00:00:00 IGIHE NETWORK KN KINYARWANDA EN ENGLISH FR FRANCAIS

Ntituragera aho twifuza mu kurandura ihohoterwa rishingiye ku gitsina

Yanditswe na Mukabalisa Germaine
Kuya 17 August 2023 saa 11:41
Yasuwe :

UBWANDITSI: Ibikubiye muri iyi nyandiko ni ibitekerezo bwite bya Depite mu Nteko Ishinga Amategeko y’u Rwanda, Germaine Mukabalisa.

Leta y’u Rwanda yateye intambwe ifatika mu kurinda uburenganzira bw’abagore ndetse ikomeje kugenzura no kuziba icyuho kiri mu bijyanye n’amategeko.

Intambwe y’ingenzi muri uru rugendo yagezweho mu 2023 ubwo u Rwanda rwasinyaga amasezerano mpuzamahanga yo kurwanya akarengane n’ihohoterwa, yitsa ku muhate w’igihugu wo gukomeza guharanira uburenganzira bw’abagore no kubarinda ubwoko bw’ivangura n’ihohoterwa rishobora kubibasira.

Amasezerano yo kurwanya akarengane n’ihohoterwa yashyizweho mu 2019, ariko hari ingingo zimwe na zimwe zitari mu mategeko y’u Rwanda agenga uburyo bwo kurinda Abanyarwandakazi kugeza n’aho bakorera.

Izo ngingo zisobanura ivangura n’ihohoterwa rikorewe mu kazi nk’imyitwarire idakwiye, ibi birimo ihohoterwa ndetse n’ibikangisho by’ubwoko butandukanye bishobora kuganisha ku gukomeretsa ku mubiri, ihungabana mu by’imitekerereze, ihohoterwa rishingiye ku gitsina no gutsikamirwa mu by’ubukungu.

Birumvikana ko uku kurindwa kugomba kubaho ku bagore bose kuva ku bimenyereza umwuga, abakorerabushake, abakozi n’abakoresha mu nzego zose zaba iza Leta n’izigenga.

Ubu buryo buboneye bufasha mu guharanira ko abantu barindwa ubwoko bwose bw’ihohoterwa n’ivangura bitari mu kazi gusa ahubwo no mu yindi mirimo isanzwe cyangwa ahandi hantu.

Kwemeza ishyirwa mu bikorwa ry’aya masezerano ni intambwe y’ingenzi, ariko yo ubwayo ntihagije.

Guverinoma y’u Rwanda igomba gukorana n’abafatanyabikorwa bose mu gufata inshingano zizatuma izo ngingo zishyirwa mu bikorwa nk’uko byagenwe.

Ibi bikeneye ko birenga kwigisha abaturage ahubwo hakanashyirwaho ingamba zikwiye mu kazi zifasha abakozi gutanga amakuru badafite impungenge ko bashobora kwihimurwaho n’abakoresha babo bakaba banabirukana.

Kubakira abagore ubushobozi ni urugendo rukomeza. Amasezerano aheruka gushyirwaho umukono ku kurwanya akarengane n’ihohoterwa byerekana umuhate washyizwe mu kuziba icyuho kiri mu mategeko ariko aho tugana ntiturahagera.

Dukeneye kugabanya icyuho mu bijyanye n’umushahara

Imwe mu mbogamizi ikomeye u Rwanda rugihura na yo ni ijyanye n’icyuho kiri mu mishahara hagati y’abagabo n’abagore ndetse hari aho cyabaye nk’ihame risanzwe.

Igishimishije ni uko ibigo bimwe na bimwe nka Banki y’u Rwanda y’Iterambere (BRD) yafashe iya mbere mu gukemura iki kibazo.

Nyuma yo gukora igenzura rigaragaza icyuho kiri mu bijyanye n’imishahara, BRD yasanze abagore bari mu nzego z’ubuyobozi bahembwa umushahara uri munsi w’uhabwa abagabo ho 17% kandi bafite inshingano zimwe. Ibi ahanini bishingira ku biganiro bikorwa mu gihe cyo kwiga ku mushahara bazahabwa.

Ab’intyoza mu kuganira ku mushahara, bakunze kuba ari abagabo, ni bo usanga bahabwa imishahara yo hejuru kurusha abagore babigendamo gake. Mu kugabanya ubu busumbane, BRD yahisemo gukura ibijyanye no kuganira ku mushahara mu bijyanye no gushaka abakozi bashya.

Imigirire ya BRD yerekana umurava w’Abanyarwanda mu gukurano akarengano kaboneka mu kazi ahanini gashingiye ku kumva nabi ihame ry’uburinganire n’ubwuzuzanye.

Nubwo bimeze bityo, urugendo rugana ku kubahiriza ihame ry’uburinganire n’ubwuzuzanye rurakomeza ndetse rusaba kwiyemeza kwa Guverinoma y’u Rwanda n’umuryango Nyarwanda mu gukuraho icyuho kigihari.

Amasezerano aheruka gushyirwaho umukono ku karengane n’ihohoterwa yerekana indi ntambwe ikomeye mu rugendo u Rwanda rurimo rwo guharanira kugera ku buringanire bwuzuye.

U Rwanda kandi rukomeje gushyira imbaraga mu kubaka sosiyete idaheza aho uburenganzira bwa buri mugore bwubahwa ndetse akarindwa muri buri ntambwe ateye mu buzima bwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .