00:00:00 IGIHE NETWORK KN KINYARWANDA EN ENGLISH FR FRANCAIS

Imbarutso y’indirimbo ’Imenagitero’ ya Rugamba Sipiriyani

Yanditswe na Padiri Rutinduka Laurent
Kuya 5 June 2022 saa 09:43
Yasuwe :

Mperutse gusoma inyandiko yasohotse mu kinyamakuru "IGIHE" tariki 3 Kamena 2022, yiswe "ibyo wamenya ku ndirimbo ya Rugamba Sipiriyani yise Imenagitero" numva ngomba kugira icyo nandika.

Umwanditsi iyi ndirimbo Imenagitero yayihaye igisobanuro yibanda ku buhanuzi. Ku byo yasobanuye ntacyo mbivugaho, gusa njye ndibanda mu magambo makeya ku mbarutso y’iyi nganzo ya nyakwigendera Rugamba Sipiriyani (1935-1994) n’umufasha we Mukansanga Daphrose (1944-1994).

Ndabwira abasomyi ko kumva neza iyi ndirimbo ikanakuryohera, hari ibyo ugomba kumenya nko kumenya igihe iyi ndirimbo yahimbiwe, ari cyo mu 1977. Gusa Rugamba yayinogeje nyuma gato.

Icyatumye Rugamba ahimba iyi ndirimbo, ni uko yari yiyunze n’umugore we Mukansanga Daphrose kuko umugore yari amaranye agahinda igihe kinini.

Rugamba yari amaze iminsi mu mahanga ntiyibuke urugo, kandi yaramusigiye abana bato. Uw’uburiza yavutse mu 1967, bose bari bakiri incuke, hari n’uwari ku ibere witwa Cyezamutima Rugamba Cyrinus Cyrdy.

Imenagitero ni Rugamba Sipiriyani ubwe wivuga, ariko mu ijwi rya Daforoza uririmbana agahinda k’umugabo we udaheruka mu rugo kandi umugore amukunda, amuhekeye abana bose bamukumbuye.

Rugamba yari yarataye inshingano ze, ariko guhera mu 1982 yarikosoye, arahinduka, ahura n’Imana maze Roho Mutagatifu amusesekazaho ingabire ze na we arazakira.

Guhera mu 1982 Rugamba yiteguye gutaha Yeluzalemu Nshya (niyo ndirimbo ye ya nyuma, yayihimbye muri Werurwe 1994). Yishwe muri jenoside tariki 7 Mata 1994, we n’umugore n’abana babo batandatu.

Mukansanga Daphrose rero yasengeye umugabo we ahinduka mu 1982, ariko iyi ndirimbo yari ihari.

"Imenagitero" ni Rugamba wiririmbye ubwe avuga agahinda yateye umugore we Daforoza. Kugira ngo amushimishe rero yishyize mu ijwi ry’uwo mufasha we.

Nyuma y’imyaka ine, Rugamba yisubiyeho by’intangarugero. N’ubu nubwo atakiriho, kuva mu 1982 kugeza 1994 yabaye intangarugero mu bakristu.

"Imenagitero" ni indirimbo y’agahinda k’umugore mwiza, ukumbuye umugabo we kandi amuhekeye abana bose bamukumbuye. Abana bifuzaga ko se ataha ngo bamuhobere, bamusekere, bamutetere.

Umugore nawe Daforoza yahoraga yifuza ko umugabo we yataha, (agahora abirota) akifuza ko na we yahobera umugabo we nk’abandi bagore, akareka kuba mu rugo rwa wenyine, akareka kwisegura no kwipfumbata kandi yarashatse.

Murakoze. Ngaho muyumve ibaryohere.

Rugamba Cyprien n'umufasha we Daphrose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .