00:00:00 IGIHE NETWORK KN KINYARWANDA EN ENGLISH FR FRANCAIS

Hakorwa iki kugira ngo ubushakashatsi butezwe imbere?

Yanditswe na Kwezi Jean
Kuya 10 February 2022 saa 04:55
Yasuwe :

Kuva u Rwanda rwakwitwa uku mu myaka myinshi ibihumbi yatambutse cyane cyane mu gihe cy’ingoma z’abami ngo rwagiraga abarutekerereza bari batandukanye n’abaruyobora gusa bagahuriza ku kungurana ibitekerezo byatuma rutera imbere rugatekana mu ngeri zose.

Mu gihe cya none aba nabagereranya n’abashakashatsi bitewe naho isi igana kuko abo bakera bakoreshaga inyurabwenge yabo bagasesengura ikibazo n’umuzi wacyo, bagatekereza ibishobora kuba n’uko byakemuka bakabisangiza ababaga bayoboye ari na byo abashakashatsi b’ubu bagakwiriye gukora kuko biga ku kibazo bagashaka icyaba igisubizo cyangwa bakareba kure ku cyafasha abenegihugu bakerekana icyerekezo gihamye cyakoreshwa ariko bo bagakoresha inyandiko, ibitabo bigasohoka bigasomwa.

Imyaka ishize ari myinshi mu Rwanda abarangiza amashuri makuru na kaminuza barushaho kwiyongera. Muri rusange ibi ni ibyo kwishimira kuba dufite amashuri makuru na Kaminuza nyinshi kandi zigenda zivamo abantu b’ingeri nyinshi bafite ubumenyi butandukanye bitewe n’amasomo ayo mashuri yigisha.

Umusaruro kuri iyi ngingo urigaragaza kuko abenshi dufite haba mu bigo bya Leta n’ibyigenga baba basohotse muri ayo mashuri kandi batanga umusaruro mu nzego zimwe na zimwe bakoramo.

Nubwo ibyo ari byo kwishimirwa, maze iminsi nibaza ikibazo kigize umutwe w’iyi nkuru kuko hari ibibazo bimwe na bimwe bigaragara mu muryango nyarwanda byakagombye kuba bikorerwa ubushakashatsi bityo ibisubizo butanze bigafasha abafata ibyemezo (decision makers) mu nzego za Leta n’izigenga kumenya icyo bakwiriye gukora.

Hari ibibazo bimwe bivugwa ko byananiranye mu ngeri zitandukanye urugero rwa hafi nk’ikibazo cy’abasore n’inkumi bakunze gufatirwa mu biyobyabwenge, ubujura n’ibindi bisa nkabyo bamwe bakoherezwa Iwawa aho bagomba gutorezwa umuco mwiza ndetse n’imyuga ibifasha kuzasubira mu buzima busanzwe ariko nk’uko imibare nasomye mu binyamakuru yabivugaga ku ijanisha runaka bamwe bahavuye bakunze kwongera gusubizwayo.

Ibibazo nk’ibyo bikomeye byakagombye guhagurutsa intiti n’abahanga muri za kaminuza dufite bagakora ubushakashatsi bwimbitse bakamenya ibitera icyo kibazo n’uko cyagakemutse noneho bigafasha abafata ibyemezo yaba Leta cyangwa inzego z’igenga kumenya uko icyo kibazo cyarangira.

Hari izindi ngero nyinshi zirimo kuba mu Rwanda gatanya zigenda ziyongera ariko iyo usesenguye usanga ibitera izo gatanya bivugwa mu gisa n’icyuka gusa nta busesenguzi n’ubushakashatsi bwimbitse bukorwa kugira ngo umuryango nyarwanda ube wakwiyubaka aho gusenyuka byose bishingiye ku bushakashatsi bukozwe neza kandi butanga ibisubizo.

Ubushakashatsi bukozwe neza bukunze kuba igisubizo kuri sosiyete. Hakwiriye kubaho kandi ubushakashatsi buvumbura kandi burema udushya nibwo bugaragaza ko uwize akaminuza yize neza kandi ari intiti cyangwa umuhanga wabonye impamyabushobozi abikwiriye.

Iyo usesenguye usanga hari ingamba n’intego inzego za Leta n’abikorera baba bafite ku bibazo runaka ndetse uturere tukabishyira mu mihigo yatwo ariko kwesa iyo mihigo bikananirana atari uko babuze ingengo y’imari ahubwo bishoboka ko habuze ubufasha bushingiye ku bitekerezo by’abashakashatsi ku ngingo runaka bikaba byakwihutisha ishyirwa mu bikorwa ry’imihigo muri rusange.

Nigeze kujya njya mu nzego zimwe na zimwe zaba iza Leta n’izigenga nkitabira inama zimwe na zimwe ziga ku ngingo runaka ugasanga rimwe ingingo mwigaho inama yakozwe irasa n’ishakirwamo amakuru no kumenya icyakorwa kuri iyo ngingo biturutse mu bitekerezo by’abitabirye inama wenda batanafite ubumenyi cyangwa ubunararibonye ku ngingo zigwaho.

Izi rero ni zo za nama zihoraho ariko washaka umusaruro ukabura kuko ibyo bavuga biba amasigaracyicaro atari uko babihisemo ahubwo ari uko icyigwaho kitabonewe igisubizo gifatika, aho ugasanga byagakwiriye kuba byiza ahubwo ubushakashatsi bwakozwe ari bwo bwagakwiriye guhuza abantu babwunguranaho ibitekerezo.

Ni gake cyane numvise ibikorwa bimurikwa by’ubushakashatsi mu gihe iyo habaye ibikorwa runaka by’ubuhanzi, imurikagurisha runaka n’ibindi bikorwa by’imyidagaduro cyangwa inama mpuzamahanga bitangazwa bikaba ku mugaragaro, abantu b’ingeri zitandukanye bagatumirwa, itangazamakuru rikahaba.

Ariko iyo bigeze ku rwego rw’ubushakashatsi ntihabaho kubimenyekanisha ngo inzego runaka zirebwa n’ubwo bushakashatsi n’itangazamakuru bitabire bamenye kurushaho icyavuye mu bushakashatsi bityo babisangize sosiyete byihuse mu rwego rwo gukemura ibibazo runaka biba byarananiranye.

Ikigaragara ni uko amashuri makuru na kaminuza zo mu Rwanda bagateye intambwe yo kwinjira mu bushakashatsi mu buryo bwimbitse, buri kigo cy’amashuri na kaminuza runaka bikajya bigira umunsi cyangwa ibihe mu mwaka byo kumurikira abanyarwanda cyane cyane inzego za Leta n’izabikorera hamwe n’itangazamakuru ibyavuye mu bushakashatsi.

Ntekereza ko ubushakashatsi mu mashuri makuru na kaminuza ari cyo gipimo nyacyo cy’iterambere ry’uburezi mu Rwanda. Kuba kugeza ubu abantu batavuga rumwe ku ireme ry’uburezi mu Rwanda aho bamwe bavuga ko rikiri hasi umuntu yabirebera mu kuba nta bushakashatsi izo kaminuza zikora buzwi ngo abe ari bwo buzizamurira ireme n’ikirango mu gihugu no hanze.

Gukora ubushakashatsi birahenda ariko byagakwiriye kujya bijya mu ngengo y’imari y’amashuri yaba amakuru na kaminuza aya Leta n’ayigenga. Ibikorwa by’ubushakashatsi byagakwiriye guhabwa umwanya no mu ngengo y’imari y’ibigo byaba ibya Leta n’ibyigenga kugeza no muri za minisiteri kugira ngo ibibazo bimwe na bimwe bijye bibonerwa ibisubizo byihuse.

Ibi bizagabanya igihe ibibazo byafataga bikemurwa kuko ibibazo runaka bidafitiwe amakuru bishobora gutwara igihe mu gihe ibifitiwe amakuru byoroha kuba byasubizwa vuba.

Ntekerezako hari ibibazo bimwe na bimwe biba agatereranzamba kuko bitakozweho ubushakashatsi bwimbitse ngo bibonerwe ibisubizo bimwe bikaba ari byo bamwe mu bayobozi bakunze kubazwa kenshi uko babikemuye bakarya indimi nyamara igisubizo cyakabaye kubikoraho ubushakashatsi bubikemura burundu cyangwa bukabigabanya nibura ku ijanisha runaka.

Usibye amashuri makuru na kaminuza, hakwiriye kubaho ibigo byinshi byigenga bikora ubushakashatsi bikabamo inzobere kuri buri rwego na buri cyiciro kigize ubuzima bw’igihugu.

Hagakwiriye kubaho ubushake bwa buri wese cyane cyane intiti n’abahanga aribo bene gihugu bwo guteza imbere uru rwego rw’ubushakashatsi bushingiye cyane cyane ku cyerekezo n’intego zaguye z’igihugu ikigamijwe ari ukunyaruka mu iterambere tujyana n’icyerekezo cy’isi.

Mu isi ya none ugutanze gutekereza no gushyira mu bikorwa icyo atekereje niwe uhinduka umuherwe kandi niwe uyobora isi. Hamwe n’ubushakashatsi bwimbitse kandi bukozwe neza, hamwe n’ubuyobozi bwiza, hamwe n’ubushake bw’abanyarwanda umunsi umwe u Rwanda rwaza imbere ya Leta Zunze Ubumwe za Amerika, u Bushinwa n’u Burusiya kandi inzozi zizaba impamo nta kabuza.

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .