Ruswa mu kazi, ikibazo ku rubyiruko

Yanditswe na Muhonzire Sylvine
Kuya 9 Ukuboza 2020 saa 07:00
Yasuwe :
0 0

Tariki 9 Ukuboza ni umunsi mpuzamahanga wahariwe kurwanya ruswa ku isi hose. U Rwanda ruri mu bihugu biza ku isonga mu kurwanya ruswa ndetse n’akarengane n’ubwo hatabura hake igenda igaragara. Urubyiruko ruri mu bibasirwa cyane n’ingaruka za ruswa, ahanini kubera ubushobozi buke ndetse n’igitutu cyo gushaka kugera ku iterambere bakiri bato.

Urubyiruko rwinshi ruhangayikishijwe no gushaka imibereho, bamwe bakora iyo bwabaga ngo babone akazi abandi baharanira kwikorera, ariko rimwe na rimwe bakazitirwa n’abagakwiye kubafasha kugera ku nzozi zabo babaka ruswa zitandukanye zirimo ishingiye ku gitsina cyangwa amafaranga y’umurengera kugira ngo bahabwe akazi cyangwa bakorerwe serivisi basaba.

Ibyo urubyiruko ruhura nabyo

Urubyiruko rukunda kwibasirwa ni abakobwa aho usanga batinya no gutera intambwe cyangwa se baracitse intege mu bijyanye no gushaka akazi, kubera ubwoba bw’uko basabwa ruswa ishingiye ku gitsina kenshi yakwa mu buryo butaziguye.

Amwe mu mayeri akoreshwa n’abaka ruswa ishingiye ku gitsina harimo gusaba ko yabonana n’uwo ayaka amubwira ko bagiye kuganira ku bijyanye n’akazi, rimwe na rimwe akamusaba ko bahurira nko muri hoteli cyangwa ahandi ahantu hiherereye, kumusaba ko baba inshuti, cyangwa se akamusaba kumusura, gutembera n’ibindi.

Hari n’ahandi usanga batanga amafaranga kugira ngo babone akazi. Ayo mafaranga akenshi aba anaruta umushahara w’ukwezi usaba akazi azajya ahembwa. Muri iyi minsi, hadutse intero igira iti ‘ntabwo wakunguka utashoye’. Bishatse kuvuga ko utapfa kubona akazi nta kintu watanze. Akenshi iyo udatanze aya mafaranga, uwaka ruswa avuga ko hari ubundi buryo byacamo akazi ukakabona: Ubwo buryo nta bundi, ni ruswa ishingiye ku gitsina.

Raporo ya Transparency International Rwanda yarabigaragaje mu 2018

Muri raporo y’ Umuryango utegamiye kuri leta ‘Transaparency International Rwanda’ urwanya ruswa n’akarengane yo mu 2018, igaragaza ko ruswa mu mitangire y’akazi cyane cyane ishingiye ku gistina iriho mu Rwanda kandi izwi n’abantu ku rugero rwa 94,3%, nubwo bikigoye kumenya niba koko iyi ruswa iba yabayeho kuko nta bimenyetso bifatika igira.

50% by’abakwa iyi ruswa bayakwa n’abayobora ibigo bitandukanye ndetse n’abari mu myanya yo hejuru mu kazi, kuko aribo batanga akazi kandi uwakwa ruswa aba agakeneye cyane. Ibi rero bituma bamwe bayitanga kuko nta yandi mahitamo baba bafite, ariko hari n’abahitamo kureka ako kazi.

N’ubwo iyo ruswa ibaho kandi ikaba izwi ntibyorohera abayisabwa kuyigaragaza kubera impamvu zitandukanye harimo kutamenya inzego baregera, kubura ibimenyetso bihagije, gutinya ko bagirirwa nabi mu gihe babivuze, n’ibindi. Muri iyo raporo bagaragaza ko 52% ari abatinya ko bagirirwa nabi.

Ibi byose ntibikunze kuvugwaho cyane nyamara biri mu bibangamiye iterambere ry’igihugu kuko bituma bamwe mu bahabwa akazi baba batagashoboye bityo umusaruro uva muri serivisi zitangwa n’abakozi ukaba utajyanye n’uwari uteganyijwe.

Mu nkuru ya The New Times, bavuga ko ubwo iyi raporo yerekanwaga ku mugaragaro, Umugenzuzi Mukuru w’Ihame ry’Uburinganire, Rose Rwabuhihi, yavuze ko abantu bafata iyi ruswa nk’imikino kandi ari ikibazo gihangayikishije. Yahamagariye Leta n’abanyarwanda muri rusange kugira icyo bakora mbere y’uko ifata indi ntera.

Yagize ati “Ruswa ishingiye ku gitsina ikunda kurenzwa amaso. Iyo umuntu yafunzwe azira indi ruswa, ubona abantu benshi barakajwe n’uwafashe iyo ruswa. Ariko turatunguwe kandi tunababajwe n’ukuntu ruswa ishingiye ku gitsina ifatwa nk’imikino. Icyo wita imikino ni ukubahuka no gusenya igihugu ndetse n’uwayatswe.”

Ubwo iyi raporo yashyirwaga ahagaragara, Umuyobozi wa Transparency International Rwanda, Ingabire Marie Immaculée, yavuze ko igikenewe mbere ya byose ari ubukangurambaga, ariko n’ufatiwe muri icyo cyaha agahanwa bikomeye.

Ati “Uwo ariwe wese uzahamwa n’iki cyaha agomba guhanwa bikomeye. Ubu ntibirahabwa uburemere bukwiriye, igikorwa gusa ni ugufata uwahamwe n’iki cyaha bakamujyana gukorera ahandi. Ibi rero ni ugufata icyaha ukacyohereza ahandi hantu. Dukeneye ubukangurambaga bukomeye n’ubusabe bw’uko iki cyaha cyafatwa nk’izindi ruswa”.

Icyakorwa

N’ubwo Transparency International Rwanda yagiye igaragaza kenshi ko iyi ruswa ihangayikishije n’ubu iracyagaragara mu kazi hirya no hino mu gihugu. Bivuze ko hagikenewe ubukangurambaga bwimbitse, ndetse iyi ruswa igahabwa uburemere kugira ngo igabanuke, izanacike burundu kuko ibangamiye iterambere ry’igihugu muri rusange.

Buri munyarwanda wese agomba kubigira ibye, kuva ku muntu uyaka, uyakira kugeza no k’utekereza ko itamukoraho. Hagashyirwaho igenzura n’ibihano bikarishye mu nzego za leta ndetse n’izigenga kugira ngo n’utekereza kuyaka abitinye bitume n’imitangire y’akazi igende neza.

Ruswa y’igitsina ni imwe mu iteye ikibazo mu rubyiruko ndetse ibuza benshi amahirwe mu kazi no mu bindi bikorwa bibaganisha ku iterambere / Ifoto: The Accelerator Magazine

Ubwanditsi: Ibikubiye muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .