00:00:00 IGIHE NETWORK KN KINYARWANDA EN ENGLISH FR FRANCAIS

Impanuro z’abakuru: Iby’ingenzi imiryango migari ikwiye guha u Rwanda aho gutsimbarara ku k’ejo

Yanditswe na Nsanzabera Jean de Dieu
Kuya 20 August 2023 saa 10:15
Yasuwe :

Ubwanditsi: Ibi ni ibitekerezo bwite by’umwanditsi Nsanzabera Jean de Dieu, inzobere akaba n’umushakashatsi ku mateka n’umuco by’u Rwanda.

Amateka y’u Rwanda yagiye anyura mu ngeri nyinshi z’ubuzima, ariko yagera ku y’imiryango migari yo agasya atanzitse! Imiryango migari n’inzu z’imiryango byagiye bigira intera zitandukanye kuva zabaho mu mibereho na politiki bitewe n’aho igihugu kigeze kiyubaka.

U Rwanda rufite Ibicumbi bikuru by’imiryango bitatu birimo Igicumbi cy’imiryango y’Abasinga, igicumbi cy’imiryango y’Abazigaba n’igicumbi cy’imiryango y’Abanyiginya. Ibyo bicumbi nibyo byabyaye imiryango migari 26 dufite ubu.
Ni miryango migari irimo Abasinga, Ababanda, Abarenge, Abahunde, Abungura, Abasita, Abanyakarama, Abenengwe, Abongera, Abazigaba, Abahinda, Abagesera, Abanyiginya, Abasindi, Abega, Abaha, Abakono, Abatsobe, Abacyaba, Abahondogo, Abashingo, Abashambo, Abashi, Abahavu, Abasigi n’Indara.

Hari igihe cyabayeho imiryango migari ikubakirwaho Politiki y’igihugu n’ubuzima bwacyo, ubundi biza kuvanwaho ishingirwaho mu mishinga yubaka u Rwanda cyane cyane mu mibereho myiza, ubukungu n’imibanire, kugeza n’aho noneho yabaye n’igikoresho cyo gusenya ibyo yubatse imyaka myinshi.

None rero, hari igikwiriye gukorwa kugira ngo tureme u Rwanda ruhamye mu bihe byo kongera kubaho kwarwo, imiryango migari n’inzu z’imiryamgo zibigizemo uruhare, ariko idatsimbaraye ku mateka y’ibihe yabayemo, bimwe byanakururiye igihugu bibibazo, ibindi bikaba bitakijyanye n’igihe bitewe n’aho igihugu kigeze kiyubaka.

Kurinda igihugu kubyara ibihunyege

Kuva Gihanga yahanga igihugu cy’i Gasabo cyaje kubyara u Rwanda, intambwe ya mbere yateye ni iyo gufasha ibihugu 28 yasanze kuri ubu butaka byahanzwe mbere ye ndetse n’icye cy’i Gasabo kubyara abaturage bazi ubwenge, batari ibihunyege.

Ibyo yabikoze ahasaga mu wa 1100, ubwo yaremaga Politiki yo kuvanga amaraso kw’imiryango migari binyuze mu ishyingiranwa. Ni nabwo yafashe iya mbere agashaka abagore bane bo mu miryango migari itandukanye ( Umwenengwekazi, Abasingakazi babiri n’Umushikazi umwe).

Mbere y’uko Gihanga ahanga igihugu cy’i Gasabo, imiryango migari yarirondaga ku butaka bwabo ndetse no gushyingirana ku buryo wasangaga buri muryango wishakamo aho kujya kurambagiza abageni mu yindi miryango.

Aho ni ho wasangaga Abasinga bashakana ubwabo, Ababanda bikaba uko, Abungura bikaba, uko, Abazigaba bikaba uko, noneho ugasanga ibihugu byabo byuzuyemo ibihunyege gusa, kwiyungura intekerezo z’ihangabuhanga zarema ibiteza imbere igihugu zikaba ingume, bitewe nuko bizwi neza ko gushakana kw’abafitanye isano ya hafi bituma havuka umwana utuzuye cyangwa ufite ibyo abura mu mitekerereze ye.

Igikorwa cy’inyamibwa cyo gushyingirana kw’imiryango migari Gihanga yakoze ku ikubitiro ry’ingoma ye, kiri muri bimwe imiryango migari ikwiye gusigasira, ikakibungabunga kandi ikagikomeza.

Kurema ubumwe bw’abenegihugu
Imiryango migari, niyo yonyine ifite urufunguzo rwo gusigasira ubumwe bw’abenegihugu kurusha izindi gahunda zose Leta yashyiraho.

Nk’uko imiryango migari yagize imbaraga mu kurema no kubaka u Rwanda, ni nayo ikwiye kwiyumvamo ko yagira n’uruhare runini mu kubaka ubumwe bw’Abanyarwanda.

Nta bwo bigoye kuko n’ubundi tubirimo, igisigaye ni ukubinoza no gukarishya bigahama koko. Ubumwe buremwe n’imiryango migari, bushingira ahanini ku bihango byaremwe n’abakurambere mpangarwanda byabahambiriraga mu bumwe no mu rukundo.

Ibyo bihango n’ubundi byakomeza bigashimangirwa, abagize imiryango migari bakabyibutswa, bityo bikarushaho gushimangira ubumwe bwabo.

Ibyo imiryango migari yakwitaho mu kubaka ubumwe bw’Abanyarwanda, hitaweho igihe rugezemo, harimo gushyingirana, kugabirana inka, gusangira ubuyobozi n’umuyobozi, gusenyera umugozi umwe mu kubaka igihugu nta gasigane, kurema imishinga ihuriweho na bose hadashingiwe ku muryango, ahubwo hagashingirwa ku bushaka n’ubushobozi, gusangira gupfa no gukira mu kurinda igihugu no kukirasanira n’ibindi.

Gusangiza abandi umurage umuryango ufite
Bitewe n’uko u Rwanda rwagiye rwubakira ku murage waremewe mu miryango migari, hari byinshi bikenewe mu kubaka igihugu usanga umuryango uyu n’uyu ufite ariko ugasanga indi miryango itabifite.

Ni ho dusanga bafite umurage w’Abacurabwenge bari bafite inshingano zo kubungabunga amateka n’intekerezo z’igihugu, bagomba kubisangiza abandi bakamenya amateka n’intekerezo z’igihugu abaturage bakaruhsaho kumenya iyo bava, bagategura iyo bagan.

Abandi bavutse ari abayobozi b’igihugu bikaba uruhererekane bakaba bakwiye kubitoza abandi bakamenya ubwiru bw’imiyoborere y’u Rwanda, abandi baka barabaye ingabo z’igihugu mu buzima bwabo bwose, bakaba bakwiye gutoza benshi intekerezo z’ihangabuhanga zihishe mu ngabo z’u Rwanda, ndetse n’abafite umuzi w’ubuvuzi gakondo buvura indwara zananiwe ubuvuzi bwa kizungu, bakabitoza abandi.

Aho ni ho hakwiriywe kurebwa ibyo umuryango mugari uyu n’uyu usigaranye mu murage wawo byagirira igihugu akamaro ukabisangiza abandi bo mu yindi miryango migari, ku buryo mu myaka iri imbere uzasanga igihugu kigwije abaturage bahuje imyumvire n’ubumenyi bungana mu kubaka igihugu.

Inzu z’imiryango zishingirweho mu kuremera igihugu abaturage beza
Kuva na kera umuryango muto ari wo wakunze guhabwa inyito y’inzu yo kwa kanaka, ni wo wabaye ruharirwa mu kurema umuturagihugu u Rwanda rushaka. Inzu z’imiryango nizo ruhumbikiro rw’abazungura b’umushinga wo kubaka u Rwanda.

Uburezi n’uburere byose bitangirwa mu muryango, ni naho basakariza imiziro yageza kure habi umuryango mugari n’igihugu muri rusange.

Imiryango mito cyangwa se inzu z’imiryango, nizongere zishingirweho politiki yo kuremera igihugu abaturage beza, bazira icyaha n’igisa na cyo, abaturage bamenyereye ubutarushwa n’ubutaneshwa, abaturage bigirira icyizere cy’ahazaza, abaturage biyumvamo ubuhangange kuruta abandi bose baboneka hirya no hino ku isi.

Imiryango nihabwe ubushobozi bwo gukemurirwamo ibibazo by’ibanze igihugu cyagira, imanza zimwe na zimwe zikemurirwe mu miryango nk’uko byahoze, kuko ni nabo baba baziranye kuruta umucamanza wo mu rukiko.

Imiryango ifashe bikomeye kurema ubutabera bushingiye ku ntekerezo z’ihangabuhanga kuruta ubushingiye ku mategeko.

Kubakira ku bumwe bw'imiryango migari y'Abanyarwanda ni inkingi ikomeye y'iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .