Impamvu nyamukuru yo gushinga urugo ikwiye kuba iyihe?

Yanditswe na Pastor Desire Habyarimana
Kuya 30 Ukwakira 2019 saa 03:43
Yasuwe :
0 0

Hari ikibazo kimaze kuba nk’icyorezo, ni icyo gutandukana kw’abashakanye. Ntibikiri ibidasanzwe kuko ijanisha ry’ingo zitandukana rirushaho kuzamuka uko iminsi igenda ishira.

Imibare yo mu Ugushyingo 2018 igaragaza ko hari hamaze gucibwa imanza za gatanya 1311, ni ubwikube bw’inshuro 19 ugereranyije n’umwaka wa 2017. Mu 2016 ingo zatandukanye zari 21, mu 2017 ziba 69.

Mu by’ukuri ugenekereje wavuga ko icyiciro cy’ingo kirwaye ku buryo bugaragarira umuntu wese, kuko abajya kwandikisha ingo bahurira hamwe n’abajya gusaba ubutane.

Ibi ntibiri mu mugambi w’Imana na gato. Ubusanzwe twari tumaze kumenyera ko wenda biba mu bihugu bindi ariko n’iwacu bimaze gufata indi ntera. Biba agahomamunwa rero iyo bibaye ku bakirisitu.

Ese impamvu y’ubukana bw’iki kibazo ni iyihe?

Ntawavuga yeruye impamvu zose zitera ikibazo cy’amakimbirane mu ngo gusa bishobora kuba biterwa n’uko aba bakirisitu bajya gushinga ingo batabanje gutekereza ku cyo bagiye gukora, bigatuma bubaka izidashingiye ku Mana.

Ubundi urugo ni umushinga Imana yatangirije muri Edeni ku bwa Adamu na Eva.

‘‘Uwo muntu yita amatungo yose n’inyoni n’ibisiga byo mu kirere n’inyamaswa zo mu ishyamba zose ariko umufasha umukwiriye yari ataraboneka. Uwiteka Imana isinziriza uwo muntu ubuticura arasinzira, imukuramo urubavu rumwe ihasubiza inyama.’’ [Itangiriro 2:20-21]

Urabona hano Adamu amaze kwita inyamaswa zose, yari wenyine, Imana imwitegereje ibona si byiza ko aba wenyine, hari ikintu abura, ihitamo kumuha umufasha umukwiriye. Ushingiye kuri aya magambo ntabwo gushinga urugo ari ibintu byo kunezeza amarangamutima gusa y’urukundo, ahubwo ni umushinga Imana yatangije kuva kera kugira ngo yuzuze umugambi wayo.

Ubwo bivuze ko uwo washaka wese yakubera umugore, ariko uwo Imana ishaka ni we wakubera ugukwiriye. Ijambo ry’Imana riravuga ngo ‘‘Urugo n’amatungo umuntu abiragwa n’ababyeyi be ariko umugore witonda amuhabwa n’Uwiteka.’’ [Imigani 19:14]

Hari ibyo abantu bita urukundo ariko wenda rimwe na rimwe binashingiye ku marangamutima, nayo ubwayo yangiritse kubera ibifatika umwe muri bombi abonye ku wundi. Bene ibi iyo bishingiweho biba bifite igihe gito kuko bya bintu birashira.

Niba urugo rwanyu rushingiye ku kazi keza, imodoka nziza, n’ibindi bizarangira kandi ntibizarusiga buri wese akwiriye gusubira mu rufatiro rw’urugo rwe akareba ko ibyo yubakiyeho bizarama umunsi imiyaga yaje.

Ibi bimeze nka kumwe Yesu yaciye umugani w’umuntu wubatse inzu ye ku musenyi, yahungabanywa ikagwa, ariko umunyabwenge wayubatse ku rutare twagereranya na Kirisitu, naho imivu yatemba, imiyaga ikaba myinshi azamera nka wa muririmbyi ngo ntabwo imivu intembana, kuko Yesu niwe nihishemo yambereye ubuhungiro.

Imana ihe umugisha abubatse ingo n’abatarazishinga muzubakirwe n’Uwiteka iz’umugisha!

Ese wowe usanga impamvu nyamukuru yo kubaka urugo ari iyihe?

Pasiteri Habyarimana Désiré ni umuvugabutumwa mu Itorero rya ADEPR

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza