Ikiganiro na Shitani

Yanditswe na Ntwari Pie
Kuya 5 Kanama 2020 saa 11:09
Yasuwe :
0 0

Hari mu rukerera rwo kuwa Kane ejobundi, ababukereye bose bakerakera kuko hari hataracya neza. Ngize ntya numva isi iritsamuye. Yego! Ni isi numvise yitsamura, inkuba ziresa ntazibona, umutingito uratinda, isi iratontoma ngira ngo ndarota ariko kuko nari nabanje Imana mbere y’umuseke, ndavuga nti ntacyo nkibaye Ntwari mu ngabo!

Ku wa Gatanu amasaha nka ya yandi nsubira neza neza mu mudugudu w’Amajyambere, mu kagari ka Rukiri ya mbere mu murenge wa Remera aho isi yari iherutse gutontomerera. Birongera biba kwa kundi.

Kuko nta handi byari byakabaye, nshakisha impamvu. Mbona ikintu-runtu kinganya amaboko inginga z’ibiti kifashe ku itama. Ndacyegera ndakibaza nti ’uri igiki?’ Kiti ’si ndi ikintu ndi Shitani’. Nti ’ngize Imana ubwo nkubonye, cyo ngaho mbwira niba ufite iminota ibiri nkwibarize! Aho nakaguhereye nguhiga wibera aha?’

Ikiganiro gitangira ubwo:

Njye: Nonese Shitani wo kabura idini we, uduhora iki?

Shitani: Ntacyo mbahora nimwe mwiroha mu byo mutazi, mugahwinina kugeza murohamye.

Njye: Ko wifashe ku itama se ni amahoro cyangwa nawe ugira agahinda?

Shitani: Amahoro? Oroha nze nkubwire:

-  Agahinda kamaze kumpindanya kubera gahunda u Rwanda rwadukanye.

-  Agahinda kamaze kumpindanya kubera abahungu bigize inkungu

-  Agahinda kamaze kumpindanya kubera ko ntawutakimpangara

-  Agahinda kanjye ariko gasongorwa n’ibizongwe bizonga u Rwanda ntibirenge umusozi.

Njye: Nonese hano urahakora iki Nyakugira Imana Shitani?

Shitani: Mbere natumaga abagaragu banjye abayoboke bakanzanira abantu-mbwa. Ubu nsigaye nza kubishakira.

Njye: Igihe bakagendeye nari nzi ko ubijyanira; ariko niba bakunaniriye iwawe se, wahabatsinze bwa kabiri ko wabatsinze mu isi? Ubu ugiye kujya wirirwa ubunga n’ubwo buhangange ngo urashaka abantu batari imbwa?

Shitani: Nabatumaga intumwa za nyamunsi zikanzanira ibisenzegeri n’imirambo y’ababaga barapfuye bahagaze.

Njye: Shitani wica amarenga! Harya ubwo uravuga abo mu Rwanda cyangwa abo hirya y’imbibi?

Shitani: Ba hose.

Njye: Bande abo?

Shitani: Ruzungu uramuzi? Rusunzu uramuzi? Mavure na Mpengeri, Biyiko uriya na Kabwera k’uruhara n’impare?

Njye: Ndabazi bose. Bakunaniye bate se?

Shitani: Nyamunsi yanzaniye Mudacumura n’abambari be ndashima naho ni inshombabyumba yari azanye. Nta kiyiko kikiba ku meza, abacuzi bararushye, imivuba ndayivuma ubu turisha intoki.

Njye: Naho se abandi bakugize iki?

Shitani: Bose ni amasiha barasahura.

Njye: Ni nabo bizongwe byazonze u Rwanda se bitarenga umusozi?

Shitani: Winzimuza ntari umuzimu sha. Ibizongwe nabihaze ngiye kujya mu bizungerezi.

Njye: Ariko Shitani wincisha irya n’ino? Hari umusozi se ugiye kugira ikibaya uzabibashishe kuwurenga?

Shitani: Iyaba u Rwanda rutagiraga Imana kabiri ruba ruyobowe na Nyamunsi.

Njye: Nyamunsi nde?

Shitani: Uramushakira iki ko iminsi ikiri mibisi?

Njye: Hummmm!

Shitani: Urahigima ibiki ko nzabahagama! Ariko biranagoye guhagama ibihame nk’Inkotanyi. Muri 90 zitera nohereje Marufasi asanga zifite ishapure, ni uko zinanira Ikinani. Zitsinze urugamba nohereza Belphegor ngo azinebweshe ziramuhema, ubu nohereje Berizebubu na Mamoni, Kagame azitega nzira Rutaremara na Biraro turumirwa, ubu rero ngomba kwiyizira.

Njye: Shitani se nyakugira Imana urabona uzaronka?

Shitani: Nta maronko inkokora zikomba. Nawe se, ko mbona n’ingeragere iyo nziboheye Mageragere zibohorwa! Ubuse usibye kuboha umusambi nkiyicarira aha… hum!

Njye: Ngaho mbwira aha waje gukora iki?

Shitani: Naje kuburira umukazana wanjye ngo ejo atongera akaburwamo akaza amarabira nkamuziza icyo.

Njye: Niba ushaka se ko yihana, aho umanukira wakihanukiriye ukamumanukana.

Shitani: Uyu ni mwene Mahomvu, abambari banjye sinabakira.

Njye: Shitani rero dore burakeye, reka nigendere Malayika atansanga aha akampora icyo.

Shitani: Kagende bukwirireho.

Njye: Urampora iki se nyakugirimana? Ese ubundi ko waruntuyeho isi?
Shitani: Ni kuriya nitsamura, wagize amahirwe wari wabanje Imana!

Njye: Kagire Imana. Nonese nawe urabizi ko iyo twabanje Imana tuba tukurangije?

Shitani: Iyo Mana ushaka kumbwira yantonesheje Itaratekereza kubarema. Nabaye umugabo mukuru wo mu kanama ngishwanama ku iremwa ryanyu. Genda va muri ayo!

Njye: Nonese uzagaruka hano ryari ngo nze nkubaze ibindi bibazo?

Shitani: Mbaza kimwe gusa?

Njye: Ni iki unenga uru Rwanda?

Shitani: Mbanenga kurarikira ubwo mwarikiwe. Nimutuze Imana yabatunze inkoni sinabatunga intoki.

Njye: Nyuma ya ba bandi uze gukomeza Nsabimana Deogratias alias Castar, udutahirize Nyiricyubahiro Mirengo n’umunyagisaka Rwagafirita, ugire vuba uze ucyure Mfuruta, Kayigimba, Karembo, Ka Kabiligi n’abambari babo.

Ibikubiye muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .