00:00:00 IGIHE NETWORK KN KINYARWANDA EN ENGLISH FR FRANCAIS

Kubika abazima: Iturufu y’amaburakindi yitabazwa n’abarwanya Leta y’u Rwanda

Yanditswe na Musangwa Arthur
Kuya 19 April 2022 saa 07:34
Yasuwe :

Mu bihe bitandukanye kubika abantu batapfuye, ni imwe mu ntwaro yagiye ikoreshwa cyane n’abahanganye na FPR Inkotanyi cyangwa iyahoze ari RPA, kugeza n’aho uyu munsi tukibona ibisigisigi by’ibinyoma nk’ibi.

Mu minsi yashize Padiri Nahimana Thomas uri mu barwanya ubutegetsi bw’u Rwanda yagiye yumvikana avuga ko Perezida Kagame yapfuye.

Benshi mu bazi Padiri Nahimana Thomas, bamuzi nk’umugabo udahwitse, wuzuye urwango n’ubujiji agaragariza mu kugoreka amateka no guhimbahimba ibinyoma biyobya abantu, agakunda kubeshya kubi ku buryo ashobora kubika uwapfuye kandi Isi yose izi neza ko ari muzima.

Iki kinyoma Padiri Nahimana yamaze igihe akigenderaho, maze abo bahuje umugambi bagisamira hejuru. Byageze aho uyu mugabo wahoze ari Padiri muri Diyosezi ya Cyangugu ahamagara kuri telefoni Tito Rutaremara uri mu bagize Urwego Ngishwanama kugira ngo amubaze iby’ibi bihuha yari yatangiye gukwirakwiza.

Tito mu kumusubiza yagize ati “Ubwo se wabwiwe n’iki ko ntapfuye ko uhora uvuga ngo abantu bapfuye. Ntabwo nganira n’umupadiri uvuga ko abantu bapfuye batapfuye. Uvuga byinshi si wowe uherutse kuvuga ngo Kagame yarapfuye. Biriya ni ibyifuzo byawe uri nka ba bandi bajyaga guhamba imitumba ngo bari guhamba Rwigema.”

Nubwo kuri uwo munsi Padiri Nahimana yabwiwe na Tito Rutaremara ko Perezida Kagame ari muzima ndetse nta kibazo cy’ubuzima afite ntibyamubujije gukomeza gukwirakwiza ibyo bihuha.

Ku batazi Padiri Nahimana ni umugabo wabanje kuba Padiri muri Diyosezi ya Cyangugu ari na ho akomoka gusa aza guhagarikwa n’uwahoze ari Musenyeri wa Diyosezi yayo, Jean Damascène Bimenyimana. Nta kindi Nahimana yari buzire kitari imyitwarire mibi, irimo kunyereza umutungo ndetse no kubiba amacakubiri mu Rwanda.

Nyuma yo gushoberwa, Nahimana yahisemo kwerekeza mu mahanga, maze agezeyo, nk’uko bimaze kumenyerwa ku bandi bafite imyumvire nk’iye, atangira kuvuga ko buryo bwose mu Rwanda nta kigenda, abahari nta mahoro bafite, ubukene n’ubwicanyi ari byo bibaranga kandi igice kimwe cy’abaturage cyahejwe mu iterambere n’imiyoborere by’igihugu.

Nahimana yaje gushinga Ishyaka yise ‘Ishema ry’u Rwanda’, ndetse mu 2016 aca igikuba avuga ko azaza i Kigali kwiyamamariza kuyobora igihugu mu matora ya Perezida yari buzabeho umwaka ukurikiyeho, n’ubwo bitamukundiye.

Ibyo bimaze kumupfubana, uyu mugabo yavuze ko ashinze Leta ikorera mu buhungiro, ndetse anashyiraho abaminisitiri 14, gusa amakuru y’iyo Leta ya baringa yarangiriye aho. Nta gikorwa na kimwe irakora gifatika.

Amaze kuburanirwa, Nahimana yasubiye mu Bufaransa akomeza amagambo ye y’urwango n’ibikorwa by’amacakubiri, n’ubwo abamuzi bavuga ko ntacyo bimumariye kuko n’ubundi ari umugabo ubayeho mu buzima bugoye, aho akura amaramuko ku nkunga ya Leta y’u Bufaransa igenewe abatishoboye.

Avoma ku isoko ya Leta ya Habyarimana

Kubika abayobozi b’u Rwanda bikorwa uyu munsi na Nahimana na bagenzi be, umuntu yavuga ko ari umuco mubi ufite amateka muri Leta ya Habyarimana kuko yagiye iwifashisha kenshi mu guca igikuba no kwirema agatima.

Mu 1991 ubwo RPA yari mu rugamba rwo kubohora u Rwanda, Leta ya Habyarimana yagiye ibika abayobozi bayo yifashishije icyahoze ari Ikigo cy’Igihugu cy’Itangazamakuru, ORINFOR.

Mu bamenyekanye cyane muri ibi bikorwa harimo umunyamakuru Ferdinand Nahimana wakoreye Radio Rwanda na RTLM.

Tariki 17 Gashyantare 1992, Radio Rwanda yavuze ko Umugaba w’Ingabo za RPA, Maj Paul Kagame yaguye ku rugamba. Uretse we kandi iyi radiyo yanabitse Rtd Gen Sam Kaka icyo gihe wari ufite ipeti rya Major ndetse na nyakwigendera Capt Kayitare.

Ni amakuru yaciye igikuba maze ibinyamakuru bitandukanye byaba ibyo mu Rwanda n’ibyo mu mahanga bifata umwanzuro wo gusura aho abasirikare ba RPA bari ku rugamba kugira ngo byimenyere niba ayo makuru ari impamo koko.

Ku wa 5 Nyakanga 1992, Ikinyamakuru Kanguka cyakoreraga i Kigali cyabashije kugera mu gice cyayoborwaga na FPR, maze kigirana ikiganiro Maj Sam Kaka.

Amubaza ku bijyanye n’urupfu rwe, umunyamakuru wa Kanguka yagize ati “ Radiyo Rwanda yigeze kuvuga ko wapfuye kuba atari byo byo ndabibona, ariko se nta nubwo yenda bigeze bakurasa cyangwa ngo urware urembe bahere aho bavuga ko wapfuye?”

Kaka mu gusubiza yavuze ko uretse no kurwara kuva intambara yatangira ataranakomereka. Ati “Ni byo koko Radiyo Rwanda yigeze kuvuga ko napfuye, ariko dore nta n’igikomere mfite ku mubiri kandi rero kuva intambara yatangira sindanarwara. Biriya turabimenyereye, nta gihe batatwishe ku munwa haba muri iyi ntambara cyangwa se no mu zindi ni uburyo bwo guha morali abasirikare babo no guca intege abadukunda”.

Uretse iyi mpamvu, Kaka yavuze ko Leta ya Habyarimana yakoreshaga uyu mugambi mu kwigaragaza nk’intwari kuko bishe abasirikare bakomeye muri RPA.

Ku munsi wakurikiyeho Kanguka yagiye i Mukarange igirana ikiganiro nk’iki na nyakwigendera Capt Kayitare. Mu kugera muri aka gace iki kinyamakuru cyamusanze ari kumva Radiyo Rwanda gitungurwa n’uburyo ayumva kandi yaramubitse.

Kayitare yamenyekanye cyane mu gitero cyafashe Umujyi wa Ruhengeri kigafungura Col Lizinde n’abandi batavugaga rumwe na Habyarimana.

Umunyamakuru wa Kanguka yakomeje agira ati “ Radiyo Rwanda imaze kuvuga ko wapfuye inshuro nyinshi, nari ngiye kukubaza nti ese ntiwigeze upfa ndigarura. Ese ntibigeze banakurasa?”

Capt Kayitare mu gusubiza ati “kuba ntarapfuye byo urabibona nawe, nanakubwira ko nta n’isasu ryabo ryari ryandasa, yewe nta n’icyo ndanarwara kuva twatangira kurwana ngo babihereho bavuga ko napfuye. Radiyo Rwanda kuko imaze kunyica inshuro nyinshi ariko si njye njyenyine na Maj Kagame yaramwishe na Maj Kaka yaramwishe n’abandi imaze gukubita inshuro ni benshi.”

“Twese rero turi hano, turi bazima nk’uko wabiboneye wenda n’abandi utabonye bazakwiyereka, radiyo y’iwanyu yaratuyobeye, ahubwo uzabambwirire niba bashaka kutwica bazadusange ku rugamba, aho tuba bareke kutwicira i Kigali.”

Iki kinyamakuru cyasuye aba basirikare bakuru muri RPA nyuma y’uko n’ubundi ku wa 3 Werurwe 1992, Ikinyamakuru L’Instant cyari cyasuye Maj Paul Kagame kigasanga ari muzima ndetse akakibwira ko “Ibibazo by’u Rwanda bizakemurwa n’Abanyarwanda ubwabo aho kuba Abafaransa cyangwa Ababiligi bari bashyigikiye Habyarimana."

Mu 1992 Kagame Paul wari uyoboye Ingabo za RPA yabwiye Ikinyamakuru L’Instant ko ibibazo u Rwanda rufite bizakemurwa n'Abanyarwanda
Rtd Gen Sam Kaka, Kanguka yaramusuye isanga ari muzima kandi hari hashize iminsi mike Radio Rwanda imubitse
Capt Kayitare ni umwe mu basirikare ba RPA bagiye babikwa na Leta ya Habyarimana kandi ari bazima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .