00:00:00 IGIHE NETWORK KN KINYARWANDA EN ENGLISH FR FRANCAIS

Ese demokarasi ni umwenda u Rwanda rubereyemo amahanga?

Yanditswe na Dufitumukiza Salathiel
Kuya 3 May 2022 saa 07:44
Yasuwe :

Ijambo “Demokarasi” rikoreshwa bwa mbere n’Abagereki mu 508 Mbere y’Ivuka rya Yezu; basobanuraga “ubutegetsi bw’abaturage”. Bifashishije amagambo yo mu rurimi rwabo “Demos [abaturage]” na “Kratos [ubutegetsi]” barabihuza.

Aba-Athéniens bari batuye mu Murwa Mukuru w’icyo gihugu ni bo barihanze banatangiza imikorere ijyanye naryo bashaka ko buri wese mu bagera ku 300.000 bari bawutuye yiyumvamo ubutegetsi.

Nukuvuga ko buri muturage yagombaga gutora ashyigikira cyangwa arwanya itegeko rishya rigiye gushyirwaho kuko ari we rireba. Bitoreraga abantu 500 babayobora mu mwaka umwe, bakavaho hagatorwa abandi babasimbura. Iyo ni yo demokarasi itaziguye.

Habaho na demokarasi iziguye ari nayo isigaye igezweho mu bihugu byinshi n’u Rwanda, aho noneho abaturage batora abazafata imyanzuro mu izina ryabo.

Aho kugira ngo umushinga w’itegeko buri muturage aze awemeze cyangwa agaragaze ko atawushyigikiye, hatorwa intumwa (abadepite) zibahagararira, icyo zemeje kigakorwa icyo zidashaka ntigikorwe.

Muri rusange, impamvu nyamukuru y’igitekerezo cya demokarasi ni uko abenegihugu bagira uruhare mu bibakorerwa, mu buryo buziguye cyangwa ubutaziguye.

Byongeye kandi demokarasi iteganya ko habaho guhererekanya ubutegetsi binyuze mu mahoro ariko kandi bishingiye ku mahitamo y’abaturage, aho kuba impinduramatwara cyangwa intambara no kubuhirika.

Muri make demokarasi ni igisobanuro cy’uko ijwi rya rubanda ryumvikana.

Ntigenwa n’amahanga

Aba-Athéniens bazana iyo miyoborere wari umwihariko wabo. Nta gihugu bari barebeyeho kandi nta n’icyo Cleisthenes wabayoboraga yigeze ahatiriza kuyikurikiza. Amahanga ni yo yayishimye yiyemeza kubigenza atyo.

Aha byumvikane neza ko kuba demokarasi ari ijambo rihuriweho bidatuma rikwiye gufatwa nk’aho abarigenderaho bagomba guhuza mu byo bakora byose.

Nubwo bavugaga ko ubutegetsi ari ubw’abaturage, abatoraga ku mategeko n’abayobozi babaga ari abagabo badafunzwe gusa. Abagore, abana n’abacakara ntibari bemerewe gutora.

Ikindi muri abo babarwaga nk’abenegihugu, utaratoraga yarabihanirwaga. Yasigwaga irangi ritukura ku myambaro ye kandi uwabaga yarisizwe ntiyahembwaga mu gihe yabaga ari kumwe n’abandi bari buhembwe.

Iyakwitwa “Demokarasi nshya” yafatiye kuri iyo y’Aba-Athéniens ariko noneho ibihugu bikomeye byigize nk’abagenzuzi n’abarimu bayo ku Isi hirengagizwa ko abenegihugu ubwabo ari bo bazi ibibakwiriye, haba ubuyobozi, amategeko n’amajyambere arambye.

Abayobozi bo mu Burengerazuba bw’Isi bagaragaza Afurika kenshi nk’indiri y’amabi.

Ni he hatubahirizwa uburenganzira bwa muntu? Ni he hakorwa amatora atanyuze mu mucyo? Ni he intebe y’ubutegetsi igundirwa? Ni he umuturage adashobora kumvwa ahubwo buri gihe akarenganywa? Ni he igihugu kigendera ku bushake bw’abantu ku giti cyabo?

Ibyo bibazo byose ubibajije umwe mu Banyaburayi cyangwa Umunyamerika by’umwihariko umunyepolitiki aguha igisubizo mu magamo atatu: “Ni muri Afurika”.

Birasa n’aho hari abagomba kwigisha demokarasi abandi bakiga kandi bijyanye n’ibyifuzo by’abigisha.

Nyamara iyo urebye neza usanga ari kwa gutokora agatotsi kari mu jisho ry’undi usize umugogo mu ryawe.

Leta Zunze Ubumwe za Amerika benshi bazibona nk’Umunara umurikira Isi nazo ubwazo zigahora ari byo ziharanira, ariko Raporo ya Mapping Police Violence igaragaza ko mu 2021 ari iminsi 15 yonyine abapolisi batishe umuntu muri icyo gihugu.

Mu bagera ku 1.136 bishwe barashwe na polisi muri uwo mwaka, 27% ni Abirabura kandi ubusanzwe bibarwa ko bagize 13% by’abahatuye.

Igitangaje kurushaho, abenshi mu baraswa nta byaha baba bashinjwa kandi 98,3% by’abapolisi barashe bakica kuva mu 2013 kugeza mu 2020 ntibabiryojwe.

Uretse kuba ibyo bigaragaza ugusumbanisha abaturage (Abazungu n’Abirabura), ni no kutumva ijwi rya rubanda kuko niba ruhohoterwa ntirurenganurwe ntiwavuga ko ijwi ryarwo ryumvikana. None ubwo demokarasi batubwira irihe?

Ishyano ryabaye ku Nteko Ishinga Amategeko y’icyo gihugu (Capitol) ku wa 6 Mutarama 2021 ntirizibagirana mu mateka y’Isi.

Abambari ba Donald Trump wari Perezida akanga kwemera ko yatsinzwe na Joe Biden mu matora, bamenaguye ibirahuri byayo, baca inzugi n’amadirishya ndetse bamwe mu mu bari bahari barimo n’abapolisi bahasiga ubuzima.

Harya ngo Afurika ni yo ikora amatora atanyuze mu mucyo? Ni ho abaturage batagira kivugira hakenewe ijwi ry’amahanga? Iyo iryo sanganya ribera mu gihugu cya Afurika hari igihe cyari guhagarikirwa inkunga cyangwa amatora agasubirwamo.

Demokarasi ntiba umwenda...

Ubwo Perezida Kagame yaganizaga abanyeshuri bo muri Kaminuza ya Yale yo muri Leta Zunze Ubumwe za Amerika ku wa 20 Nzeri 2016, yavuze ko demokarasi nyayo ari ishingira ibikorwa ku byifuzo by’abaturage.

Yashimangiye ko nta gihugu gikwiye kwiha uburenganzira bwo kugena uko ibindi bibabo.

Nawe ushyize mu nyurabwenge wabyumva. Ni gute Umunyaburayi, Umunya-Asie cyangwa Umunyamerika atinyuka akavuga ko mu Rwanda nta demokarasi ihari kandi nta Munyarwanda urerura ngo avuge ko muri bimwe mu bihugu byaho itahagaragara?

Nibura ari intambara, uwo ari we wese yavuga ati “Hariya hari intambara” kuko iba igaragara kandi iri kwangiza. Ariko sintekereza ko ibyifuzo by’abaturage wabimenya utari kumwe nabo kurusha uri kumwe nabo.

Icyo gihe Perezida Kagame yikomye bimwe mu bihugu bitumva neza demokarasi, ahubwo bigashaka gutegeka ibindi uko biyoborwa, uko bibaho no kubifatira ibyemezo binyuranyije n’ibyifuzo by’abaturage.

Yagize ati “Abanyarwanda bazi ibyo bashaka, ubuyobozi bwiza, uburezi, ubuzima bw’abana babo kandi ni byo babona.”

Yanenze bamwe mu bagize Umuryango Mpuzamahanga babona impinduka igihugu kigezeho nk’imbogamizi ku buryo bw’imiyoborere yabo bamenyereye.

Ati “Bakomeza kwiha uburenganzira bwo kugena ibikwiye gukorwa no kugena ibizabavamo ntibashyire imbere gukorana bya hafi n’abo bireba.”

Uretse bamwe bashaka kurenza ingohe ibigaragaragara,uwari Umuhuzabikorwa wa gahunda za One UN akaba n’Uhagarariye gahunda za Loni zigamije iterambere mu Rwanda, Lamin Momodou Manneh, mu 2013 yavuze ko igihugu cyateye intambwe igaragara mu guharanira demokarasi.

Yemeje ko hakiri ibyo gukorwa kugira ngo umuturage agire uruhare mu miyoborere.

Ibyo ni ibintu buri gihugu gikeneye kuko ntacyavuga ko cyagezeyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .