00:00:00 IGIHE NETWORK KN KINYARWANDA EN ENGLISH FR FRANCAIS

Icyo ntekereza cyatuma imvugo irushaho kuba ingiro mu 2022

Yanditswe na Kwezi Jean
Kuya 20 December 2021 saa 10:18
Yasuwe :

Kera abakurambere iyo babaga bataramye, kimwe mu byo bitonderaga kwari ukuvuga ijambo utasubiramo cyangwa guhiga umuhigo utazahigura.

Ngo iyo wahigaga umuhigo ntuwese, wasomaga ku ntango y’ubugwari kandi ukayisoma rubanda wahize bakumva bari aho. Ikigaragara ni uko ubugwari n’umugayo byabaga ari ibintu bibi mu muco w’Abanyarwanda ari na byo bintera kwibaza impamvu uyu munsi wa none abantu bamwe kugira umugayo ubona ntacyo bibabwiye.

Nteruye igitekerezo cyanjye nkuruwe n’amarangamutima nagize ubwo nakurikiranaga ibiganiro Umukuru w’Igihugu, Perezida Paul Kagame, yagiranaga n’abatorewe kuba mu Nama Njyanama z’uturere mu birori byo gusoza umwiherero abo bayobozi bari bamazemo iminsi i Gishari mu Karere ka Rwamagana.

Ubwo nakurikiranaga icyo kiganiro kuri Youtube, umugore umwe mu bajyanama b’uturere yafashe ijambo ashimira Perezida wa Repubulika.

Yavuze amagambo meza nanjye nk’umunyarwanda uzi ibikorwa by’indashyikirwa byagezweho mu myaka 27 ishize navuga ndetse nkarenza. Perezida wa Repubulika Paul Kagame yungamo agira ati “Ni byiza gushima ariko iyaba mwanyumvaga! Mugerageze rwose munyumve.’’

Nasubiyemo kenshi iyo video ndimo gukora ubusesenguzi ku cyo Umukuru w’Igihugu yashakaga kuvuga mu buryo bwagutse asaba abo bayobozi kujya bamwumva. Icyo naje gusobanukirwa ni uko abayobozi mu nzego za Leta n’izigenga kenshi iyo bahawe imyanya baba bizewe kandi bigaragara ko bashobora inshingano bahawe ariko nyuma bamwe icyizere bagiriwe bakagihindura imfabusa ntibatange umusaruro bari bitezweho.

Iyo bahawe imyanya barabyishimira ndetse benshi ku mbuga nkoranyambaga nka Twitter, Facebook n’izindi bagaragaza amarangamutima yabo bashima Perezida wa Repubulika wabagiriye icyizere, bakongeraho ko batazamutenguha.

Ibi ubwabyo ni indahiro ikomeye bikaba n’igihango umuntu ubivuze adakwiriye gutatira by’akarusho barahirira imbere y’abayobozi bakuru barimo Perezida wa Repubulika, Urukiko rw’Ikirenga, Inteko Ishinga Amategeko na rubanda.

Icyiza rero ni uko bene abo badakwiriye guhirahira batatira icyo gihango ahubwo bagakorera Abanyarwanda neza. Bene aba bakwiriye kumenya ko iyo batabaye inyangamugayo ku ndahiro barahiye baba bangije byinshi.

Ikindi ni uko imihigo n’indahiro bidakwiriye kugarukira gusa ku bayobozi tubona bahabwa imyanya mu nzego runaka ahubwo no muri sosiyete muri rusange bitewe n’icyo umuntu akora, imvugo n’intego byakagombye kuba ingiro.

Kenshi njya numva ko ngo hari abananizwa mu nshingano zabo ariko ibyo ntibikwiye kuba urwitwazo kuko kenshi bamwe babivuga ari uko bavuye ku buyobozi. Ku bwanjye uwahawe inshingano abonye atangiye kunanirwa cyangwa kunanizwa yakwisunga uwamugiriye icyizere akamusaba inama yatuma asohoza neza inshingano.

Umuntu agize intege nke akazi kakamunanira na bwo yaba inyangamugayo akagasezera ariko nibura agaragaje icyabaye imbogamizi kugira ngo n’uwamusimbura bizamubere isomo ryatuma akora neza.

Ntabwo nk’Abanyarwanda bakunda igihugu dukwiriye kuba abantu barebera ibipfa dusa n’ababihariye abayobozi gusa ahubwo dukwiriye natwe kugaragaza uruhare rwacu dutanga umusanzu wo gutunganya no gukosora ibitagenda neza buri wese ku ruhembe arwaniraho.

U Rwanda ruzatezwa imbere no gukorera hamwe kwacu tutitana bamwana mu bibazo byose byugarije Umunyarwanda. Ikiruta byose dukwiriye kubaka umuco w’ubupfura n’ubunyangamugayo mu byo dukora ku neza yacu ya none no ku y’abazadukomokaho.

Dukwiriye kwiga gushima ibyakozwe tugatanga ibitekerezo byubaka mu ituze ku bindi tubona byakorwa cyangwa byakosorwa bityo iterambere rigakomeza gusugira.

Ngarutse ku cyo Perezida wa Repubulika Paul Kagame yasabaga uwari afashe ijambo mu mwiherero n’amahugurwa y’abajyanama b’uturere ashima nyuma akamwunganira amubwira ati ’iyaba mwanyumvaga’, dukwiriye kuba Abanyarwanda bumvira kandi bahiga imihigo bazahigura. Burya birababaza kugirira umuntu icyizere nyuma kikaba kimwe kiraza amasinde.

Abanyarwanda muri rusange dukwiriye gukomeza kwiga umuco wo kumva no kumvira abayobozi bacu cyane cyane Perezida wa Repubulika kuko twamutoye tubikunze kandi twiteguye kumushyigikira mu rugamba rw’iterambere ryacu cyane ko muri we imvugo yagaragaje ko ari ingiro kuva yajya ku rugamba rwo gushakira amahoro n’iterambere Abanyarwanda.

Ndasoza nsaba Abanyarwanda bene wacu baba abari mu gihugu n’abandi bari mu mahanga bose ko umwaka utaha wa 2022 n’indi izakurikira dukwiriye kujya duharanira kugera ku ntego zo kwiyubaka no kubaka igihugu cyacu.

Ku bufatanye bwacu Abanyarwanda twese, baba abari mu gihugu no hanze yacyo, ubumwe bwacu ni yo ntsinzi yacu izakomeza kutugira ibihangange ku ruhando mpuzamahanga.

Harakabaho Abanyarwanda n’u Rwanda rwacu.

Noheli nziza n’Umwaka Mushya muhire wa 2022 ku banyarwanda mwese aho muri hose ku isi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .