FPR, isôoko idatobangwa

Yanditswe na Ntwari Pie
Kuya 25 Ugushyingo 2019 saa 07:55
Yasuwe :
0 0

Kuba iyi si tubaho itajya ihagarara haba mu rugendo ikora mu isanzure, haba mu iterambere ryayo no mu misazire yayo, bitugira abagenzi bahoraho. Ni cyo gituma ugize atya akayivaho, tuvuga tuti uriya yarangije urugendo rwe. Abakigenda twese kuri iyi si rero turi abagenzi.

Ubundi umugenzi ni umuntu uri ku rugendo. Ariko mugenzi wawe ni uwo mujyana mu cyerekezo kuko ibyerekezo byacu twese si bimwe. Mushobora kuba mugenda mu muhanda, bamwe bamanuka abandi bazamuka, batambika se cyangwa bambuka bajya mu tuyira, mwese muri abagenzi.

Ikinyuranyo mu bugenzi bwanyu ni kimwe: ni icyerekezo. Ku mukristu mugenzi we ni umukristu, umujura mugenzi we ni umujura, ku mucuruzi ni umucuruzi, ku murozi ni umurozi, umucengezi akaba mugenzi w’uwo bahuje gutera hamwe – interahamwe.

Rimwe mu mategeko atavugwaho rumwe ariko asobanutse neza ni Itegeko Ngenga No 08/2005 ryo kuwa 14/07/2005 rigena imikoreshereze n’imicungire y’ubutaka mu Rwanda. Ingingo yaryo ya 6 y’igika cya 2 ivuga ko umutungo uri munsi y’ubutaka ari uwa Leta. Bityo, abaturarwanda bose bahuje isôoko bavomaho amazi. Ni Leta.

Imbaraga Leta ishora ku gutunganya amazi ngo atugereho asa neza ni nyinshi cyane. Abakora mu kigo gishinzwe uwo murimo (WASAC) nibo babimenya kundusha.
Ntekereza ko uwashaka kwangiza amazi tuvoma ngo ayagire ibirohwa cyangwa se ayanduze mu bundi buryo, twese kuva ku yonka ntiyadukira. Kuko amazi ari ubuzima, n’utabona uko amuca iryera ngo agire icyo amutwara, ntiyabura kumuvumira ku gahera nk’uvuma undi mwanzi wese.

Hari andi mazi ataza mu mpombo nk’uko aya WASAC (aya Leta) aza. Ayo mazi ni ubuzima tuvukiramo mu muryango w’iwacu, tugakurana na bagenzi bacu.

Abatubanjirije kubona izuba badushyira mu cyerekezo basanzwemo, bakaguha izina rya Gikristu iyo ari Abakristu, bakaguha irya Islam iyo ari Abislamu. Uko umwana agenda akura, ahamya intambwe muri icyo cyerekezo yahitiwemo, bitaba uko, igihe kikagera akihitiramo ikindi cyerekezo, akajya mu cya bagenzi be.

Habaho amazi menshi atagendera mu mpombo. Amwe muri ayo mazi ni ayo buri Munyarwanda wese ushatse avoma, waba umuturarwanda cyangwa utuye ahandi. Biranarenga u Rwanda rukayahaho ibindi bihugu biyakeneye. Ayo mazi ntagurwa, ariko uyatobye ntabona ikiguzi cyayo.

Ayo mazi yahoze ari meza kuva kera na kare ingoma ibihumbi, aza kuba umutungo bwite w’ingoma-mburamutima, igihe kiragera abo biyitaga beneyo barayitobangira, bakayanduza uko bashatse, bakayasukura kuko hari icyo bakeneye kiyavaho.

Abashatse kuyatokora barabizize, haba imishyikirano amazi akomeza ibiziba kugeza igihe abanyeshyaka banze ako gasomborotso.

Leta iduhitiramo kubaho. Yego, ni ukuri ko Leta igomba abaturage amazi meza kuko amazi ari ubuzima. Abagenzi bari barahunze umwanda wabaga mu mazi Leta [yo ubwayo] yitobangiraga, bahuje icyerekezo ubwo bari hanze y’u Rwanda kuko bari bafite u Rwanda bagendana – u Rwanda bagendamo bari bararwambuwe mu nzira zitaziguye.

Uwatumye abo Benimana bahuza ingendo, bagaca ingando bakagandura, bakabona bagenzi babo, bakava iwabo ari ibibondo abandi ari ibihumuza, abandi bagasiga imiryango ari ubuvivi bakagana ishyamba, nta wundi ni umuryango wa kabiri utari uw’amaraso. Ni umuryango w’ishyaka n’ubutwari, icyerekezo kizima gishingiye ku isuku mu isôoko y’amazi – FPR INKOTANYI.

Sinshaka gutinda ku rugendo rurerure, inzara n’inyota mu rusaku rw’amasasu n’umuriro w’amanywa n’ijoro imfura za FPR zanyuzemo kugira ngo zifate ibirindiro by’ayo mazi, hari ababizi kundusha, ndetse n’ubwo mbizi nk’uwabibonye ariko nari nkiri muto cyane, aribyo bituma ncukiriza aha.

Icyo nshaka kwigarukiraho muri iyi nkuru yanjye, ndetse nkanagishimangira, ni uko ubu tuzi FPR nk’isôoko y’amazi afutse kandi twese tuvomaho, byaba mu nzira ziziguye n’itaziguye. Ibirenze kuri ibyo ni uko imiyoboro y’ayo mazi afutse igenda ikagera mu mahanga, aho tutifuza ko ihwa ryahanze u Rwanda mu 1994 na mbere yaho hari undi ryahanda.

FPR, n’ubwo ntayivugira, ariko nzi neza ko idakeneye ibihozo n’ibisingizo kugira ngo imenye ko igomba kugeza ku Banyarwanda bose ayo mazi meza kandi afutse. Ntikeneye ko hari uvuga ko yayanyoye, ariko aragowe uzashaka kubuza umunyarwanda kuyanywa kandi atari uko yabuze amuhagije, ahubwo ari ukubera inda mbi no kwiyahura. Yego – mbisubiyemo gutobanga amazi ya FPR ni ukwiyahura.

Mbona ku mbuga nkoranyambaga hari abagerageza kuyatobangisha ururimi. Bibuke ko mu Kinyarwanda bavuga ngo “induru ntiruta ingoma”, nibakomeze barwane ubwo butita kuri murandasi ariko bibuke ko amazi banduza ari ayacu twese, bazarohama ataraba ibirohwa.

Naho uzagerageza kuyatobanga yegera isôoko afukuyemo azabona ishyano nk’uko Umugaba w’Ikirenga w’ingabo z’u Rwanda adahwema kubagira inama. Icyiza, abo bose barazwi, kandi nabo barabizi ko abarinda iryo riba bazi neza ko ntawe utazi ko babizi. Agapfa kaburiwe ni impongo.

Kuri iyi si tugendamo, kuri izo mbuga nkoranyambaga no mu buzima bwa buri munsi tubamo, tumenye bagenzi bacu, tumenye abo tudahuje icyerekezo twitandukanye nabo, ndetse nitumenya ushaka kudutobera iriba tuvomaho tumushyire ku karubanda, naba afite umutima azagaruka i buntu, naba ari impfabusa azapfunyikirwa iye mpamba, akomeze mu cyerekezo cye, akenshi kigana i buzimu.

Niba utamenye amazi afutse navugaga ni “Umutekano”.

Iyi nkuru ni igitekerezo bwite cya NTWARI PIE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza