00:00:00 IGIHE NETWORK KN KINYARWANDA EN ENGLISH FR FRANCAIS

Gutwara inda ntibikwiriye kuba iherezo ry’inzozi z’abangavu

Yanditswe na IGIHE
Kuya 26 July 2023 saa 03:55
Yasuwe :

Ubwanditsi: Ibikubiye muri iyi nkuru ni ibitekerezo bwite by’Umunyamategeko akaba n’Umuyobozi Nshingwabikorwa wa Certa Foundation, Florida Kabasinga.

“Mfite inshuti ibana n’ubumuga bwa ‘autism’. Umunsi umwe yavuye mu rugo ari kumwe n’umuntu tutazi, twamaze iminsi 15 tumushakisha. Nyuma y’uko agarutse, abagize umuryango we bamujyanye kwamuganga kumupimisha, basanga yarafashwe ku ngufu. Twatangiye inzira yo gushaka ubutabera, ariko byari bigoranye kuko atashobora gutanga ubuhamya bw’ibyamubayeho cyangwa ngo amenye uwamushimuse akanamufata ku ngufu.”

Ubu ni ubuhamya bwatanzwe n’umugore wo muri Kenya ubwo yari mu kiganiro cyagarukaga “ku kurwanya ihohoterwa rishingiye ku gitsina muri Afurika y’Iburasirazuba”. Ni ikiganiro cyatangiwe mu nama ya Women Deliver iherutse kubera i Kigali.

Birababaje kuba uyu mwana w’umukobwa yarahohotewe n’uwakabaye amurinda. Ibibazo nk’ibi biba muri buri gihugu ndetse buri munsi, igiteye impungenge n’uko ibi byaha kandi binakorerwa n’abataruzuza imyaka y’ubukure.

Nk’umubyeyi n’umunyamategeko ibibazo nk’ibi ni byo byatumye ntangiza Ikigo gikorera muri ‘Certa Foundation’ gifasha abangavu batewe inda by’umwihariko abafite ubumuga ariko bakaba badafite ubushobozi bwo kurera abana babo.

Muri uru rugamba turimo rwo guharanira iyubahirizwa ry’uburenganzira bw’abagore, ibibazo by’abangavu babyaye imburagihe usanga birenzwa ingohe. Nubwo hari intambwe ikomeye imaze guterwa na Guverinoma y’u Rwanda mu gushyigikira abagore, ibijyanye n’inda ziterwa abangavu biracyasa na kirazira zitaganirwaho, kubera ko usanga izi nda nyinshi zaraturutse mu gusambanywa.

Igihe abangavu batewe inda usanga batereranwa na sosiyete ndetse ugasanga n’imiryango yabo bwite ntigishaka kubikoza. Iyo batereranywe n’abakabafashije, ubushakashatsi bwagaragaje ko aba bangavu bahura n’ibibazo by’ubushobozi bituma bijandika mu mirimo ishobora gutuma bahohoterwa kurushaho.

Nyuma yo kubona uburemere bw’iki kibazo, Certa Foundation yiyemeje kugira icyo ikora, kubera ko twizera ko gutwara inda bitagakwiriye kuba iherezo ry’inzozi z’abangavu. Certa Foundation yemera ko gushyigikira abangavu batwaye inda imburagihe bakeneye byinshi birenze gusa ubufasha mu by’amategeko.

Na cyane ko umubare munini w’abakozi b’uyu muryango ari uw’ab’igitsina gore, dukemura ibibazo by’aba bangavu binyuze mu kubaha ubufasha mu by’imitekerereze, ubuvuzi, inkunga mu bijyanye n’ubukungu ndetse n’ubufasha mu by’amategeko. Twita kuri buri kibazo bafite mu buzima hagamijwe kubafasha kurenga ibibazo barimo ndetse no kongera kwiyubaka.

Abanyamategeko bari hirya no hino mu ntara cyane cyane izagizweho ingaruka n’iki kibazo batanga ubufasha bwo kunganira mu mategeko aba bangavu. Ibirenze ibyo, uyu muryango ukora ubuvugizi, ubukangurambaga ndetse ugatanga n’amahugurwa agamije kwirinda imigenzo ishobora kuvamo ihohotera rishingiye ku gitsina.

Kuko Certa Foundation izi neza akamaro ko kwigira mu by’ubukungu, uyu muryango ufasha aba bangavu kwiga imyuga, ibafasha kugira ubumenyi mu budozi, gukora imigati n’amasabune.

Mu rwego rwo gukomeza gutera intambwe muri iyi gahunda twiyemeje, Certa Foundation iritegura gutangiza gahunda yo gushakira buruse zizafasha aba bangavu gukomeza amashuri yabo. Ibi kandi bijyanya no kwigisha aba bangavu uburenganzira bwabo, bagashishikarizwa kumenya agaciro bafite no kwaka ubufasha bemererwa.

Certa Foundation ifite intego zo kongerera ubushobozi aba bangavu babyaye imburagihe kugira ngo babashe abantu bitunze kandi bafite ubumenyi mu nzego z’imirimo zitandukanye. Muri uru rugendo rwacu rwo gushaka ubutabera no gufasha abangavu kwiyubaka, dukora ibishoboka byose kugira ngo hatangira inzozi z’aba bangavu zipfukiranwa n’ibibazo barimo.

Uyu muryango wacu ntutanga ubufasha gusa ku bangavu babyaye ahubwo utanga n’ubujyanama n’ubufashamyumvire ku bafite inzozi zo kuba abanyamategeko, tubaha amahirwe yo kubasobanurira Isi y’ibijyanye n’amategeko, by’umwihariko mu nzego Afurika iburamo abanyamwuga, nk’amategeko y’iby’ikoranabuhanga, amategeko y’ibidukikije na siporo n’ibindi.

Intego za Certa Foundation ni ugutanga umusanzu ufatika mu mibereho y’abangavu babyaye by’umwihariko ababana n’ubumuga ndetse no kubaka ubushobozi bw’abanyamategeko b’ejo hazaza.

Twubakiye ku cyerekezo dusangiye cyo kwihesha agaciro, kubyaza umusaruro amahirwe no kugera kuri byinshi, Certa Foundation ibifashijwe n’abafatanyabikorwa batandukanye ifite intego yo kuba icyitegererezo kuri uru rubyiruko rw’Abanyarwanda no kubaka icyizere cy’ejo hazaza na sosiyete ifite indangagaciro zo gushyigikira abayigize bose nta vangura.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .