00:00:00 IGIHE NETWORK KN KINYARWANDA EN ENGLISH FR FRANCAIS

Kuki tutateza imbere imikino gakondo ikabangikana na mvamahanga?

Yanditswe na Mutangana Steven
Kuya 5 September 2022 saa 10:22
Yasuwe :

Ubwanditsi: Iki ni igitekerezo bwite cya Mutangana Steven, umusomyi wa IGIHE ukunze gutanga ibitekerezo ku ngingo zijyanye n’iterambere ry’umuco nyarwanda.

Guhera mu myaka ya 1920-1930, u Rwanda rwari rwarakoreweho igerageza ry’imikino y’umupira w’amaguru (Football). Imikino yari isanzwe ari gakondo yagiye ihigikwa igera aho yibagirana bigizwemo uruhare n’abakoroni.

Ibaruwa Padiri Louis Gilles wari i Nyanza yandikiye Musenyeri Durrieu ku wa 08 Ukuboza 1948 igaragaza ko kuri we, kwigarurira urubyiruko rw’u Rwanda kimwe n’urwa Congo bisaba kwifashisha siporo iminjirwamo inyigisho z’iyobokamana.

Mu myaka irenga 70 ishize, amateka ya Football agaragaza uko imikino gakondo yazahaye ikazima buhoro buhoro, mu buryo bwateguwe n’abakoroni nk’uko Thomas Riot yabyanditse mu bushakashatsi yise “Football et mobilisations identitaires au Rwanda: ethnohisoire d’une invention coloniale (1945-1959)”.

Ibaruwa ivuzwe haruguru iri mu ishyinguranyandiko ya Société des Missionnaires d’Afrique, ihamya umugambi wariho muri 1948. Muri icyo gihe mu Rwanda havutse ishyirahamwe ryitwa Association Sportive Au Rwanda (ASAR). Hakozwe ku buryo imitwe y’Intore zihamiriza yari isanzwe ari izingiro ry’umuco mu rubyiruko n’abakuru igenda ihindurwa amakipe ya Football buhoro buhoro, agashyigikirwa n’abakoroni ndetse n’abamisiyoneri. Itorero nk’urwego ryo ryari rimaze igihe riciwe n’abo bakoroni.

Abakoroni basanze imitwe y’Intore yari ipfundo ry’intekerezo nyarwanda, biga uko bazayica, Abanyarwanda bakazisanga mu ntekerezo mvamahanga zinjiriye mu kugorora umubiri, bikarangira ubwenge n’umutima byabo bigororokeye igikoroni.

Byarabakundiye kuko amakipe ya siporo yubatswe icyo gihe yagiye afata amazina y’iyo mitwe y’Intore, abakinnyi bakaririmba indirimbo zari zizwi mu mitwe y’Intore, ariko mu by’ukuri imikino yabafashaga kumenya no gukunda u Rwanda no kururengera yo yasenywe.

Imikino ya siporo mvamahanga yashinze imizi mu mashuri icyo gihe, cyane cyane ko yari ay’abakoroni, ikwira mu gihugu hose. Mu 1952, ASAR yari imaze gushinga amakipe 120 agizwe n’abanyamuryango ibihumbi bitatu.

Mu myaka mike yakurikiye ibaruwa twavuze haruguru, byoroheye abakoroni gukuraho burundu imikino gakondo, bafatanyije n’abahawe ubutegetsi kuri Repubulika ya mbere, ubwo ibyari bifitanye isano n’umuco nyarwanda byose byitiranyijwe n’ubwami bwari bumaze gukurwaho.

Imikino gakondo yajya mu bisubizo bivomwe mu muco

Agasigisigi k’iyo mikino gakondo kasigaranywe n’abari barahungiye mu mahanga guhera 1959. Nyuma ya Jenoside yakorewe Abatutsi mu 1994, umuco nyarwanda wongeye guhabwa icyicaro, unashingirwaho mu kwishakira ibisubizo by’ibibazo byari byugarije u Rwanda mu kugarura ubumwe bahoranye.

Hirya no hino mu gihugu imikino mvamahanga (Football, Golf, Basketball, Volleyball, Cricket, Tennis, Handball, Swimming, Karate, hamwe n’indi mikino iri muri Olympic games myinshi) yitabwaho muri siporo zigezweho kandi ishyirirwaho ibikorwaremezo n’ibikoresho byabugenewe mu makipe atandukanye, mu mashuri no mu mahuriro y’urubyiruko.

Siporo iri mu masomo atangwa mu mashuri, ifite n’amashami yihariye muri kaminuza. Ifite abayikora by’umwuga, ikagira n’uko ikorwa bya rusange. Hari inzego n’amategeko. Buri mukozi wa Leta akora siporo ku wa gatanu ku isaha yagenwe n’itegeko. Siporo yahindutse uruganda kuko biri mu bitanga imirimo myinshi n’inyungu mu bukungu. Ni byiza cyane, bikomereze aho.

Ku rundi ruhande ariko, uwazura imikino gakondo mu buryo butabangamiye siporo mvamahanga byagira inyungu mu buryo butandukanye. Mu nama nyunguranabitekerezo zabereye muri Village Urugwiro 1998-1999, hafashwe umurongo wo gushingira ku muco w’u Rwanda mu gushaka ibisubizo by’ibibazo byari byugarije Igihugu. Raporo y’Ishami ry’Umuryango w’Abibumbye ryita ku iterambere (UNDP) yo mu 2021 yagaragaje impinduka nziza ibyo bisubizo byazanye mu Banyarwanda b’ingeri zitandukanye.

Iyo Abanyarwanda bakoraga imikino ifitanye isano n’umuco wabo, bagororaga umubiri nk’uko no ku yindi mikino bayigorora, bakagira ubuzima bwiza. Ariko hari n’umwihariko bagiraga utasanga muri siporo mvamahanga. Intekerezo zabo zahabwaga umwanya, urubyiruko rukamenya Igihugu, uko rugomba kugikunda, kukirengera no kucyitangira.

Muri iyo mikino bashimangiraga ubumwe bubaranga n’uko bugomba kwimakazwa iteka. Indangagaciro z’ubutwari bazitozwaga hifashishijwe iyo mikino. Mu kuyitozwa hanavumburwaga izindi mpano ziranga umuyobozi mwiza. Abakuru twaganiriye bambwiye ko mu Itorero bamenyaga umuntu ufite n’impano y’uburebakure bakamwitaho ku buryo yashyirwaga aho izagirira akamaro Igihugu.

Kwita ku mikino ifitanye isano n’umuco mu Banyarwanda ntibyagorana kuko bidasaba ibya mirenge. Hari ibihugu byakoronijwe byayitayeho ku buryo bigira ibikorwaremezo n’ibikoresho byayo bigenewe abaturage muri rusange. Ibihugu biteye imbere byo ni yo byashyize ku rwego mpuzamahanga, irayobokwa.

Wakwibaza uti “Ese ubundi iyo mikino gakondo ni iyihe?”. Iyakorewe ubushakashatsi irakabakaba 40. Sinayirondora yose aha, gusa nakurangira igitabo cyanditswe n’Inteko Izirikana mu myaka ine ishize yise “Imikino n’Intwaro gakondo”. Yakomeza gukorerwa ubushakashatsi bwimbitse.

Ishobora gutegurwa igahuzwa n’igihe tugezemo, urubyiruko cyane cyane ururi mu mashuri n’abakuru bakayikina bakagorora ingingo n’intekerezo.

Gusimbuka urukiramende byari umwihariko ukomeye w'abanyarwanda bo hambere
Ikubuguzo ni imwe mu mikino yuje ubuhanga abanyarwanda bakinaga

Mutangana Steven
Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .