Kuki amasomero yakomeza kubamo ibitabo byanditswe mu ndimi z’amahanga kurusha Ikinyarwanda?

Yanditswe na Hategekimana Richard
Kuya 8 Nzeri 2020 saa 08:10
Yasuwe :
0 0

Mu mateka y’Isi, bigaragara ko ibihugu byagiye byihuta mu iterambere ry’ubukungu ndetse n’ Imiyoborere myiza bashingiye mu kwandika ibitabo biri mu rurimi rwabo kavukire ndetse n’izindi ndimi ariko cyane cyane baha agaciro ibitabo byanditswe mu rurimi rwabo gakondo.

Usanga amasomero y’ibyo bihugu arimo ibitabo hafi 80 ku ijana ari ibitabo byanditswe mu rurimi rwabo kavukire.

Iyo usuye amasomero atandukanye dufite haba amasomero yashinzwe n’Imiryango Nyarwanda Itari iya Leta, amasomero y’abikorera,ay’amadini n’ayandi yo mu bigo binyuranye ndetse n’ayandi yitwa "Community Libraries (Amasomero y’abaturage), usanga hafi 98 % hibereyemo ibitabo byanditswe mu rurimi rw’amahanga ahandi ukaburamo igitabo na kimwe cyanditswe mu Kinyarwanda kandi byitwa ko ari ibitabo baguriye abaturage ngo basome.

Inteko rusange y’Urugaga rw’Abanditsi mu Rwanda iherutse kubigarukaho, abanditsi b’u Rwanda bajya inama ko ibigo binyuranye bifite amasomero(Libraries) baharanira iteka kuzirikana ko ururimi rwacu arirwo shingiro,nirwo ruduhuza kandi ko umuco dusangiye ugomba kuturanga muri byose harimo n’ibigomba kuba bikubiye mu masomero(Libraries).

Ntabwo wagira abaturage barenga 90 % bavuga Ikinyarwanda, ngo mu bitabo ubazaniye gusoma ibisaga 90 % bibe ibyo mu ndimi z’amahanga zitavugwa n’abarenze 6 %. Ntabwo byaba bisobanutse.

U Rwanda ni ingobyi iduhetse twese,ururimi rwacu rugomba gukundwa, kurutishwa izindi ndimi.

Nigute twateza imbere umuco wo gusoma no kwandika mu baturage amasomero bahawe yuzuye ibitabo by’abanyamahanga gusa? abaturage bose ntibize izo ndimi z’amahanga, none ese ubwo ayo masomero yaba amariye iki igihugu?Kubera iki ingengo y’imari yagura gusa ibitabo by’amahanga ikigizayo ibitabo byanditswe mu Kinyarwanda?Abakoroni baje bavuga ko iby’iwacu ari "Ibishenzi", none se natwe tubyemere gutyo?

Abanditsi b’u Rwanda,bagaragaza ko biteguye gukomeza kwandikira u Rwanda, kwandika ibitabo birimo indangagaciro na Kirazira byubaka u Rwanda rwacu ndetse n’Afurika. Biteguye gukomeza kwandika mu rurimi rw’ikinyarwanda ndetse no mu zindi ndimi ariko cyane cyane bibanda ku rurimi rwabo.

Ni byiza ko amasomero yose ari mu Rwanda, Abanyarwanda bazajya bayagana ariko bagasangamo ibitabo biri mu rurimi bumva, basobanukiwe kandi baterwa ishema narwo.

Twese dukomeze guterwa ishema no kuvuga Ikinyarwanda kuruta izindi ndimi twize mvamahanga, dukunde kugura ibitabo byanditswe mu Kinyarwanda, amasomero yacu ajyemo ibitabo by’Ikinyarwanda.

Dukunde iby’iwacu bizadufasha gukomeza kuzirikana aho tuva,aho tugeze ndetse no kwihuta mu iterambere. Kirazira Kwibagirwa isoko!

Duce imigozi twaziritswe n’ubukoloni ituma dukomeza kumva ko iby’ahandi ari byiza kuruta iby’iwacu.

Hategekimana Richard
Perezida w’Urugaga rw’Abanditsi mu Rwanda.
E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .