00:00:00 IGIHE NETWORK KN KINYARWANDA EN ENGLISH FR FRANCAIS

Imyaka 28 irashize: Abaturage bari bihebye bagiye kuba igisubizo cy’ababimukira b’u Bwongereza

Yanditswe na Joseph Kamanzi
Kuya 14 April 2022 saa 09:50
Yasuwe :

Ibibazo by’abimukira batari bafite icyizere cyo gutura mu bihugu byabo ndetse batanemewe ahandi, bigiye gushyirwaho akadomo babikesha ubugwaneza bw’u Rwanda n’abenegihugu barwo.

Iby’abimukira hagati y’u Bwongereza n’u Bufaransa, biri gufata indi sura mu gihe u Rwanda rwibuka ku nshuro ya 28 Jenoside yakorewe Abatutsi mu 1994.

U Rwanda ruzi ingorane ziterwa n’ubuhunzi. Abantu bafata izi ngendo zirimo akaga ntibaba bagamije kwinezeza. Abantu bari gupfa. Hakenewe ugira icyo akora.

Ntibishoboka ko u Rwanda rwarebera hejuru y’akaga kameze gatyo kagaragara buri munsi kuri za televiziyo.

Hadateshejwe agaciro igikorwa cyo gusohoka kw’aba bimukira, bagize amahirwe ko ibibazo byabo byagiye bitambuka imbonankubone ku bitangazamakuru mpuzamahanga hatibagiranye za miliyoni z’abakoresha imbuga nkoranyambaga. Ibi byafashije mu ishakwa ry’igisubizo cyihuse.

Ntabwo byagenze nk’uko byari bimeze muri Mata 1994 hano mu Rwanda. Abagera ku 4000 bahungiye mu ishuri rya tekiniki rya ETO bizeye ko ingabo za MINUAR zibarinda.

Inyuma y’ishuri hari interahamwe n’abasirikare b’u Rwanda bari barekereje bategereje gucura inkumbi.

Ku wa 11 Mata, nyuma y’aho abanyamahanga bari muri ETO bimuwe n’ingabo z’Abafaransa, itsinda ry’Ababiligi ryasize abagabo, abagore n’abana badafite kirengera. Abicanyi babahukamo hafi yo kubamara.

Ingero zimeze nk’urwo zari nyinshi. Hari amashusho agaragaza ibihugu mpuzamahanga byazanaga indege za gisirikare zo kuvana abenegihugu babyo mu Rwanda. Indege zimwe zatwaraga inyamaswa.

Mu minisi mike cyane, Abanyamerika n’Abanyaburayi bagera ku 2850 bari bamaze kuvanwa ku butaka bw’u Rwanda.

Nyuma y’imyaka ikabakaba 30, Guverinoma y’u Rwanda ntishobora kwemerera isi itagira impuhwe kwitambika amahitamo yarwo. Dufite inshingano zo gutabara uwo ari we wese ubikeneye.

Hari bamwe mu barangwa no kwikunda bagerageje nkana guhuza igikorwa cy’u Rwanda cyo kwakira abimukira n’ibirego bidafite ishingiro byo kutagira politiki yo kurwanya iterabwoba mu gihugu.

Minisitiri w’Intebe w’u Bwongereza, Boris Johnson, ubwo yatangazaga imikoranire mishya n’u Rwanda mu gitondo cyo ku wa Kane, yagarutse kuri abo banenga.

Mu gihe Johnson yari i Londres, Umunyamabanga we, Priti Patel yari i Kigali mu bikorwa byo gusoza porogaramu y’imyiteguro y’abo bimukira.

Yagize ati “U Rwanda rwarahindutse, ibyo ruri gukora rwakira abimukira bigomba gufatwa nk’uburyo buzafasha mu kurangiza ibibazo by’abimukira.”

Abimukira bavuye mu Bwongereza si aba mbere bazaba binjiye musi sosiyete nyarwanda nyuma y’abaturutse muri Libye.

Abanyarwanda ntibatunze ibya Mirenge ariko bahaye ikaze ibihumbi by’Abanye-Congo kuva mu 1996 n’Abarundi kuva mu 2013.

Uyu munsi nujya mu bitaro bya leta cyangwa ivuriro ryigenga ushobora kuvurwa n’a muganga w’Umunye-Congo wigiye mu Rwanda. Si aho gusa. Injira mu nzu zitunganya umusatsi, uzahasanga umunye-Congo utegereje kuguha serivisi.

Abarundi na bo buhoro buhoro bari kwakirwa. Bacumbikiwe n’abanyamahanga.

Hashingiwe ku by’ibanze biteganyijwe ku bimukira bazava mu Bwongereza, nibagera mu gihugu bazahabwa ahantu ho kuba habereye ikiremwamuntu kuko hari abashobora kuba ntacyo bakuye mu bihugu baturutsemo.

Mu gihe bazaba bafite aho kuba, bazafashwa gutegura mu buryo burambye iby’imibereho yabo. Abaza bakeneye kwiga bazaba bashobora kujya mu ishuri, kugira ngo bagire ubushobozi bwo gukora aho ari ho hose ku isi.

U Rwanda rwagaragaje ko ruzabona miliyoni 12o z’amayero ruzahabwa n’u Bwongereza azafasha mu gushyiraho ibikorwaremezo by’ibanze bizafasha abimukira n’Abanyarwanda muri rusange.

Aya mafaranga azafasha abimukira n’Abanyarwanda mu bikorwa birimo amahugurwa mu masomo y’imyuga, ay’indimi, mu mashuri yisumbuye n’amakuru.

Ikintu nyamukuru kigambiriwe muri iki gikorwa ku ruhande rw’u Rwanda ni ugutanga ubufasha.

Atari uko bimeze, nta tandukaniro twaba tugaragaje ku byo LONI yakoze mu 1994 no gutererana abantu kwakurikiyeho.

Icyo gihe, guverinoma ntizari zikwiye kwemera ko jenoside iba mu Rwanda. Zananiwe kumvikana ku nyito mu gihe ibihumbi by’abantu byarimo bitakaza ubuzima.
Ibyo ntibikwiye kongera kubaho ukundi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .