Dr Mukwege na bagenzi be batinya ukuri kuruta uko batinya Kabarebe

Yanditswe na Albert Rudatsimburwa
Kuya 1 Nzeri 2020 saa 08:33
Yasuwe :
0 0

“Afrique positive” yatangaje inkuru ifite umutwe uvuga ku Bisobanuro bya Kabarebe kuri UN Mapping Report, impunzi z’Abanyarwanda na Dr. Mukwege.

Umwanditsi wayo, Masako Yonekawa, yivuga nk’umunyamuryango w’Umuryango w’Abayapani udaharanira Inyungu wa NPO RITA-Congo, agashimangira ko akwiye kujya impaka ku biregwa Gen. Kabarebe ku isano hagati y’icyurwa ry’impunzi z’Abanyarwanda na UN Mapping Report ndetse n’ubushake bwa Dr. Mukwege ku buvugizi.

Aho gutanga gihamya ifatika mu kuvuguruza ibyavuzwe na Gen Kabarebe, Yonekawa agenda asubiramo amateka Mukwege yagenderagaho na mbere yo gutekerezwaho na Komite itanga Igihembo cy’Amahoro mu 2018.

Mu ntangiriro, icyizere cya Yonekawa cyatangiye gushidikanywaho ubwo yasubiragamo ibirego bya baringa ko Gen. Kabarebe yateye ubwoba Dr. Mukwege.

Umuntu wese wumva Ikinyarwanda (nubwo we atarimo) yari azi neza ko nta hantu na hamwe yigeze atera ubwoba Mukwege.

Iyo Yonekawa aba ashaka kumenya neza icyo Kabarebe yavugaga yari kwifashisha umusemuzi, umwe utari mu gatsiko k’abarwanya u Rwanda n’abari gusakaza iki gihuha.

Ikiri ukuri ni uko General Kabarebe yamaganye ako gatsiko karimo na Dr Mukwege, ku mugambi wabo wo gushaka gutera u Rwanda ubwoba bifashishije imbanzirizamushinga ya raporo yabonywe n’itangazamakuru muri Kanama 2010, raporo irimo ibirego byakuwe mu yatangajwe mu Ukwakira 2010 nyuma y’uko abanditsi bananiwe kwerekana ukuri kw’ibirego biyikubiyemo.

Yonekawa ntiyagaragaje ibi ubwo yifashishaga “UN Mapping Report of 2010,” nyamara we agakoresha imbanzirizamushinga ya raporo.

Umuntu utubaha cyangwa gatumwa niwe wakwirengagiza raporo ya nyuma agakomeza kwishingikiriza umushinga wayo utararangiye cyangwa ngo ikoreshwe ahantu aho ariho hose.

Biranasekeje kandi kubona Yonekawa na bagenzi be bahitamo kugaragaza ibitekerezo bya Kabarebe nk’ibiteye ubwoba ku buzima bwa Dr. Mukwege.

Bishimiye kujya impaka n’ibitekerezo bya Gen Kabarebe ariko bakamwima umwanya wo gusubiza ku birego by’ibiremano byegetswe ku Rwanda ngo abantu basobanukirwe ukuri.

Gufata Igihembo cyitiriwe Amahoro ukagikangisha nk’igihamya cy’ubunyangamugayo bwa Dr. Mukwege ni nko kugerageza kuvuga ko Alfred Nobel wabaye igihangange mu gukora ibikoresho by’ubwicanyi yari umugabo w’umunyamahoro.

Niba icyo aricyo shingiro cy’igituma Mukwege n’abamushyigikiye badashobora kugira ibyo babazwa ku bo bakorana n’imyanya barimo ndetse n’ibirego bidashinga, Yonekawa n’inshuti ze bazabona benshi badahuza na bo.

Mu bigaragara, nk’ingabo yari ku irasaniro, General James Kabarebe ari mu basirikare baza imbere mu kugira ubumenyi bw’ibyahabereye.

Ukuri ni uko abatanga ibirego bidafatika bashaka kurega ariko batakoresheje intekerezo zabo neza, bisobanura ko icyo bakurikiye atari ukuri ari nayo mpamvu hibazwa intego yabo y’ukuri.

Yonekawa nawe nta tandukaniro afite ku kwinjira mu modoka irimo abahanga mu icengezamatwara biganjemo n’abahakana Jenoside Yakorewe Abatutsi mu 1994.

Hari imvugo igaragaza ko ‘Igihugu kizabyara igihunyira ukibona hakiri kare.’ Impirimbanyi iberwa n’urubwa niyo gusa yagerageza kuvuga ko RPF “yagize uruhare mu bwicanyi bwo kuva mu 1990’’ nkuko Yonekawa yabyanditse mu nkuru ye.

Mu mboni ze, uruhare rukomeye mu bwicanyi bwatangiye mu 1990 si urwa guverinoma yateguye Jenoside ikanashyira mu bikorwa Jenoside yakorewe Abatutsi ahubwo ni ingabo zahagaritse Jenoside. Ibi nanone birashimangira impamvu Kabarebe yashingiyeho asobanura ko Yonekawa n’izindi mpirimbanyi zifite ikibazo cy’imitekerereze zibona nk’igiteye ubwoba.

Mu yandi magambo, ubwoba ntiburi kuri Mukwege; ukuri Kabarebe yavugaga ni ko guteye ubwoba, kwanatumye Yonekawa, Judi Rever n’urubyiruko rwa Jambo rurimo abahakana n’abakoze Jenoside bashingiyeho bamwamagana.

Yonekawa we ntaranyurwa. Avuga ko “Impunzi zatsembye zanga gusubira mu Rwanda kubera ubwoba n’ihungabana zatewe na RPF.”

Abivuga ariko adasobanura impamvu impunzi zirenga 3,200,000 ziganjemo izatahutse ku bushake bwazo zavuye muri Zaïre, Burundi, Tanzania na Uganda hagati ya 1994 na 2003.

Si ibyo gusa kuko impunzi zirenga 600,000 zacyuwe muri gahunda yagutse ya UNHCR yo gufasha gutaha abari mu nkambi zo muri Zaïre bigizwemo uruhare na RPA.

Iki cyemezo cyafashwe ubwo byabonekaga ko umuryango mpuzamahanga wananiwe kwambura intwaro abasize bakoze Jenoside bagenzuraga inkambi, bakanatanga imyitozo ku barwanyi mu nkambi, batangaga umusanzu mu gutera u Rwanda, kwica abarokotse Jenoside n’impunzi zageragezaga gutaha mu rugo nkuko biri muri raporo ya Amnesty international.

Raporo ya Amnesty International ishingiye ku magambo y’umuyobozi w’Ishami ry’Umuryango w’Abibumbye riharanira Uburenganzira bwa Muntu mu Rwanda, UN High Commissioner for Human Rights, yo ku wa 14 Mata 1995, ivuga ko:

“Ibihumbi by’abantu biciwe muri ibyo bitero byaturukaga ku mupaka kuva mu mpera za Mutarama. Byatangajwe ejo hashize ko hari ikindi gitero cyakomerekeyemo abantu…Ibitero by’ubwicanyi byakorwaga nk’ibihano ku bantu basubiye mu Rwanda nta ruhushya rw’abayobozi b’inkambi, hakanicwa abantu byagaragaraga ko bakorana na Guverinoma y’u Rwanda, urugero abari barashyize intwaro hasi cyangwa bagatanga amakuru ku bagize uruhare muri Jenoside.’’

Kimwe n’izindi mpirimbanyi, Masako Yonekawa yararuciye ararumira ku ngingo yo kuvuga ko abanze gutaha na n’ubu bagize uruhare mu bwicanyi muri Jenoside yakorewe Abatutsi mu 1994 ndetse bafite ubwoba bwo kugezwa imbere y’ubutabera.

Mu gihe FARDC ikomeje ibikorwa byayo byo guhashya imitwe yitwaje intwaro nka FDLR ikorera mu Burasirazuba bwa Congo, bamwe mu barwanyi n’imiryango yabo bakomeje gutahuka mu Rwanda ku bwinshi.

Mu yandi magambo, nta bundi bwoba bwa Dr. Mukwege kurusha uburi ku mpunzi z’Abanyarwanda.

Icyo Yonekawa yashatse kwita impunzi ni abarwanyi banambye kuri FDLR n’abandi bajenosideri bakomeye bafite ubwoba bwo kugaruka mu Rwanda kuko bagezwa mu nkiko bakabazwa uruhare rwabo muri Jenoside.

Hari impamvu ebyiri zituma impunzi z’ukuri zishobora kuba zidatahuka mu gihugu.

Iya mbere, ni icengezamatwara rikoreshwa nk’iturufu igamije kugumisha izi mpunzi mu bwoba hifashishijwe imbanzirizamushinga ya UN Mapping Report yatangajwe mbere ya raporo yuzuye.

Iha imbaraga inkuru z’impimbano zifashishwa n’abajenosideri n’inshuti zabo z’akadasohoka nka Mukwege, Rever, Yonekawa n’abandi bahakana Jenoside, bavuga ko RPA yashakaga kwica abasivili muri Zaïre by’umwihariko abo mu bwoko bw’Abahutu.

Ababiba icengezamatwara bakomeza bababwira ko kuba Umuhutu bihagije ngo wicwe na Guverinoma mu Rwanda. Nyamara abashyigikiye raporo yashyizwe hanze igihe kitaragera bananiwe gusobanura impamvu impunzi nyinshi zirimo n’abakoze Jenoside basubijwe mu gihugu ndetse ubu bakaba babayeho mu mahoro mu Rwanda.

Icya kabiri, ikiri kuba ni igikorwa cyo gufata bugwate abantu nkuko UN High Commissioner for Human Rights yasobanuye ibyakozwe mu 1995. Ubwo impunzi zamaraga kuva mu maboko y’abazifashe bugwate zikagerageza gutahuka, zaragarurwaga ndetse zimwe zigahabwa igihano cyo kwicwa bigizwemo uruhare n’imitwe igikorera mu Burasirazuba bwa RDC.

Ubwo ibikorwa bya gisirikare nk’ibiri gukorwa na FARDC, bigamije gukuraho iyi mitwe y’iterabwoba, amatsinda ayobowe n’imiryango yiyita iya politiki ibonera amaronko mu kaduruvayo, yagerageje kuzura imbanzirizamushinga ya UN Mapping Report ngo bazambye imikoranire hagati ya Guverinoma ya RDC n’iy’u Rwanda. Iyi mikoranire yo guhungabanya imikoranire yakunze no kubaho mu bihe byahise.

Ubu nibwo bwoba bw’ukuri babona muri Gen Kabarebe. Mukwege na Yonekawa bo bameze nk’abatanga umusanzu wabo muri uyu mushinga.

Ibikubiye muri iyi nyandiko ni ibitekerezo bwite by’umwanditsi, Rudatsimburwa Albert


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .