Indembe iruta intumbi

Yanditswe na Ntwari Pie
Kuya 24 Ukuboza 2019 saa 03:09
Yasuwe :
0 0

Kugira ngo tugendane muri iyi nkuru, ndakwibutsa ko iki ari igitekerezo cyanjye bwite, udahatiwe kukigiraho imyumvire imwe nanjye ariko ko niba wumva gifite ishingiro, kigire icyo kigusigira muri uyu mwaka tugana ku musozo wa 2019 kandi kigutere imbaraga zo kurushaho kugirira ineza uyikeneye kurusha utayigusabye.

“Nyuma y’amarira n’imiborogo mu rugo rwa Nyakwigendera, hakurikiyeho Misa Ntagatifu kuri Regina Pacis, ni i Remera mu Mujyi wa Kigali; imodoka zarakubise ziruzura n’umuhanda wo hepfo ya paruwasi wasaga n’utari nyabagendwa ku binyabiziga. Hari ku zuba ry’igikatu, bituma abantu benshi bambara amadarubindi y’izuba ari nako kandi bambaye amakoti na karavati; icyokere ntacyo cyari kibatwaye kuko uwo bari baherekeje ari umuntu bari bahaye icyubahiro.

Mu mutuzo usanzwe muri Kiliziya Gatolika, abantu bose bari batuje. Byaragaragaraga ko umuryango cyangwa se inshuti z’umugenzi wari usoje urugendo zari ziteguye neza uyu munsi kandi ko indi mihango ijyanye na wo n’ibikenewe ngo igende neza byatwaye amafaranga afatika.” Ndabyibuka.

Kuko nari naherekeje inshuti y’uwo muryango, sinari nzi nyakwigendera, si nari naranamubonyeho. Nyuma y’igitambo cya Misa, nagombaga gutega amatwi neza ubuhamya bw’abavandimwe n’inshuti ze kugira ngo nihanganishe inshuti naherekeje nzi neza uwitabye Imana.

Umwe mu batanze ubuhamya, umwuzukuru wabanaga n’uwari utabarutse, n’ishavu rishenguye umutima, mu marira n’agahinda, ijwi ridasohoka neza, yashimiye abari aho bose, nako twese, avuga ko ntako bisa kugira inshuti zigutabara mu byago no mu makuba.

Ariko mu buryo burambuye kandi butunguranye, arihangana anavuga uko yabanye na Nyakwigendera n’uko yababajwe n’uko yazize urw’ikirago, uko yabuze uwamufasha mu buryo bw’amafaranga ngo yivuze, uko “mituelle de santé” ntacyo yari kumumarira mu burwayi bwe bukomeye, kugeza ubwo yasezerewe mu bitaro akagwatirwa kubera kubura ubwishyu … ko yabuze ibimutunga bijyanye n’indwara ye kuko indyo isanzwe yari kumuhuhura aho kumuzahura. Muri make, uyu mukobwa yatubwiye uko Nyakwigendera yabayeho nabi mu myaka ibiri ya nyuma y’ubuzima bwe.

Igitumye nita umutwe w’iyi nkuru uko wanditse hejuru, ni uko aba bantu bose bari mu Kiliziya, iyo baza kugira ubushake n’umutima utabara uriya mukobwa yashimye ku munsi wo gushyingura, ntaba yarapfuye uko yapfuye, nta n’ubwo ari wo munsi yari gupfiraho (ndabigarukaho hasi) kandi nibwo uwo mutima mwiza wari kugira agaciro gakomeye kurusha ako wagize kuko wari kuba utabaye Nyakwigendera aho gutabara abasigaye.

Niba wemeye ko tugendana muri iyi nyandiko reka nkubwire ko ari byiza gutabara abakiriho kurusha gutabara abasigaye. Amatangazo yo kubika menshi aba ahamagarira abantu gutabara abasigaye, inshuti n’abavandimwe. Ni ukuvuga ko uwapfuye adatabarwa, akenera gutabarwa iyo agihumeka.

Reka ngusabe wowe usoma iyi nkuru: Gutabara abantu bye kuba umugenzo no guhushura. Kuba indyarya mu byago n’amakuba ni ishyano.

Nyuma y’ijambo ry’uyu mwana w’umukobwa nibajije ibibazo byinshi, nta gisubizo nari ntegereje, ariko nizeye ko umwe cyangwa babiri bari aho na bane basoma iyi nkuru bashobora guhindura imigirire yabo, ineza ikagirirwa umuntu ukiri muzima kurusha kuyigirira uwatabarutse, bityo urwo rumuri rukimura umwijima uba mu mitima ya benshi, hakaramirwa amagara yasambutse kurusha kuramira ayamaze gusezera isi, hagahabwa agaciro ibitaro kurusha ubuturo bwa Rusororo, ahacecekerwa ubuziraherezo.

Dore ibyo nibajije:

Nibajije aho abo bantu bose babaga mu myaka ibiri ishize uyu mukambwe atarapfa, nibajije aho izo modoka zari ziri igihe yaburaga uko agera kwa muganga, nibajije aho umufuka wavuyemo amafaranga yo kugura ibinyobwa n’ibiribwa by’abantu barenga igihumbi wabaga igihe Nyakwigendera yari yarabuze ibyo kunywa no kurya yandikiwe na muganga kandi ari umwe, nibajije aho uwatanze amafaranga yo kwishyura ibyumba bikonjesha umurambo (morgue) yabaga ubwo Nyakwigendera yari yafatiriwe mu bitaro yabuze ayo kwishyura, nibajije aho amafaranga yo kugura isanduku nziza y’umurambo yavuye nyamara hari inka ya Nyakwigendera yapfuye hakabura ayo kumworoza indi, bakava ku mata bakajya ku mazi, aya y’amatembarubingo kandi bafite umuryango, inshuti n’abavandimwe; nibajije byinshi nawe wari kwibaza ariko reka tubikuremo iri somo:

Kugira uruhare mu mibereho y’inzu ni ugutanga umuganda mu gufasha umuntu kubaka, mukagera ingeri ku yindi, n’ubwo inkingi imwe itagera inzu, imwe yawe ifite agaciro kurusha ihema wacumbikiramo nyir’inzu n’umuryango we mu gihe inzu yabo yaba yahirimye. Urubariro rumwe cyangwa umugozi wo kuzihuza wamuha igihe acyubaka ufite agaciro kurusha ibati wamuha ngo rimukinge umuyanga igihe inkangu yaba yamutuje munsi y’igiti. Kandi urugo ruruta inkambi. Ubumuntu bwacu bukwiye kugaragarira mu bugwaneza tugira iyo umuntu abukeneye.

Amaboko yacu ducukuza imva, afite imbaraga nyinshi ku buryo tuyateruje umurwayi twamuvuza, atanakira tugaterwa ishema n’ishyaka twagize mu buzima bwe. Ndabizi hari imvugo ngo “umuntu apfa umunsi we wageze, ngo niko Imana iba yabishatse…” Niko se: iyo Mana yashatse ko utabara abasigaye, watabaye ukiriho maze irabyanga? Igihe cye cyageze se, niba isaha ikibara ari wowe uyigendana urushinge rugeze ku gihe cyo kwita ku murwayi wakoze iki? Ntitukabe indyarya kandi ngo twongere twiyerurutse dushimagize amafuti ubucurame bw’imitima.

Niba twiyerurukije bya nyabyo mu gutabara abasigaye, twimara ingengo y’imari ku munsi w’imva, nituyikusanyirize gufasha abasigaye koko. Aho gushyashyanira uwagiye gusa, akenshi tutanazi abasigaye niba batamukurikira vuba, iyo mari tuyihe abari basanzwe bamuri hafi, batwereke ibyihutirwa kurusha ibindi ari byo ikoreshwamo. Gucanira buji 30 umuntu wapfuye, yarabuze peteroli yo gushyira mu gatadowa arembye ni umutima muke. Gukoresha ifoto ingana n’ameza ku munsi w’imva utaramuguriye ubwishingizi bwa 3,000 Frw ngo yivuze ni ugushinyagura.

Amadarubindi yirabura twambara ku munsi w’imva ntitukayambare ku mutima. Umuntu ntakomongane akarago adufite, ngo arinde apfa ananiwe hanyuma ngo tuze ku kiriyo gukerakera no gucaracara, twitwa ngo twabigize ibyacu, ngo turare inkera twiroha inkangaza ngo turiyibagiza agahinda, agahinda tutatewe n’imibereho mibi ya Nyakwigendera. Tubisige muri 2019.

Iki ni igitekerezo cya NTWARI PIE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .