00:00:00 IGIHE NETWORK KN KINYARWANDA EN ENGLISH FR FRANCAIS

Imigirire ikwiye kugororwa mu misango yo mu bukwe

Yanditswe na Anastase Rwabuneza
Kuya 10 August 2023 saa 08:07
Yasuwe :

Ubwanditsi: Ibikubiye muri iyi nyandiko ni gitekerezo cya Anastase Rwabuneza, Impuguke mu Itumanaho akaba n’Umusomyi wa IGIHE.

Mu ikoraniro rya benshi, mu kiganiro cy’abari mu rugendo, mu karuhuko k’abasangiye umurimo, cyangwa se aho bicira akanyota; ibitekerezo by’abashima n’abanenga, abijujutira ibyo bagaya n’abasingiza ibyiza, biba byisukiranya cyane.

Hari ingingo iherutse kungwa mu gutwi, impa igitekerezo cyo kwitegereza no kwerekeza ibiganza kuri mwandikisho ya mudasobwa, ngo mbasangize bimwe mu binengwa mu bukwe bw’ubu, bibera mu muhango wo gusaba no gukwa, bikeneye gukosorwa ngo bijyane n’igihe kandi bititaruye Umuco Nyarwanda.

Gusobanya kw’abasenga n’abanyamisango

Abashyitsi baravunyishije, umuryango w’umukobwa utanze ikaze, maze bashyike mu byicaro bateguriwe mu kwinikiza ibiganiro, umuhuza w’amagambo n’umusangwa mukuru bamenyeshe umuryango uje ubagana ko hari indi gahunda babasanzemo ariko ko biteguye kwakira inkunga y’ibitekerezo ku ngingo baganiragaho.

Mu gihe bakunze kuvuga gahunda zijyanye n’igihe barimo nk’umuganura, imihigo y’iwabo, umunsi mukuru wa Noheli cyangwa Ubunani,… uwateguwe gusenga iyo ahamagawe, mu isengesho rye akenshi aterura agira ati “Mana tugutuye ubukwe bw’abana bacu…”

Nyuma iyo umushyitsi ahawe ijambo, agorwa no kubona aho ahera kuko aba yibaza niba ari bukurikire ibyavugiwe mu isengesho cyangwa gahunda babwiwe mbere.

Inama ikwiye ni uko mu gutegura imisango, buri ruhande rwategura mu rwego rwo kwirinda gusobanya.

Gusomanira mu ruhame

Imisango irarimbanyije, umuryango w’umukobwa umaze kwerekwa umusore basabira, na we ahabwa icyicaro yateguriwe. N’uko umusaza asabe mugenzi we ko yabwira umukobwa na we akaza. Umukobwa nahagera, umusaza uhagarariye umuryango amushyikirize uwasabaga, na we ahamagare umuhungu kwakira kuramukanya n’uwo yakunze.

Muri uko kuramukanya, umuhungu n’umukobwa barahoberanye ndetse basomana ku munwa. Ibi ntibivugwaho rumwe kuko uretse kuba hari n’abo bitera isoni muri benshi mu bakuze, abakurikirana iby’aho uyu muco waturutse, banemeza ko gusomana ku munwa nk’indamukanyo ari ikimenyetso cy’uko ubuki bwamaze kunyobwa.

Kurya ubukwe bubisi

Nyuma y’uko bombi bahanye impano bateguye, bakanazishyikiriza inshuti n’imiryango baziteguriye, berekeza mu byicaro bateguriwe. Hari aho usanga umuhuza w’ibiganiro abasaba kwigira ejuru ngo basangire amafunguro yateguriwe uwo munsi.

Kubera ko biba mu muhango wo gusaba no gukwa, n’ubwo umukobwa aba yatanzwe, igihe cyo kumuhekera umuryango wamusabye kiba kitaragera. Bityo rero, gusangira batamikana icyo kirayi, agafiriti cyangwa intongo y’inyama, ababinenga babyita kurya ubukwe bubisi, bityo bikaba bidakwiye.

Abatahira basuzugura abasaza

Umukobwa aratanzwe, inkwano zirashimwe, abatahira bahawe rugari ngo bavuge amazina yazo.

Mu gihe bizwi ko amazina y’inka ari nk’ibyivugo cyangwa ibisingizo byazo, hari abatahira bahamagarwa kuzivuga, bagatinda mu kwivuga ubwabo no kwiyamamaza batanga nimero za telefoni wababonaho igihe ubakeneye. Hari n’abashyoma bakavuga ibihabanye n’inshingano bahawe, ugasanga bagira bati “umugore mwiza ntakarare umugabo…”. Rurangiza rero ikaba ikinyabupfura gike no gusuzugura usangana bamwe muri bo.

Umusaza mukuru ntabahaye inzoga y’abashumba, bati “reka reka, ibitugu byacu byikorera imitavu ntibyikorera inzoga”, bati “twikorera ibicuba ntituri abakorezi b’ibicuma”. Ibi bifatwa nk’ikinyabupfura gike imbere y’abantu bakuru.

Ko nta mutobe usaba umugeni?

Mu Kinyarwanda burya ngo nta mutobe usaba umugeni. Kera bashingaga igiti kirekire, uko inzoga zisaba umugeni zituwe, ingata zikambikwa icyo giti kugeza igihe zizagizasagukira. Ubukwe bwa none, zisa nk’aho ziturirwa rimwe.

Abo mu matorero adakozwa agasembuye, usanga bitwaje divayi na ya mitobe yo mu macupa maremare ariko bakajya bagira bati “Muvandimwe Naka, ngutuye iyi nzoga yo gusaba umugeni”.

Usanga hari abari mu by’ubu, bananze kurekura ibya kera, bibereye hagati aho. Niba atari ukwica umuco, ugize uti “nkutuye uyu mutobe…”; bitabaye ibyo ntiwakwemera ugatura inzoga, bikagira inzira.

Icyitonderwa: Bivugwa ko gukodesha umukwe mukuru, umusangwa mukuru, umuhuza w’amagambo, abatahira n’abandi bafite uruhare mu mirimo y’ibanze y’ubukwe ari bimwe mu bibatera gushaka kugaragaza ko amafaranga yishyuwe atapfuye ubusa, bigatuma biva inyuma ngo bemeze abitabiriye ubukwe.

Iyi mpamvu se yaba ari yo yonyine? Wowe ubibona ute?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .