Ko ururimi tururumye gihwa ni nde uzaruramira?

Yanditswe na Ntwari Pie
Kuya 27 Ukwakira 2020 saa 11:53
Yasuwe :
0 0

Mperutse kujyana n’abavandimwe gusura umuntu umaze igihe arwaye, twigomba umwanya ngo tuganire, bishyira kera tugorora imbavu. Habamo gutebya no guterana ubuse ariko haza kubamo kidobya imwe: Twaje kutavuga rumwe wa mugani wa Bamporiki kuko ururimi rwari rwaduhuje rwatokojwe kandi ba nyirimitozo batangiye guharira abana umupira, ntibarumye gihwa ariko nyakurutokoza yihagazeho byo gutsimbarara, habura umwimana, dutaha tutavuga rumwe. Birababaje ariko ntibiraca inka amabere, ni kare!

Ndabyibuka neza. Ikiganiro cyacu cyari kigari cyane ariko kiza kwibanda ku miyoborere y’Ubwami, za Repubulika, za Guverinoma kiza no kugera ku busugire bw’imiryango, yaba nyarwanda cyangwa iy’ishyanga, ingoma nyabami ndetse n’ingo za rubanda. Mu by’imiryango n’ingo, tuvuga ko umuco wo gusurana cyangwa kugendereranira ugenda ukendera, ko nitutabireba neza uyu muco uzacika.

Hakaba murumuna wanjye twari hamwe ariko usabana cyane n’abo baturanye hafi, cyane cyane abo bangana. Umuryango mugari navuga ko dukomokaho uba mu bilometero birenga 150 uvuye aho dutuye ubu. Njye nagize amahirwe ndahakurira, bityo mpisanga kenshi. Uyu muvandimwe we ajyayo inshuro mbarwa. Impamvu se ni iyihe ko ingana ururo! Urayisanga aho hasi, mu kukumara amatsiko, ni ururimi!

Iwacu, uko nakuze mbisanga kandi bikiri, nta mukuru uvangirwa, ngo arogowe arimo kuvuga kereka iyo ariwe nyirabayazana, ubwo kandi abitangira uburenganzira, bitari ibyo, ni icyaha nk’ibindi. Ubigize nkana baramukebura, atakebuka akaba arenze ihaniro atyo, bakamuca mu bamuruta, akimwa intebe, akajya ajya kuganirira ku birago, iryo rikaba iteka! Ibiri amambu, bya bindi bavuga ngo akamasa kazica inka kazivukamo, umenya akamasa kagiye kuba ururimi, Ikinyarwanda tutakivuga kimwe.

Umwanya ugeze murumuna wanjye yahawe akanya ngo asobanure itandukaniro ry’ingoma zogeye i mahanga n’ingoma zacu. Yarabajijwe. Yarabajijwe kuko azi amateka, yarayize ndetse aracyakurikirana, nta ngengabihe y’isi imucuka.

Yarahagorewe kuko yari umwe kandi ari nawe mwana! Yaritsaga undi akamubaza, yaba agishira amanga undi akamusubirishamo. Ni imfura kuko si igifura, yakabaye undi yari guteshuka. Aratubwira, ashimagiza uko mu mahanga bakora ibibafitiye umumaro gusa ari cyo kibateza imbere. Kabone adateshuka si we wenyine wari wagowe. Hari umubyeyi wari ukeneye cyane kumenya ayo makuru, ariko nyakuyavuga yavugaga mu rurimi-mfatane.

Ikinyarwanda yagihambiraga inyabubiri n’Icyongereza. Uwo musaza wari mukuru muri bose ntiyari azi impaka zihari kuko yabonaga wa muco wo kuvangira abakuru no kubarogoya wacitse. Yari akeneye undi musemuzi kugira ngo dukomeze kuganira kuko twari twajwemo. Ati mwubahane! Twari twiyubashye mu bwubahane, imbarutso y’agasomborotso iba ururimi.

Twamuvuganiye kenshi Mzee dusaba nyiramateka kuyavuga mu rurimi rwumvwa na twese (Ikinyarwanda) arabigerageza biranga. Uruhare rwe mu kiganiro turubura dutyo kandi niwe uzi ingoma nyinshi zo mu karere u Rwanda ruhereremo kuturusha. Zimwe zimye areba, zibundura ibihugu byarohamye areba, izindi zibirindurwa ahari. Ariko tumubura tumureba, araceceka turashoberwa kuko ntiyamenye uko twafashwe ariko yatunguwe nk’uko twatenguwe.

Twatengujwe n’iki? Hari uwaciye undi mu ijambo agaruka ku kibazo twahereyeho cyo kudasurana, umuhungu ati “Ese niba tutumvikana turi aha, nindamuka ngiye i kantarange gusura ababyeyi kanaka na runaka bo tuzumvikana? Ati dore ibimbuza kujyayo ni ibi!” Ati “ururimi mvuga ni uru (rusobanye) kuko nize mu cyongereza ndetse naza no mu biruhuko umwanya munini nkaganira n’abatazi Ikinyarwanda, nabo bavuga Icyogereza.” “Eh. Dore re! Karabaye! Inka z’Iwacu! Mama rero! Maze ndore!” Ni uko twatangaye!

Ikibazo ni ikihe?

Muri iyi minsi, ujya ahantu h’ingeri zose ugasanga himakajwe amahanga. Kuva ku mucuruzi wa mukushi kugeza ku mucuruzi wa w’imodoka nta n’umwe ucyakira abaguzi be ngo abasuhuze mu Kinyarwanda. Wakirizwa na za ‘hi’, ‘hello’ n’ibindi bihiniye mu mpumeko gutyo. Hari uwo utuma fanta cyangwa amazi yo kunywa, ukabimubwira mu Kinyarwanda, uzi neza ko acyumva, nawe azi neza ko ucyumva, wenda yanasanze ukivuga, akongeraho ngo ‘warm’ or ‘cold’?

Uriya murumuna wanjye si uko atazi Ikinyarwanda cyo kuganira n’abakizi cyonyine. Iyo asitaye asakuza mu Kinyarwanda kuko azi ko uwakamubwiye ‘mpore’ ari nawe wamuramira. Si uko atazi ko ibyo kukigoronzorera mu cyongereza bituma utazi icyo kinyamahanga atamwumva. Si uko atazi ururimi neza ubwarwo. Oya! Araruzi neza n’ibi nandika arabisoma nta kimwisoba.

Ikibazo agira ni cyo n’abandi benshi bagira. Bimaze kuba nk’ihame, ko iyo uvuze mu Kinyarwanda gusa hari abakubonamo ubunyamusozi. Jye maze kubibwirwa na benshi ariko nkabihorera. Mperutse kujya ahantu, umuntu ansuhuza mu cyongereza musubiza mu Kinyarwanda nzi ngo nibura ari bwishimire ko ndi mugenzi we, ahitamo gukomeza kuvuga mu cyongereza nange ndatsimbarara nkomeza kuvuga mu Kinyarwanda, tugasubizanya mu ndimi zitandukanye, turaganira binyanga mu nda ndamubaza nti nta Kinyarwanda uzi? Ati ndakizi. Mubaza impamvu adakunda kukivuga, ati “Hano tuvuga icyongereza kenshi, nibyo namenyereye.” Ndamubaza nti “Ese iyo haje umunyarwanda gusa utazi icyongereza?” Ati “Ntakubeshye birangora kumuvugisha ntashyizemo ‘some English words’ ariko nta birenze.” Nanjye nti “Dore re! Bitarenga se?” Amaherezo se? Ati “Bizaza!”

Bizaza ryari?

Dukome urusyo dukome n’ingasire.
Bizaza ryari mu giheimiryango ibuza abana kuvuga ikinyarwanda mu rugo kandi no ku mashuri baba batakivuze?

Bizaza ryari mu gihe abana bacu ntawukibajyana kwa ba sekuru na nyirakuru na bahamare kabiri (wenda batinzeyo bavayo bavuga rumwe)?

Bizaza ryari no mu nsengero duhitamo kujyana abana mu materaniro bavugamo izindi ndimi?

Bizaza ryari na Leta ihagarariye ingombyi yaduhetse, igihugu, hari aho yarwaye urukebu? Umugabe uyikebura yabivuzeho ariko bamwima amatwi. BIZAZA RYARI?

Bizaza ryari kandi umuturage Leta ihagarariye muri iyi ngobyi iduhetse/igihugu ajya gusaba ubufasha runaka mu nzego za Leta, bakamusaba kuzuza impapuro ziri mu cyongereza gusa?

Bizaza ryari muri banki zose ari uko?

Bizaza ryari mu bikorera ari uko? Aho bagerageza usanga n’iyo Ikinyarwanda kiri mu ndimi zateganyijwe kiri ku mwanya wa kabiri. Ugasanga harabanza Icyongereza. Nkibaza nti Nyirikinyarwanda na Nyiricyongereza ni nde ubanza guhabwa ijabo mu Rwanda?

Birakwiye ko inzego zifite ururimi n’umuco mu nshingano zazo zikwiye kwimakaza kuruteza imbere kuko umuco niwo rwubakiyeho, ndetse bigahera mu muryango – Umuco iyo ucitse, igihugu gisigara ari ubutaka gusa nta benecyo. Ibi nzabyandikaho ubutaha ariko tubyiga kandi tukabyibutswa kenshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .