Kamere ntikura kirazira

Yanditswe na Ntwari Pie
Kuya 18 Ugushyingo 2019 saa 04:55
Yasuwe :
0 0

Sinje hano kujora, kuko nanjye si ndi shyashya, ariko nitudakeburana ntituzacyura inganji.

Amateka avuga ko ku wa 29 Werurwe 3123 mbere y’ivuka rya Yezu Kirisitu, igihano kiremereye kiri no mu byagize ingaruka tukibona ku Isi ya none, cyahawe abari batuye muri Sodoma na Gomora. Icyo gihe Imana yagize uburakari bukomeye kubera amafuti akakaye y’abari batuye muri iyo mijyi. Ibyo sinshaka kubitindaho, Bibiliya ibiva imuzi.

Njye ndashaka kuvuga kuri Mukaloti (Umugore wa Loti): Imana yari yahaye umuryango wa Loti amabwiriza ngenderwaho kugira ngo wo urokoke ayo makuba. Kimwe mu byo basabwaga (abanyamuryango), harimo kubyuka mu museso wa kare bagahunga ariko ntihagire uhindukira (gukebuka inyuma). Bageze imbere, Mukaloti yarahindukiye, urugendo rwe rurangirira aho. Yahise ahinduka inkingi y’umunyu. (Intangiriro. 19:26)

Njya nkurikira ibiganiro bitandukanye bitangwa n’Itorero ry’Igihugu kuko maze no kurijyamo inshuro zirenga ebyiri. Nta na kimwe gishobora kumara iminota 10 yonyine ijambo “Kirazira” ritavuzwe ngo risubirwemo. Mu ndangagaciro iki kigo gihora cyimakaza, ‘kirazira’ ni nk’umunyururu w’igare kubera ukuntu rihora ryisubiramo.

Buri wese amenye indyo iri bumutere ikirungurira, ntiyayikoza ku munwa. Iyaba buri wese yari azi ikimwaro yitera iyo ashize isoni ntiyajya ajya ku ruhande rw’ijambo ‘Kirazira.’ Kirazira zagiye he? Zajyanywe na nde?

Hari imvugo yaharawe n’ab’ikiragano cya vuba aha, ngo “Kiliziya yaciye kirazira” – Wenda Kiliziya yadutse kirazira zikendera ariko barayibeshyera. Uko byagenda kose Kiliziya siyo yazanye agasuzuguro. Mukaloti wasuzuguye Imana, si Kiliziya yamutumye. Yazize kamere ye yasaritswe n’agasuzuguro, imugaraguza agati arinda aba inkingi.

Cyaraziraga kikaziririzwa gusuzugura umutware wawe. Wabikora ukanyagwa. Cyaraziraga kikaziririzwa gusuzugura umubyeyi, yarakuvumaga. Kuko dufite abatware badutwaza inkoni zizamba, ntitukinyagwa, nta n’ibyo tugira byo kunyagwa. N’ababyeyi ntibakituvuma none twihaye kuvumera uko dushatse.

Ariko kandi umutware mukuru azatunyaga dutere igihugu icyagane. Uwo mutware mukuru ni uwaduhaye ababyeyi n’abayobozi bacu. Twese dukomoka ku babyeyi.

Ntibikwiye ko twabasuzugura kabone n’ubwo twaba tutazi neza isano y’amaraso iri hagati yacu. Kandi Imana (ku bayemera) niyo yaduhaye abo babyeyi, mu itegeko rya kane ry’ayo yahaye Musa, tubuzwa kubasuzugura. Iyo Mana nyine ni nayo idusaba kumvira abatuyobora. Aba bombi (ababyeyi n’abayobozi), inshingano zacu ni ukubumvira ibindi Imana ivuga ko izabibibariza.

Mperutse gutega imwe mu modoka abantu bakunda kwita “Shirumuteto.” Yavaga Kanombe igana mu Mujyi, Nyarugenge. Ni imodoka nini, ifite ubushobozi bwo gutwara abantu 70, rimwe na rimwe bukongerwa. Muri abo 70, 40 nibo babona intebe zo kwicaraho, abandi baba bagomba kugenda bahagaze. Ntagarutse ku muvundo nateje muri iyi modoka, nyuma nkaza gushyigikirwa n’abandi babyumvaga kimwe nanjye (ariko babanje kwigira ntibindeba), reka ncyahe ntishongoye ku batabyumva kimwe nanjye kuko nanjye ndi umunyabyaha, utanga abanyabyaha ariko utinya Imana ndetse n’umunyabyaha utwerera ibye abandi.

Reka rero rungano rw’abo mungana mbibarize: Kuki turi abahanga b’ikibi tukaba abaswa b’icyiza? Umubyeyi ufite umugongo nk’uwaguhetse umwubashye waba iki?

Agende mu modoka yishingikirije akabando, bakate umuhanda akate uwe agwane nako ngo ni uko mwishyuye amafaranga angana? Bibe mu itumba wicecekere no mu mpeshyi bibe uko?

Mu birori no mu yandi makoraniro y’abantu benshi, abashinzwe gahunda z’umunsi baba bibutsa abantu guhagurukira ababaruta, cyane cyane babwira urubyiruko nanjye ndimo. Umuntu ufite intege nke kukurusha umuhagurukiye akicara waba iki? Mu bafite intege nke, uretse umwe akabanza guhabwa serivisi mbere yawe byatuma ushenguka?

Ntitukemere koshywa na kamere ikura kirazira, ejo njye nawe tuzasaza birenze aha, twifuze abaduha amaboko kandi ntayo twabaremeye. Iyo umwana yananiranaga hari igihe ababyeyi bamucaga. Umubyeyi twese duhuriyeho kandi utaduca (dukurikije Itegeko Nshinga) ni igihugu! Ubuse koko twagiriye ababyeyi Imana yaduhaye n’abayobozi yahaye igihugu ngo bakiyobore tukagaruka ku muco!

Ntibisaba kuba mu idini iryo ari ryo ryose, ntibisaba amafaranga, ntibisaba amashuri ahanitse ndetse ntibinasaba imyaka y’ubukure cyangwa icyiciro cy’ubudehe umuntu arimo ngo buri wese amenye agaciro ko kugira neza, kuko nawe iyo agiriwe neza ibyishimo bimushibukamo biraramba kandi yakukwa inabi, ubusharire n’uburyaryate bw’agasuzuguro yagiriwe nabyo ntibimugwe neza. Duhe abandi ineza, tugire ubuntu ni byo bizaduha ubumuntu tukaba abantu bazima.

Ntiwasuzugura ababyeyi bawe ngo uvuge ko wubaha Imana cyangwa wubaha igihugu. Niba twirinda kuba ibigande ku Mana no kugomera abayobozi yaduhaye, tuve ibuzimu tujye ibuntu tutazavaho dushyirisha igihugu mu makuba bitangiriye ku tuntu duto – two nakwita amanjwe.

Kirazira ikwiye kongera guhabwa intebe, abantu bakamenya gutandukanya ikibi n’icyiza. Abantu bakigishwa ko kubaha ari umureko w’imigisha kandi ko kubahuka ari ishyano. Dufatane urunana, ishema ry’u Rwanda rishamikire ku muco na kirazira, ibindi Rugira watugize azabiduha.

Ibikubiye muri iyi nyandiko ni ibitekerezo bwite by’umwanditsi, Ntwari Pie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza