Ibaruwa ifunguye ku nshuti y’i Nyaruguru

Yanditswe na Ntwari Pie
Kuya 17 Gashyantare 2020 saa 08:45
Yasuwe :
0 0

Bwana nshuti y’i Nyaruguru,

Nkwandikiye uru rwandiko mbizi neza ko ruzakugeraho ariko ko utazabasha kunsubiza. Ndakumara impungenge ko ntazategerezanya amatsiko igisubizo ku bibazo nshaka kukubaza.

Njye n’iyo utansubiza ugasubiza agatima impembero naba nyuzwe. Nshuti yanjye rero, twakubuze tugufite, turagukumbura, aho ugarukiye udukinga rwa rukingo mu maso, none ngo wongeye kugenda? Mbigize nte?

Reka nkwandikire kandi Indinde kuba Umushinjacyaha. Ibyo nibaza nzi ko wari ufite ibisubizo byabyo mbere na kare.

Tubiziranyeho ko umuziki ari uruhurirane rw’amajwi anogeye amatwi. Iyo urwo ruhurirane runyuze amatwi, nibwo tuvuga ko umuziki ari mwiza; rwagera ku matwi rutanoze bikarugira umuziki mubi.

Rimwe na rimwe umuziki mubi iyo noneho urengeje igipimo, ubabaza ingoma z’amatwi kugeza aho wanarwara umutwe ukomeje kuwumva. Hari andi majwi ababaza amenyo nk’iyo umufuniko w’icupa rya Fanta cyangwa Skol ukuruwe ku ibati cyangwa hasi kuri sima. Amenyo arababara ugatakambira nyir’ugukora ibyo ngo abireke. Abikomeje ubutarekera yaba akwica urubozo.

Nshuti nziza y’i Nyaruguru, by’umwihariko nshuti y’akadosohoka y’umuziki,
mu magana y’imirimbo y’uruhererekane rw’inganzo izimije ariko inoze, twese twabonye ubutumwa bwiza kandi bwubaka igihugu, umutima wa benshi unyurwa n’ubuhanga buri mu ruhanga rwawe.

Kuki waduhishe ko muri urwo ruhanga ari naho hahishe ifuni ibagara mukushi? Kuki bwa bupfura wabupfunyitse mu bapfu kugeza ubwo wiyorosoye ishema ukiyorosa icyasha? Kuki igiti cy’umunezero wari warateye cyamezeho umuze, aho kuwuzibukira ukemera ko gishora imizi mu muziro kugera ishotse mu muziki, uzi ukuntu biryana mu matwi no mu menyo?

Mu ndirimbo y’igihugu, wahimbawe kenshi bihimbaza benshi, uratera turikiriza kuko wari Kizihirabose. None se wareshyaga abantu mu ndirimbo ibubahisha? Byari iki se ubwo? Hari aho wageraga ugashyira urushyi ku gifu, ukarangurura mu ijwi riyunguruye uti ’Ngobyi iduhetse gahorane ishya.’ Niko se nshuti y’ijwi: Iyo ngobyi iduhetse, ishya wayifurizaga ni irihe?

Ukongera uti “…baraguhanga uvamo ubukombe, utsinda ubukoloni na mpatsibihugu…!” Ndabaza: none se rwatsinda mpatsibihugu rukananirwa gutsinda izo mpugu zisunga abahungu b’amahugu?

Nshuti ya Piano, nibyo se koko ngo abagusanze wasumye ubasanga, wibeshya ko ruswa yabatsirika ukuri? Cyangwa ni ibihuha? Mbwira.

Nonese nshuti y’inanga, mbwira! Si wowe wivugiye iby’intare yagukuye mu rwobo? Uti “wampaye agaciro, undinda umupanga, uri umutabazi?”

Yari yakwimye iki se ujya kuyikora mu jisho bwa kabiri? Inuma yawe nziza y’urukundo n’amahoro mu bantu, ikaba iyo gusaba imbabazi no kuzihabwa, ngo waba warongeye kuyirushya?

Ko udatukana uyitinyukira iki? Ubwa mbere wisabiye igihome mu ruhame, abahwihwisaga ibisa n’ibisakuzo basarikwa imitima. Intare yanga kuguhomba iraguhombya. Wemera icyaha, ushimwa kutarushya Imana n’imanza, uhabwa ingeri mu bwami bw’i Mageragere, uba ingeragere.

Umaze imyaka ine ya numa ikubita ibaba ry’imbabazi irakwizera, Intare irakubabarira. None se mwana w’i Nyaruguru, ni iki kigurumana mu kuguru kwawe gituma uhorana ikoti ry’imbeho y’i bwotamasimbi? Gituma wambikwa inkindi ukanaga hirya ugakunda ubucocero?

Ni wowe wiririmbiye uti “Usaba Yezu ntavunika, iyo aganisha ku rukundo.” Twaremeranyije nk’abayoboke ba Kiliziya imwe. Niko se ntama ya mwungeri: ko ushobora kuba wari ugiye kuvunika cyane? Ko nabonye mu mitungo yimukanwa wari witwaje harimo na Bibiliya, gusabira u Rwanda ibyiza ufatanyije n’Abanyarwanda byagucaga intege?

Nkeke se ko wari ugiye gufatanya n’impugu z’amahugu kurusabira? Ko uzi neza ko amasengesho yabo ku Rwanda ataganisha ku rukundo, wavunwaga n’iki kandi ubizi ko atazagera kuri Yezu?

None se Nkuba y’amashyengo, wanyemerera nkakubaza? Bya bibondo wari utangiye kwigisha umuziki ukaba ubicukije imburagihe, tuzabibwire iki? Wari wavuze ko uzabazamura ukabageza mu wa gatandatu w’ayisumbuye, ndetse na REB ikaguha ubuzima gatozi.

None tuzababwire ko RIB na REB bipfana iki? Tuzabwire iki inkoramutima zawe zari zitegereje album yawe ya 8 mu muziki? Cya gitaramo kinini wari kumurikiramo uwo muzingo, tuzavunge ko cyazinzwe n’iki? Udusigiye abahe bacurabwenge se nshuti ya Kazubwenge? Bazatubwira se icyihishe mu gico cy’incakura wisunga iteka ngo tukimenye? Bazatubwira se ko ukunda imvungure kurusha Vigitware cyangwa bazatubeshya ko ukumbuye ibirayi by’i Burundi n’i Burayi.

Bazatubwira iki?

Bazatubwira se ko ari ibyishimo bibi wagize ugasamara? Oya. Bazatubwira se ko ari umujinya mwiza wagize, ugatinyuka kugomera ingobyi yaguhetse? Oya. Ndakuzi neza nshuti y’imihigo, n’iyo wakwibagirwa ko umujishi w’iyo ngobyi ukomeye, ntiwakibagirwa ko umujinya (uwo ariwo wose) utawujishura.

Uwawujishe asenga aganisha ku rukundo kandi aracyawukomeyeho. Mpore nshuti y’umuririmbyi wa Nyiribiremwa.

Nimpura na bene Mutanyurwa nkababwira ko wabonye umwanana w’insina ukibagirwa inguri, nkababwira ko wavomye amazi ku iriba ukibagirwa isoko, nizere ko utazabinyangira.

Uwa Ngabonziza n’abarwo, Nirusugire, Rusagambe.

Inshuti yawe ya Kicukiro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .