Inzozi zirura: Ba Kanyeshyamba batabona

Yanditswe na Ntwari Pie
Kuya 8 Kamena 2020 saa 06:00
Yasuwe :
0 0

Muri Bibiliya Ntagatifu, umurongo wa 1:14 mu gitabo cy’Umubwiriza hagira hati “Nitegereje ibikorerwa ku isi, nsanga byose ari ubusabusa, bikaba ari ukwiruka inyuma y’umuyaga.”

Ntibisaba kwiga ishuri rya Bibiliya, si na ngombwa kuba wizera ibyanditse muri iki gitabo kugira ngo ugire ibyo wemeranya n’abacyanditse – kwiruka inyuma y’umuyaga nta kamaro bifite. N’iyo waba ushaka kumenya iyo ujya (umuyaga) ntiwakwirukansa amaguru masa.

Ijoro ryakeye narose umuntu ufite ubumuga bwo kutabona. Abakozi be bose ntibabona. Ni Abanyarwanda, kuko muri izi nzozi ibyo bakoraga byose babikoraga bavuga Ikinyarwanda. Ni abahinzi-borozi. Inzozi zihera aho zishatse zikarangirira aho zishatse, izanjye zahereye mu ishyamba kandi ishyamba rinuka.

Impamvu ituma rinuka naje kuyimenya nayo: Rinutswa n’umwanda mwinshi abaribamo bagira, aho kubaha akayaga keza kubera ibiti byinshi bigize ishyamba, ribaha umwuka mubi kuko uko ari amagana bafite ubwiherero bubiri gusa. Ni amagana kuko babyara indahekana kandi abana bavutse, uko bakura bagenda barwara amaso, bajya kugeza imyaka 12 barahumye burundu abandi bareba umurari. Sinamenye ikibatera iyi ndwara y’amaso; gusa, ikigaragara ni uko bayiterwa n’umuntu w’umugome.

Nagerageje kubaza ngo numve uko bavurwa nukwa inabi, mbwirwa ko ugerageje kuza kubavura bakoresha uko bashoboye bakamurwanya kugira ngo batabura ibiryo, natinye kuhasiga agatwe ngumana nabo ntyo. Ndora ibyo bakora tukaganira batandora ariko na bake bumva, amatwi yabo atangiye gupfa. Ni inzozi!

Nibutse izo narose, nibuka ubuzima abo narose babayeho, mbugereranyije n’ubu tubamo mbona baragowe. Bamwe muri bo barabizi ko bagowe, abandi bo ntibashaka no kubikozwa. Abazi ko bagowe cyane, ni abana bakimenya ubwenge n’abafite ijisho rimwe rizima ndetse n’abagore.

Abagore bo babonesha amaso y’umutima, ni amahirwe Imana yabahaye. Muri iyi miryango iba mu nzu zidafite imiryango, ugerageje wese kuvuga uko bagowe bitewe n’ibyo yabonye, aratotezwa, agakoreshwa uburetwa bukomeye byarimba akicwa. Umukoloni wabo bita ikizina ntibuka niwe ngo ubaha ibyo kurya, bakamuhingira ishyamba.

Ni inzozi ndende. Ni inzozi zinuka kandi zirura. Aba bagabo bakoze umutwe wakita uwa gisirikare ariko ushatse wakita uw’impumyi. Bafite ibibando byitwa imbunda ariko birinda imbandure kurusha abantu. Bose barayinywa, bityo buri wese aracyitwaza. Utitwaje uwo muhini, kuva ku mwana ufite imyaka itanu kuzamura kugeza ku bakecuru, usanga afite itopito ariko amabuye ni make sinzi icyo bazikoresha.

Bafite imiheto yabatunatunnye kuko bayiramvura mu mivumu kandi hari imikore; injishi z’iyo miheto ziba zishaje nk’ibibindi bibahora impande, bafite amacumu afite ingese ku mihunda bakagira imyambi ifite inti zingana imiheha, bakayijyana mu mitana yaboze. Bo ntibanukirwa ngirango, n’unukiwe arijijisha akajishira agahinda mu nda ngo ejo atazahagwa.

Dore umunsi wabo uko uba uteye. Nabirose neza:

Babyuka kare mu ruturuturu bayura. Ntawukaraba kuko amazi abona umugabo agasiba undi. Iyo ubarebye barya, ubona ko bose babyirukanye ingonga mu gutamira. Hari ababa baraye batetse igikoma, impungure n’ibinyabijumba.

Ndakwibutsa ko 90% y’ababa muri iri shyamba bose batabona. Kuba batabona bibaha amahitamo make ku byo baroha mu bifu. Bashyiramo ibyo babonye bakarenzaho umusururu kuko hera amasaka, bakegeka ibondo, bakanguka bakenyegezamo imbandure.

Erega narose mbi kandi ndende: narose icyo bahinga ngo kibatunge. Bahinga ishyamba, bagatutira bagahinga irindi, bakagurana ubutunzi n’ababagemurira imyaka. Ni abahinzi ariko borora. Borora inyamaswa ngufi kandi n’umwana wabo waraye uvutse (mu nzozi) yavutse azi kufira. Icyo batazi ni kimwe ari nacyo cyanduriye mu nzozi – kutabona kwabo ntigutuma bamenya niba bahenzwe cyangwa batahenzwe. Batera ishyamba hasarurwa iryeze. Ibiti byabo byarakookoowe ntiwabona, bagurisha ibiti amashami yarashizeho kera.

Bakabiguranamo imyaka n’abo ntamenye aho baturuka ariko babashuka cyane. Iyo babitema, kubera kutabona hari igihe batemana cyangwa se bikabagwira. Ababaha imyaka ntacyo biba bibabwiye kuko iyo hari abapfuye, bazanna ababasimbura bato bakura mu zindi mpugu, bakabatoba amaso, ubwo hehe no kubona, bakaba ba Kanyeshyamba batyo.

Ababashuka ari nabo babaha ibyo kurya bakitwarira ishyamba ni abatindi ku mutima. Bo barabona kuko indwara y’amaso ibatinya ariko bakagira umururumba. Ntibabwira aba ba Kanyeshyamba ibyo babona kuko byabicira isoko. Barareba, bakabarebera, bakicecekera. Banabacengejemo icinyizamyumvire ku washaka kugira ibyo ababwira yabonye ngo yabonye bo batabonye. Kutabona ntunumve ibyo ababona babonye ni ukunyagwa zigahera.

Aba batindi ku mutima bazi ibyo ba Kanyeshyamba batazi. Bazi uko mu burasirazuba bw’iryo shyamba hari ubutaka bwera uburo n’ibigori n’indi myaka ntarondora ariko myinshi, bukabaho inka zikamwa ayera ndetse zirisha mu nzuri ziyuhira. Bazi ko ubwo butaka bufite umuryango munini kandi w’abantu batarwaye amaso, bazi ko hari ikirere gitandukanye n’icyabo, bazi ko imiryango ituye kuri ubwo butaka irara mu mazu afite imiryango kandi bazi neza ko inkiko z’ubwo butaka zugariye neza.

Icyakoma cyose, bazi neza ko abakinzi baho bakora mu mitana bakabibwira. Erega tuganira bambwiye ko babazi. Barabazi kuko bazi impuhwe zabo. Bambwiye ko bagerageje kwiba inka zo kuri ubu butaka, bakagerageza kuza gusahura ya miryango irara yugaye amazu ngo bage gukinga ayabo, uko bajyana amatopito bakarasa amabuye muri aba baturanyi bitonda… ngo abakinzi bakabirukansa babageza mu ishyamba bakabareka. Aho babera abanyempuhwe, uwo bafashe baramujyana bakamugaburira agahaga, bakamuha akazi agaturana n’abandi, agakinga akanezerwa.

Ngo bake bishwe ni abinangiye bagashaka kwica abo kuri ubu butaka bundi. Aba bahemu bo barabizi byose, Kanyeshyamba niwe uri mu gicuku. Bazi umutware utwara ingabo z’ubwo butaka! Bazi ko afora akarekera. Bazi ko azigaba igihe ashakiye kandi akazigarura. Bazi uko byabagendekera bakinishije kwototera ibyiza biri ku butaka bwe. Niyo mpamvu bashuka abatabona, bakabaroha ngo biyahure. Bakarenga bakabiba.

Ba Kanyeshyamba narose rero banteye isereri. Nagerageje kubabwira ko bashukwa ariko banga kunyumva. Cyakora bambwiye ikintu kimwe: Bambwiye ko aho navuye hari benewabo babatorotse ngo baticwa kuko banze uburetwa bwo mu ishyamba. Banambwiye ko aba batorotse bageze ku butaka mbaho bakavurwa amaso bagakira bakaba babayeho neza. Ba Kanyeshyamba ariko banambwiye ko hari abandi bapfuye amaso tubana. Bati ni ibirumirahabiri ariko ntuzabavuge.

Bambwiye ko barya ibiryo by’ubutaka buragirwamo inyambo barangiza bakirirwa batoragura amabuye banakorera amatopito abo ba Kanyeshyamba, muri make ngo barabashakira inzira y’uko bazigarurira ubu butaka, ibyo nababwiye ko bidashoboka, igihe cyose bakumva ko itopito zarema urugamba, ko barimo kwiruka inyuma y’umuyaga. Nti: “Musabe Imana mubashe kureba muve mu manjwe.”

Nababwiye ko igihe ari iki ngo bemere ubabwiza ukuri, ko ubica amaso n’iyo igihugu bakigarukamo atabavura, bambwira ko babizi ari ukubura uko bagira kandi ko bakumbuye kurara mu nzu ikingwa kuko imyobo yabarambiye ariko cyane cyane kuba ahantu hatera imyaka.

Gusa, bambwiye ko ikibazo kibakomereye ari ukutabona, bati “Icyaduha amahirwe nk’ayabavuwe bagakira, tukabasha kurebaho, nibura ntitwabura inzira idukura muri iri shyamba.” Barongera bati “Ntawe twizera, abantu bose ni intasi, uwo utakiye kurwara amaso abibwira umucuruzi uduha ibiryo ukarara upfuye. Uzatubwirire abo bagihumye bashake uko bivuza kandi nibabibasha natwe bazatuvuze.”

Muri ako kanya, amasaha yari agiye, barambwira bati iruke kibuno-mpa-amaguru, bati umutware utuzanira ibiryo araje kandi turashonje (kandi nibwo bari bakimara kurya), bati kandi nagufata urapfa amaso nk’uku kwacu, va aha udutahirize abo benewacu, ababona n’abatabona. Nabaye nkikinga ku giti ngo mbone uko nshwekura, isaha imbyutsa iba irasonnye.

Mbona ndi iwanjye, Nyarugunga, muri Kicukiro.

Ibikubiye muri iyi nyandiko ni ibitekerezo bwite bya Ntwari Pie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .