Izigezweho

Inzangano, izingiro ry’ibyiyumviro byangiza bitagaragara

Yanditswe na Mukagasana Yolande
Kuya 8 Gashyantare 2021 saa 04:41
Yasuwe :
0 0

Birababaje kuba urubyiruko rumwe rw’Abanyarwanda rukihagararaho rukanga guhangana n’amateka yarwo. Nkunda gusubiramo ibi mvuga ngo ikibi ntikizigera gitsinda icyiza, urwangano ntiruzigera rutsinda urukundo.

Niba wanga umuntu ni wowe wa mbere uzagirwaho ingaruka n’urwo rwangano, uwo wanga yiryamira mu mahoro mu gihe wowe umara amajoro udasinziriye utekereza ku bibi wamukorera.

Ikinyarwanda ni ururimi rwuzuyemo imvugo zizimije nyinshi, ariko ndabyumva ko uru rubyiruko rutagize amahirwe yo gutura no gukurira mu Rwanda. Ababyeyi babo bakoze ibishoboka ngo babibagize ururimi rwabo ndetse n’igihugu cyabo kuko bashakaga kubaremamo urwango rw’abavandimwe babo n’igihugu cyabo.

Bagombaga kwisanisha n’abantu bakuriyemo. Kwisanisha ni ugutakaza uwo uri we. Kwisanisha ni uguhakana uwo uri we. Kandi iyo wisanishije ntuba ukiri wowe ubwawe kandi ntuba uri n’undi wisanishije na we. Twatakaje uburinganire turagwa ntitwabasha kongera kubyuka. Birababaje ariko ni uko biri.

Mu gihe cya Jenoside, iyo umusore umwe yanyuraga ku rugo rw’inshuti ye akayibaza impamvu ikiryamye aho kujya “gukora”, ntabwo byavuzwe ko kwari ugutsemba Abatutsi. Jenoside yakorewe Abatutsi yari yabaye “akazi” ku Bahutu bose kuko yari igikorwa cyo gukunda igihugu. Ni yo mpamvu uru rubyiruko rutumva uburezi twita hano “ingengabitekerezo yonswe.” Bitekerereza amashereka. Birababaje!

Rimwe na rimwe iyo natangaga inyigisho mu mashuri, urubyiruko rw’Abanyafurika rwose rwazaga guhura nanjye ngo tuganire. Hari ubwo bamwe bambwiraga ko hari urubyiruko rw’Abanyarwanda mu mashuri yabo. Iyo nabasabaga ko bampuza nabo bambwiraga ko bagiye kuko batashakaga guhura nanjye. Iyo nababazaga impamvu bambwiraga ko ibyo nababwiye bitandukanye n’ibyo ababyeyi babo babaganirije.

Mu by’ukuri bari intagondwa ku buryo bahitagamo kwanga ibiganiro. Mfitiye impuhwe cyane rwose urwo rubyiruko rwabaye inzirakarengane y’ingengabitekerezo y’urwango bigiye kuri abo bakabigishije urukundo. Ntabwo utanga icyo udafite. Uru rubyiruko ntabwo rwize gukunda. Ese batanga urukundo gute kandi batararuhawe n’ababyeyi babo? Ese bakunda bate batarabyigishijwe?

Ndabwira uru rubyiruko nti, ntabwo ari amakosa yanyu kuba ababyeyi banyu barahamwe no kuba barakoze Jenoside, si amakosa yanyu ko ba sogokuru na ba nyogokuru babateramo ubu burozi babigisha ingengabitekerezo y’urwango. Ariko ni amakosa yanyu kuba mu dashaka kumenya ukuri ku mateka y’abantu banyu n’igihugu cyanyu. Ni amakosa yanyu kuba mukomeza kwifungira mu cyaha cyo guhakana Jenoside yakorewe Abatutsi.

Bamwe muri mwe mwabonye Jenoside, uwakoze Jenoside muto nahuye na we, yari afite imyaka icumi mu gihe cya Jenoside, akaba yarishe abandi bana b’inshuti ze b’Abatutsi. Ntabwo bari inshuti ze gusa ahubwo na ba nyina bari inshuti. Ese ni ikosa ryande? Niko Évariste yambajije. Mukomeze mube abanyabyaha niba mudashaka kuba abantu. Tuzabarwanya kuko imyitwarire yanyu izakomeza kuba mu ruhererekane rw’ibyaha bya Jenoside. Kandi kubera ko ari urwango rubasunika, urundi rubyiruko ruzabatsinda uko byagenda kose.

Urwangano, ibyo byiyumviro bisenya bitagaragara, inzirakarengane zarwo ni abarufite. Mwirinde ariko niba mutabishaka ntibizaba itegeko. Baca umugani ngo ‘Urusaku rw’igikeri ntirubuza imfizi gushoka.’

Iki gitekerezo ni icya Yolande Mukagasana, Umwanditsi w’Ibitabo akaba n’Umuyobozi wa Fondation Yolande Mukagasana.

Mukagasana Yolande asanzwe ari umwanditsi w'ibitabo ndetse yashinze umuryango uzakora ubushakashatsi kuri Jenoside no kurwanya abayihakana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .