mu gihe nawe ubwe yavutse mu muryango w’abagize uruhare muri Jenoside.

Mu 2009, nyina Thérèse Dusabe yahamijwe ibyaha adahari ku bwo kwica abagore mu Kigo Nderabuzima cya Butamwa, aho yakoraga nk’umuforomo.

Se Pascal Gakumba yari Burugumesitiri wa Komini Kibilira hagati ya 1994 na 1996, yashishikarizaga abantu muri komini ye kugira uruhare muri Jenoside. Yafunzwe kubera uruhare rwe muri Jenoside, hanyuma mu 2004 aza gupfa yiyahuye.

Mu 1995, Ingabire ubwe yari umwe mu bashinze RDLR (Rassemblement Démocratique pour la Libération du Rwanda) yari igizwe n’abo mu butegetsi bwagize uruhare muri Jenoside bari mu buhungiro muri Zaire (RDC y’ubu).

Yinjijwe muri RDLR na Lt Col Bahufite Juvenal wari Umuyobozi w’Ubutasi bwo hanze muri Leta yakoze Jenoside, wamubonyemo imari ikomeye idashobora guhita ihuzwa ako kanya na Jenoside nubwo umuryango we wayigizemo uruhare.

Muri icyo gihe bari mu bikorwa byo kwisuganya ngo bashoze intambara ku Rwanda, hanyuma “barangize akazi” ko gutsemba Abatutsi bari barabarokotse. Mu 1997, RDLR yahinduye izina iba PALIR (Partie pour la Libération du Rwanda) ifite umutwe wa gisirikare uyishamikiyeho witwa ALIR (Armes de Libération du Rwanda). Leta Zunze Ubumwe za Amerika zagaragaje ALIR nk’umutwe w’iterabwoba.

Kuva mu 1998, Ingabire yari ahagarariye uwo mutwe w’iterabwoba nubwo wari warahinduye izina kugira ngo uve mu gatebo k’abagize uruhare muri Jenoside, hanyuma wigaragaza nk’umutwe utavuga rumwe (opozisiyo) na Guverinoma y’u Rwanda.

Gusa ibi ntabwo byigeze bigenda neza. Muri Werurwe 1999, abarwanyi ba ALIR bishe ba mukerarugendo barindwi mu ishyamba rya Bwindi muri Uganda, riyigabanya na RDC.

Mu bapfuye harimo Abongereza bane, Abanyamerika babiri n’abaturage babiri ba Nouvelle-Zélande. Byatumye Isi ihanga ijisho ALIR nk’uko yabishakaga, bituma na none ihindura izina.

Itangazamakuru mpuzamahanga ryanditse cyane kuri ubwo bwicanyi bwa ba mukerarugendo, Minisiteri y’Ububanyi n’Amahanga ya Amerika ishyiriraho ALIR ibihano ndetse iyigaragaza nk’umutwe w’iterabwoba.

Ibihano bya Amerika byatumye biba ngombwa ko ALIR ihindura izina na none. Ku ya 1 Gicurasi 2002, ALIR ihinduka FDLR, mu gihe FOCA (Force Combattante Abacunguzi) yari umutwe wa gisirikare uyishamikiyeho.

Nta na kimwe cyagendaga kuri iri tsinda Ingabire yabarizwagamo. Bisa no kuva mu gicucucucu kimwe ujya mu kindi. FDLR yakomeje kubakira kuri ya nkomoko yubakiye kuri Jenoside.

Aho kugira ngo FDLR ihinduke burundu, muri Mata 2006 umuryango uyishamikiyeho witwa UFDR (United Democratic Forces of Rwanda) warashinzwe nyuma uza kugenda uhinduka buhoro buhoro, uba FDU-Inkingi (United Democratic Forces- Inkingi), Ingabire akiri umuyobozi. Ingabire yashatse abawujyamo barimo abarwanyi bo muri FDLR n’abandi bantu yakuye mu Rwanda.

Yabashije kwinjizamo abari abarwanyi bakomeye muri FDLR nka Lt Col Tharcisse Nditurende na Maj Vital Uwumuremyi. Ingabire yavuye i Burayi kugira ngo ahurire i Kinshasa n’abo babiri bari bavuye muri FDLR.

Ibi byaje kwemezwa n’amatike y’indege ya batatu bashinjwaga hamwe – byose byari ibimenyetso byabonywe ndetse bishyikirizwa ubushinjacyaha bw’u Rwanda nyuma yaho Polisi y’u Buholandi isakiye urugo rwe ruri mu Buholandi.

Umutangabuhamya Mujawayezu Specioze yabwiye Polisi y’u Buholandi ko yohereje amafaranga akoresheje Western Union kuri Maj Vital Uwumuremyi alias Dieudonné, ndetse ko yabikoze abisabwe na Ingabire.

Polisi y’u Buholandi yaje kuvumbura kandi inyandiko yitiriwe “24 Gashyantare” irimo ibyavugiwe mu nama nka gahunda yo kohereza abasirikare. Ingabire yemereye urukiko ko umukono we ariwo wagaragaye muri iyo nyandiko y’ibyavugiwe mu nama.

Nta kabuza ko imikoranire ishingiye ku mategeko y’inzego z’u Buholandi n’Ubushinjacyaha bw’u Rwanda, yabaye ingenzi cyane mu gukusanya ibimenyetso byafashije mu guhamya Ingabire ibyaha mu 2012.

Nyuma y’uko abayobozi basatse urugo rwe bakabona ko ibimenyetso bakusanyije bigize icyaha, umugabo wa Ingabire, Lin Muyizere, yagiye ku ruhande rwo kubyamagana, ajya mu itangazamakuru avuga ko Polisi y’u Buholandi yavogereye umuryango we.

Muri make, Ingabire ni umuterabwoba wigaragaza nk’umunyapolitiki. Yahawe imbabazi na Perezida mu 2018 ariko nyuma abeshya ko atigeze azisaba, nubwo yanditse ibaruwa isaba Perezida kubabarirwa ndetse imusezeranya ko atazasubira mu byaha yari yaragaragayemo, gusa yahise abirengaho ako kanya akimara kuva muri gereza ahawe imbabazi.

Kuki Pasiteri Innocent ahitamo kwizera umunyabyaha n’umubeshyi aho kuba Guverinoma y’u Rwanda, ashingiye ku ishusho y’ukuri y’iterambere ry’imibereho mu by’ukuri rirenze ibyo umuntu yakwiyumvisha?

Uyu mupasiteri ahari ntiyari azi neza abantu ari gukorana nabo abo aribo, ko ari kuyoborwa mu itsinda ry’abagizi ba nabi. Ni itsinda rimwe rimuha amakuru y’ibinyoma avuga, ko Kizito Mihigo yishwe.

Nk’uko imibare y’Ikigo gishinzwe ibarura mu Rwego rw’Ubuzima muri Leta Zunze Ubumwe za Amerika ibigaragaza, Abanyamerika 48344 biyahuye mu 2018, bingana n’impuzandengo y’uko abantu 10.9 mu bantu 100000 biyahura. Muri Leta atuyemo ya North Carolina yonyine, impfu 1362 zitewe no kwiyahura nizo zatangajwe mu 2016, aho ziri ku kigero cy’uko abagabo 44.2 mu 100000 biyahura, naho abagore bo bakaba 11.3 mu 100000.

Ariko Pasiteri asa n’utekereza ko u Rwanda rukwiye kuba ahari rutandukanye ndetse rukaba rutarangwamo n’ibikorwa byo kwiyahura, aho avuga ko kwiyahura mu Rwanda bitumvikana. Abanyarwanda bakifuje ko ariko byakabaye.

Gusa, kwiyahura birashoboka mu Rwanda kimwe no muri Amerika n’ahandi. Ubusabe bwa nyina wa Kizito Mihigo, mushiki we n’abandi bo mu muryango bwo gusaba abantu kudakoresha urupfu rubabaje rw’umwana we mu bikorwa birwanya Guverinoma, ntibwageze mu matwi y’intumva nka Ingabire, abo basangiye politiki ndetse n’ababashyigikiye b’abanyamahanga.

Igikorwa cyo kugerageza guhitana Ntirutwa

Ingabire ni umwe mu bakekwa mu gikorwa cyo kugerageza guhitana Theophile Ntirutwa, umwe mu bagize umutwe we w’iterabwoba FDU-Inkingi, mu ntangiriro z’uku kwezi ku wa 11 Gicurasi.

Pasiteri Innocent Justine wita abakwizabinyoma ba Ingabire ko ari “amakuru yizewe yaturutse mu bahirimbanira uburenganzira bw’ikiremwamuntu”, yavuze ko “itsinda ry’abicanyi” ryari ryoherejwe kugira ngo ryice Ntirutwa, “ryamwibeshyeho rikica” umuntu utari we ndetse ko nyuma y’aho arokotse ubwo bwicanyi, yahamagaye “polisi kugira ngo avuge ibyabaye”.

Ntihazwi ikibazo Ntirutwa ateye Guverinoma y’u Rwanda (nta nubwo azwi hanze y’umutwe abarizwamo) ku buryo byari gutuma ishaka ko yicwa.

Ikindi kandi, niba Guverinoma yarashakaga yo yicwa, kuki ubundi yari guhamagara polisi mu gihe yo n’Urwego rushinzwe Ubugenzacyaha (RIB), uyu mupasiteri avuga ko biri mu bo guverinoma yifashisha kugira ngo ishwanyuze abo muri opozisiyo bose.

Niba ibyo Pasiteri avuga ari ukuri, ni kuki Ntirutwa atari kugira ubwoba bwo kumenyesha polisi, ko abicanyi bari kuba bamenyeshejwe ko bahushije igipimo cyabo hanyuma bakagaruka kumukuraho?

Igisubizo gishoboka ni uko Ntirutwa atigeze atekereza ko ari Guverinoma yari iri kumuhiga. Hanyuma rero, ni nde washoboraga kuba ashaka ko yicwa?

Biracyateye urujijo uburyo Ingabire yari arimo kuvugana n’Ijwi rya Amerika asobanura neza uko igitero cyagenze na mbere y’uko n’ubuyobozi bumenya ko hari umugambi w’ubwicanyi wageragejwe i Rwamagana mu Burasirazuba bw’u Rwanda.

Ni gute Ingabire yabimenye mu gihe atari we Ntirutwa yahamagaye ubwo yatekerezaga ko ashobora kuba ari mu byago? Ikiganiro n’Ijwi rya Amerika mu gihe n’igitero cyari kikiri kuba, bimugira ahubwo umuntu wa mbere ukekwaho uruhare.

Ariko na none hari uwakwibaza ati, ni kuki Ingabire yaba ashaka kwica mugenzi we? Igisubizo kuri icyo kibazo gishingiye ku kindi gikorwa cyabaye mu ijoro ryo ku wa 3-4 Ukwakira 2019.

Muri iryo joro, abagizi ba nabi babarizwa muri RUD-Urunana, umutwe wa gisirikare ushamikiye kuri FDU-Inkingi, bagabye igitero mu Murenge wa Kinigi (mu karere ka Musanze, mu Majyaruguru y’u Rwanda ku mupaka w’u Rwanda na RDC) bica inzirakarengane 14 hanyuma bakomeretsa 18.

Batanu muri abo bagizi ba nabi bafashwe n’Ingabo z’u Rwanda zakurikiranye abo bicanyi. Hashize ukwezi icyo gitero kibaye, ku ya 3 Ugushyingo 2019, Ingabire wari wahangayitse yahise atangaza umutwe wa politiki mushya DALFA-Umurinzi (Development and Liberty for All), mu buryo bwo kwitandukanya n’abagabye igitero mu Kinigi (babarizwa mu mutwe wa gisirikare ushamikiye kuri FDU-Inkingi, ayobora).

Mu Ukuboza 2018, Raporo y’Umuryango w’Abibumbye kuri Congo yemeje uwo mutwe w’iterabwoba mu igize ihuriro rya “P5” rirwanya Guverinoma y’u Rwanda.

Nyuma y’icyo gitero cyo mu Kinigi, Ingabire yari acyitaba (kandi yakomeje) Urwego rw’Igihugu rw’Ubugenzacyaga mu iperereza ryabwo.

Ntirutwa ni umuntu ubitse amabanga menshi ya Ingabire, harimo n’isano ye n’igitero cyo mu Kinigi. Ubwisanzure bwe ni nk’aho buri mu biganza bya Ntirutwa, impamvu ikomeye yatuma agira uruhare mu kuba ubuzima bwe bwagerwa amajanja.

Ikindi gisobanuro gishoboka cyo kuba Ntirutwa yahamagara inzego z’ubuyobozi ni uko we na Ingabire bari bamaze iminsi begera Pasiteri Theoneste Bapfakurera wishwe, bashaka kumwinjiza mu mutwe wabo w’iterabwoba.

Yarabyanze avuga ko ufitanye isano n’ibikorwa by’iterabwoba birimo n’igitero cyo mu Kinigi. Ku bw’ibyo rero, umuhate wa Ingabire wo guhamagara Ijwi rya Amerika na Ntirutwa agahamagara inzego z’ubuyobozi mu gihe ubwicanyi bwari burimo gukorwa, bombi bumvaga ko iperereza rizabafata nk’abatangabuhamya aho kuba abakekwa.

Niba Pasiteri Justine ashishijajwe n’ibijyanye n’ubutabera, yari akwiye gutekereza ku nzirakarengane 14 zishwe n’umutwe w’iterabwoba wa Ingabire n’abandi 18 bakomeretse bikomeye.

Abo nibo bantu yagakwiye kuba abwira Sena ya Leta Zunze Ubumwe za Amerika no kuyibutsa ko Ingabire ari mu mitwe Minisiteri y’Ububanyi n’Amahanga ya Leta Zunze Ubumwe za Amerika yagaragaje nk’iy’iterabwoba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .