Ikibazo cy’abakoresha batubahiriza amasezerano giteye impungenge

Yanditswe na Dr. Gasana Sebastien
Kuya 8 Werurwe 2019 saa 05:04
Yasuwe :
0 0

Nta cyumweru gishira umuntu adasomye cyangwa ngo yumve kuri radiyo cyangwa televiziyo zinyuranye ibibazo by’abantu bakora ariko abo bakoreye ntibabishyure amafaranga, nk’igihembo, baba basezeranye ndetse no mu gihe kiba cyarateganijwe. Imyitwarire nk’iyi kandi mu gihe cyose igaragaye igira ingaruka zinyuranye ku bantu baba barenganijwe.

Birumvikana ko iyo umukozi ahawe akazi n’umukoresha kandi bakumvikana icyo uwo mukozi azahembwa mu gihe iki n’iki, cyangwa se igihe arangije neza akazi yakoraga hanyuma ntahembwe, umukoresha aba ahemukiye umukozi kuko aba atubahirije amasezerano bagiranye.

Iyo umukozi rero atabonye ibyo yagombaga kandi yari abitegereje, ibyo bimugiraho ingaruka mbi zinyuranye ndetse bikaba byakurura n’ibibazo bitandukanye mu muryango we; cyane cyane iyo we n’abe ari ku gihembo cyangwa umushahara aheshwa n’umurimo akora bari batezeho ikibatunga.

Umukozi udahembewe ku gihe nawe hari ubwo bituma atubahiriza amasezerano aba yaragiranye n’abamuhaye umwenda (urugero nka banki) cyangwa se ntabashe kwishyura amadeni aba yaragiye afata mu bandi bantu banyuranye, nk’abacuruzi, bashobora kuba baramuhaye ibyo akoresha mu rugo rwe, aba yateganyaga kwishyura nawe yabonye umushahara cyangwa igihembo yakoreye. Ibi byose, kimwe n’ibindi bibazo nk’ibyo rero bibangamira, muri rusange, imibereho myiza ndetse n’iterambere ry’umukozi.

Uretse abantu bikorera ku giti cyabo cyangwa se ba rwiyemezamirimo bikunze kugaragara ko, hirya no hino mu gihugu cyacu, bamwe muri bo batubahiriza amasezerano mu guhemba abantu baba babakoreye, ikirushaho gutangaza no gutera impungenge ni uko hari ubwo usanga hari n’ibigo bishamikiye kuri Leta bibonekamo imikorere mibi nk’iyo. Nyamara tuzi ko ubusanzwe Leta idatangira igikorwa iki n’iki itamaze no guteganya aho amikoro azava.

Imyitwarire mibi yo kutubahiriza amasezerano no gukora nk’aho ingorane uteje urundi ruhande ntacyo bikubwiye; kandi nyamara biboneka neza ko izo ngorane akenshi nyine zinatera imbongamizi ku buryo bw’uruhererekane muri sosiyete, ni ibintu bisa nkaho ubu bigenda byiyongera.

Nyamara ntitwabura kuvuga ko imyitwarire idakwiye nk’iyo inyuranye n’indangagaciro ziranga, cyangwa zakagombye kuba ziranga Umunyarwanda.

Ari umukozi n’umukoresha bose bakwiye kwitwara uko bikwiye kugira ngo buri wese ku ruhande rwe abone icyo akwiye kandi arusheho gutera imbere mu mibereho ye. Uretse kugira ingaruka mbi, ku buryo butaziguye, ku muntu ku giti cye, biranashoboka ko imyitwarire mibi nk’iyo, iramutse “ihawe intebe” muri sosiyete, yagira n’ingaruka zitari nziza ku iterambere ry’igihugu, muri rusange.

Dr Gasana Sebastien, Umwarimu n’umushakashatsi muri Christian University of Rwanda (CHUR)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza