Imicungire n’imiterere y’amashuri makuru yigenga mu Rwanda bikwiye kunozwa

Yanditswe na Dr. Gasana Sebastien
Kuya 16 Ukuboza 2019 saa 06:03
Yasuwe :
0 0

Kuri buri sosiyete cyangwa igihugu, uburezi muri rusange ni imwe mu nkingi zikomeye ibindi bikorwa byose byubakiraho. Uburezi kandi ni ikintu kigari ndetse kinitabwaho n’ inzego zinyuranye mu buzima bwa buri sosiyete.

N’ubwo bwose uburezi bushingiye ku mashuri buhera ku rwego rw’ibanze rukagenda ruhererekanya inshingano n’izikurikiyeho ku buryo bwisumbuye, muri aka kanya twifuje kuvuga gusa ku burezi mu mashuri makuru yigenga mu gihugu cyacu. Ibyo tuvuga bikaba bigamije gutanga umusanzu wacu muto ku cyatuma icyo cyiciro cy’amashuri kirushaho gukora neza no kuba cyatanga umusaruro mwiza wateza imbere sosiyete y’Abanyarwanda.

Muri iyi minsi hakunze kuvugwa ibibazo binyuranye mu mashuri makuru yigenga ( private Higher Learning Institutions) mu Rwanda, bishingiye, cyane cyane ku mikorere mibi ndetse bikagira n’ingaruka mbi ku ireme ry’uburezi buhatangirwa. Iyo umuntu yitegereje neza uko ayo mashuri akora, asanga ibibazo bihari biterwa ahanini n’imicungire mibi yayo ikunze kuhagaragara muri rusange.

Kudacunga neza umutungo w’ayo mashuri, cyangwa kuwukoresha ibyo utagenewe, bituma abakozi bamara amezi menshi badahembwa kandi ntibanabone n’ibindi umukozi agenerwa, nko gutangirwa umusanzu w’ubwitegenyirize bw’izabukuru, kutagira ubwishingizi bwo kwivuza, n’ibindi.

Haza kandi n’ikibazo cyo kutagira ibikoresho bihagije, kandi nyamara bikenewe mu kazi ka buri munsi, ndetse tutibagiwe hamwe na hamwe, no kutagira aho gukorera hahagije cyangwa hatunganye.

Umwe mu miti yafasha gukemura icyo kibazo ni uko minisiteri y’Uburezi yifashishije Urwego rushinzwe Amashuri Makuru (Higher Education Council–HEC) yarushaho gukurikirana imikorere y’ayo mashuri kandi igafata ibyemezo ku buryo bwihuse ku bibazo binyuranye bigenda biyabonekamo, ibyo bigakorwa hakiri kare, amazi atararenga inkombe.

Ikindi umuntu yavuga muri uru rwego ni ukureba uko itegeko rigenga amashuri makuru mu Rwanda ryasuzumwa kugira ngo harebwe niba koko rijyanye neza n’imiterere y’amashuri rireba.

Ibyo ndabivuga mpereye ko hari amashuri makuru amwe n’amwe usanga yarabaye kandi akagendera ku mategeko asanzwe agenga sosiyete z’ubucuruzi (companies) zisanzwe. Aha rero turatekereza ko uburezi ari ikintu gikomeye cyane ku buzima bw’igihugu no ku hazaza hacyo, ku buryo amategeko areba uburezi yakagombye kugira umwihariko wayo, aho kugira ngo uburezi bufatwe nk’ubundi bucuruzi cyangwa ubushabitsi busanzwe.

Hari ababona ko ibibazo binyuranye birangwa mu mashuri makuru yigenga muri iki gihe, bishobora kuba biterwa n’igabanuka, kubera impamvu zinyuranye ry’umubare w’abanyeshuri bayagana; maze nabyo bigatera igabanuka ry’amafaranga y’ishuri batangaga; ahanini ari nayo akoreshwa mu bikorwa bindi by’ishuri.

Ibivugwa bishobora kuba byagira ishingiro, ariko rero umuntu wakurikiye neza uko ibintu byagiye bihinduka mu rwego rw’Uburezi mu gihugu cyacu muri iyi myaka 25 ishize, yahamya ko abo bireba by’umwihariko bakagombye kuba barafashe ingamba zihamye mbere, kugira ngo ibintu ntibibe bimeze uko biri muri ibi bihe.

Mu rwego rwo gushaka ibisubizo byatuma umubare w’abanyeshuri wiyongera, ni ngombwa gutekereza byimbitse ku miterere y’amashuri makuru yigenga dufite mu Rwanda.

Muri gahunda igihugu cyacu gifite yo kugira iterambere rishingiye ahanini ku burezi, ntabwo twavuga ko turagera ku mubare uhagije w’abize amashuri makuru kandi baba umusemburo ukomeye w’iterambere. N’iyo urebye amashuri dufite, cyane cyane ayashizwe n’Abanyarwanda, usanga muri rusange, asa nk’ayibanda ku nyigisho zimwe, kandi nyamara hari ibice binyuranye by’ubumenyi bukenerwa mu buzima bw’igihugu tutabona ubu mubyo amashuri yigenga atanga mu gihugu cyacu.

Ibi rero birerekana ko amashuri yacu akeneye impinduka mu miterere yayo. Bikaba byaba byiza buri shuri rigize ibyo ryigisha byihariye kandi rikabinoza neza ku buryo buzobereye (différenciation et spécialisation), ibyo bikaba byanatuma umubare w’abarigana wiyongera kuko buri shuri ryaba rifite ibyo ryihariye ayandi ataba afite.

Ariko nabwo rero, iyo urebye uko amashuri yacu yigenga akora n’uko akorana, dushobora kuvuga ko kugira ngo iyo ntambwe izagerweho na none inkunga ya minisiteri y’Uburezi mu Rwanda ikenewe cyane, kugira ayo mavugururwa azashobore gukorwa kandi agerweho neza.

Mu magambo ahinnye, dusoza iyi nyandiko, twavuga ko twifuje kugaruka kuri bimwe mu bibazo ubu biboneka, muri rusange, mu mashuri makuru yigenga mu Rwanda n’uburyo byashobora gushakirwa ibisubizo. Twanerekanye uruhare rw’ingenzi minisiteri ishinzwe Uburezi mu Rwanda yagira mu gushaka umuti watanga ibisubizo byaba bikwiye, ku buryo burambye.

Dr Gasana Sébastien
Umwarimu wa Kaminuza n’Umushakashatsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .