00:00:00 IGIHE NETWORK KN KINYARWANDA EN ENGLISH FR FRANCAIS

Mbese wumva kimwe nanjye igisobanuro gikunze kugibwaho impaka cyo ‘‘gukunda igihugu’’?

Yanditswe na Kwezi Jean
Kuya 25 Nyakanga 2021 saa 03:07
Yasuwe :
0 0

Ubwo imyanzuro y’Inama y’Abaminisitiri yo ku wa 14 Nyakanga 2021 yasohokaga dore ko twari tuyitegerezanyije amatsiko menshi kuko iba irimo ibyemezo ku buzima bw’igihugu cyane muri iki gihe gihanganye na Covid-19, nari nicaye ndi gutekereza ku ijambo benshi dukunze kumva cyangwa kubwirwa ryo “Gukunda igihugu’’.

Nk’umuhanzi buri kimwe cyose mfasheho umwanya birangira mfashe mudasobwa yanjye cyangwa agakayi n’ikaramu nkandika.

Kimwe mu byanshimishje ni uko imyanzuro yasohotse nari maze kwandika igitekerezo cyanjye kuri iyi ngingo yo gukunda igihugu nkaza gutungurwa no kubona Leta yashyizeho Minisiteri nshya izaba ifite inshingano z’ubumwe bw’Abanyarwanda no kwigisha uburere mboneragihugu.

Nashimishijwe no kuba rwose iyi minisiteri yaragiyeho, ku bwanjye yakabaye yaratangiranye n’igihe Inkotanyi zari zishoje urugamba rwo mu 1994 rwo guhagarika Jenoside yakorewe Abatutsi no kubohora Abanyarwanda. Sinabyakiriye nabi kuko nibutse wa mugani ugira uti “inkono ihira igihe’’.

Mbere y’uko mvuga ku gukunda igihugu reka mbanze mvuge ku gihugu nk’u Rwanda kiri ku buso bwa kilometero kare 26.338, igihugu kigizwe n’abaturage barimo kurenga miliyoni cumi n’ebyiri, igihugu kigizwe n’ibibaya, imisozi n’utununga benshi bakunze kwita icy’imisozi igihumbi. Njye nongeraho nti "n’imishinga n’ibikorwa by’iterambere igihumbi buri uko umwaka utashye".

Reka nkuratire iki gihugu kiri muri Afurika y’Iburasirazuba gifite ibibereye amaso bitandukanye kuva ku baturage bacyo beza kugeza ku bindi binyabuzima n’ibidukikije uhereye mu Burasirazuba aho dusanga Pariki y’Akagera icumbikiye inyamaswa nini n’intoya zose zifite icyizere cyo kuramba no kuramuka.

Mu Majyaruguru yacyo hari Pariki y’Ibirunga, irimo ingagi zo mu misozi miremire zisigaye hake ku Isi. Mu Burengerazuba bwacyo hari akazuba karengera hejuru y’Ikiyaga cya Kivu maze amahumbezi yacyo akaba yakuvura amavunane. Ntuzabure gukomeza uwo muhora w’isunzu rya Congo Nil wirebera ibyiza bitatse u Rwanda.

Nunyarukira mu Majyepfo ntuzabure gusura ibyiza bitatse Pariki ya Nyungwe birimo inkende, inyoni z’amoko yose n’utundi tunyamaswa duto dushimishije. Ntukarenze ikirenge inzu Ndangamuco y’Amateka iri i Huye. Reka ngusabe rwose uzihangane usure mu Rukari-Nyanza habumbatiye amateka y’ubwami kuva kuri Gihanga Ngomijana se wa Kanyarwanda. Nubishaka uzirirwe i Kigali hari inzu Ndangamuco y’Ubuhanzi ahitwa Kanombe hakaba n’indi i Nyarugenge y’aho Richard Kandt, Umukoloni w’Umudage yakambitse.

Nibwira uzace akabogi muri urwo rujeje rw’amatara arara yaka, urare aho iwabo w’amagorofa akabakaba ku bicu, ihuriro ry’imico y’iyo n’ino. Ngukumbuje iwacu i Rwanda wowe utahaheruka cyangwa utarahagera, urakaza neza uzaza wisanga.

Ngaho reka twigarukire kuri cya gisobanuro cyo “gukunda igihugu’’. Nubwo igihugu kigizwe na bimwe navuze haruguru ariko ijambo gukunda igihugu ryumvwa neza n’ikinyabuzima muntu kuko ni cyo cyonyine gifite kumva, kuvuga, kureba, gutekereza maze kikaba cyashyira mu gaciro.

Iki kiremwa nicyo cyonyine haba mu buryo bwa siyansi n’umwuka gifite ubushobozi bwo kugena no kugenga ibindi binyabuzima n’ibikorwa byose biba ahantu hitwa igihugu.

Iki kiremwa muntu ni cyo cyonyine Imana (ku bayemera) yahaye imbaraga zo guhitamo kubaho uko kibishaka ndetse no kugena uko ibindi binyabuzima byabaho.

Maze gusesengura kamere muntu n’ubushobozi muntu afite nasanze ariwe ufite guhitamo gukunda cyangwa gukundwa, kwanga cyangwa kwangwa, kwica cyangwa gukiza.

Hamwe n’ibyo byose gukunda igihugu bisobanuye kuri njye mbere na mbere gukunda umuntu ari we muturage wacyo we wahawe kurengera ibindi binyabuzima bikigize.

Urukundo mu bantu rwimitswe rwasabagira rukagera kuri bya binyabuzima bindi twavuze cyane ko hari igihe tubyangiza tukaba nk’umwe w’umupfapfa utema ishami yicariye ryahanuka agashengukana naryo.

Gukunda u Rwanda bivuze mbere na mbere gukunda Umunyarwanda mugenzi wawe; nyuma ikibatsi cy’urwo rukundo kigasakara ku bindi binyabuzima twavuze bimukikije nkuko twabibonye bigengwa na we wahawe ubutware bwo kubikoresha no kubigenga.

Kenshi iyo bavuze ko umuntu yatakaje ubumuntu baba bakoze isesengura bagasanga ibikorwa bye bibangamiye bidasubirwaho uburenganzira bw’ikindi kiremwa muntu kugeza no ku bindi bimukikije. Abantu rero benshi bakunze gukoresha ijambo gukunda igihugu batabisobanura neza bagasa n’abahejeje abantu mu cyeragati bumva ko ubwo babakundisha igihugu nk’ahantu ku buso runaka haba ibikorwa runaka nubwo nabyo aribyo kandi ari byiza.

Bivuze ko abantu aba n’aba batuye ahantu runaka aribo baharema agaciro ko kwitwa igihugu cyiza cyangwa kibi. U Rwanda rero rwitwa igihugu cyiza kuko rutuwe n’abantu beza bitwa Abanyarwanda, aba ni cyo kirango nyacyo cy’agaciro k’iki gihugu bityo ni byiza ko bakomeza kwimika urukundo muri bo bazaraga ibindi binyejana ingoma ibihumbi ari nabyo bizatugira ishyanga ryiza rikomeye kandi ryubashywe ku Isi.

Kuko njye ndi umwemeramana nkagendera ku myemerere ya gikirisitu, ubwo Yesu yari abajijwe itegeko ryakurikizwa risumba ayandi yaravuze ati "dore itegeko risumba ayandi n’iri: Ukundishe Uwiteka Imana yawe umutima wawe wose n’ubugingo bwawe bwose n’ubwenge bwawe bwose. Irya kabiri, Ukunde mugenzi wawe nkuko wikunda (Matayo 22:37-39)’’.

Ndibanda kuri iri tegeko nsanisha n’intero nateruye yo gukunda igihugu, haba mu muryango iyo urukundo rwimitswe abawugize bakarugira, uwo muryango aho utuye hasakara amahoro. Urukundo rw’abanyagihugu buri wese akunda mugenzi we nkuko yikunda icyo gihugu cyarangwa n’ituze n’amahoro bityo kugikunda biba byikoze muri uwo mujyo wo gukundana umwe ku wundi.

Ndashishikariza Abanyarwanda urukundo buri wese akunda mugenzi we nkuko yikunda nta kabuza umujyo w’urwo rukundo ni wo musingi wo gukunda igihugu n’ibikirimo byose. Urukundo ruganze mu Banyarwanda maze rusage rugere ku bindi binyabuzima biri mu gihugu byose bigengwa na muntu warazwe gukunda kugeza ku bimukikije. Harakabaho ubumwe bw’Abanyarwanda buzuye urukundo kandi bakunda gakondo yabo.

Ibikubiye muri iyi nkuru ni igitekerezo bwite cy’umwanditsi, Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .