00:00:00 IGIHE NETWORK KN KINYARWANDA EN ENGLISH FR FRANCAIS

CHOGM Rwanda 2022: Imyaka irenga 10 y’ibinyoma n’urwango ku Rwanda yabyaye ubusa

Yanditswe na Joseph Kamanzi
Kuya 21 June 2022 saa 12:00
Yasuwe :

Mbere y’amezi make ngo u Rwanda rwinjire mu Muryango w’Ibihugu bikoresha Icyongereza, Commonwealth, mu Ugushyingo 2009, Umuryango uharanira Uburenganzira bwa Muntu, Commonwealth Human Rights Initiative (CHRI) wandikiye raporo Inteko Ishinga Amategeko y’u Bwongereza wanga ubwo busabe.

Iyi raporo yanditswe n’Umunyakenya, Professor Yash Pal Ghai, yavugaga ko u Rwanda rutujuje ibisabwa n’amasezerano ya Harare agenga inyungu za Commonwealth mu bijyanye n’imikoranire no kubungabunga amahoro ku Isi.

Ni inyandiko yarimo ibirego by’ibihimbano ndetse kugeza na n’uyu munsi bikisubiramo. Itangazamakuru ryo muri icyo gihe ryakurikiraniye hafi iyo nkuru.

Ibi ariko ntibyabujije Inama y’Abakuru b’Ibihugu na za Guverinoma bigize Umuryango wa Commonwealth (CHOGM) yabereye muri Trinidad and Tobago ku wa 9 Ugushyingo muri uwo mwaka, kwemerera u Rwanda kwinjira mu muryango.

Nyuma y’imyaka igera kuri 13, Perezida Kagame muri iki cyumweru azashyikirizwa ubuyobozi bw’uyu muryango w’ibihugu 54 mu gihe cy’imyaka ibiri mu birori by’akataraboneka bya CHOGM 2022 biri kubera mu Rwanda.

Mu gihe cy’icyumweru nibura abantu 5000 bazaba bari muri Kigali aho bazitabira ibikorwa n’inama zitandukanye zirimo izagenewe Abaturage ‘People’s Forum’, iz’Urubyiruko n’Abagore. Irushanwa rya Golf, Amamurikagurisha ndetse n’ibitaramo bizabera muri Kigali mu duce twahariwe abanyamaguru.

Abikorera bo mu Rwanda bazungukira mu kwakira abashyitsi bazamara igihe mu gihugu. Hazaba kandi inama zo ku rwego rwo hejuru z’abayobozi bo muri Commonwealth ziga ku buryo umuryango warushaho kubyazwa umusaruro.

Igikomangoma cya Wales mu Bwami bw’u Bwongereza, Charles uzaragwa ubwami ni we uzahagararira Umwamikazi Elisabeth II wafashe akaruhuko ku nshingano ze kubera izabukuru.

Abandi bayobozi bakomeye ku rwego rw’Isi bemeje ko bazitabira iyi nama mu Mujyi wa Kigali barimo Minisitiri w’Intebe w’u Bwongereza, Boris Johnson; Minisitiri w’Intebe wa Canada, Justin Trudeau ndetse na Minisitiri w’Intebe wa Australia, Anthony Albanese.

Mu magambo make, ibi bisobanuye ko, nta n’umwe mu bagize Umuryango wa Commonwealth wifuza gusiba iyi nama. Ibirenze ibyo, ni inama ya mbere yo ku rwego mpuzamahanga ibaye kuva COVID-19 yakwibasira Isi, ikayijegeza.

Mu byavugwaga mu mugambi wo kwitambika u Rwanda mu kwinjira muri Commonwealth, Umunyakenya Yash Pal Ghai, yanditse ko “Hari impamvu nyinshi kuko Guverinoma y’u Rwanda ifite igisirikare cyagutse, yinjije rwihishwa ingabo mu bihugu byo hanze by’umwihariko muri Repubulika Iharanira Demokarasi ya Congo.’’

Byaba ari impurirane kuba CHOGM 2022 iri kuba mu gihe intambara iri kongera gututumba mu Burasirazuba bwa Congo? Ibirego by’ibiremano n’ibinyoma byatangiye mu 2009 na n’ubu biracyahari uyu munsi.

Wa muryango mpuzamahanga ni na wo watanze urutonde rw’ibirego mu biro by’Umuryango w’Abibumbye ushinzwe kurengera Uburenganzira bw’Ikiremwamuntu.

Iri tsinda ryanashyize ikirego mu Isuzuma Rusange Ngarukagihe (UPR) aho buri gihugu cy’ikinyamuryango cya Loni gishobora kugenzura no kubona ibyerekeye amakuru y’iyubahirizwa ry’uburenganzira bwa muntu mu bihugu byose by’ibinyamuryango.

Hari ikinyuranyo gito mu birego by’ubushotoranyi byatanzwe n’uyu muryango ndetse n’ibyatangajwe mu myaka yakurikiyeho. Bimwe mu birego byanageze ku rwango rugirirwa abanyamahanga mu gihugu hose. Nyamara ibyo byose ntibyabujije CHOGM 2022 kubera mu Rwanda.

Mu butumwa bwo ku wa 14 Kamena bwagenewe abazitabira CHOGM 2022, Perezida Kagame yagaragaje ko u Rwanda “Rwishimiye kwakira abashyitsi n’abazitabira inama i Kigali kandi yizeye ko izaba mu mutekano kandi igatanga umusaruro.’’

Ibiganiro bizibanda ku bibazo by’ingutu bibangamiye Isi birimo imihindagurikire y’ibihe. Bimwe mu bihugu by’ibinyamuryango bya Commonwealth bishobora gushiduka byarengewe n’amazi y’inyanja mu gihe byagenda biguru ntege mu gufata imyanzuro.

Izindi ngingo zizaganirwaho mu Nama y’Abakuru ba Guverinoma harimo kwita ku rubyiruko no guhanga imirimo by’umwihariko ishingiye ku ikoranabuhanga.

Bazanaganira ku rugendo rwo kuzahura ubukungu bwahungabanyijwe na COVID-19 n’ingaruka Intambara y’u Burusiya muri Ukraine yagize cyane cyane ku bihugu bikiri mu nzira y’iterambere.

CHOGM Rwanda 2022 ifatwa nk’umwanya mwiza wo kongera gutekereza ku kiremwamuntu n’uburyo yarushaho kubaho mu bwisanzure.

Ku wa 15 Kamena 2022, abaturage bo muri RDC bigaragambyaga bagerageje kugera ku Mupaka uhuza Repubulika Iharanira Demokarasi ya Congo n’u Rwanda mu Mujyi wa Goma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .