Bwana Vincent Lurquin, ntabwo ari wowe ukwiye kwirebaho!

Yanditswe na Gatete Nyiringabo Ruhumuliza
Kuya 19 Ukwakira 2020 saa 09:49
Yasuwe :
0 0

Isomo rya mbere wiga mu ishuri ryiza ry’amategeko ni uko atari wowe ukwiye kwirebaho. Ko ubuzima bw’umukiliya aribwo buba buri mu bibazo, ndetse ibikorwa byawe bishobora gutuma bakatirwa urwo gupfa cyangwa bakarangiriza ubuzima bwose muri gereza.

Ko imyitwarire yawe idahwitse nko guhangana n’abacamanza cyangwa gutanga amatangazo mu binyamakuru bitaba mu nyungu z’umukiliya wawe. Ko iyo urangije iminota itanu yawe yo kwigaragaza, ujya mu rugo ariko umukiliya wawe ntatahe.

Ni ibyo bigisha mu ishuri ryiza. Vincent Lurquin, umunyamategeko mu rugaga rw’abavoka i Bruxelles, bigaragara ko atagiye mu ishuri ryiza ry’amategeko.

Vincent Lurquin yinjiye mu Rwanda ku wa 3 Ukwakira 2020 kuri viza y’ubukerarugendo. Inzego zishinzwe abinjira n’abasohoka mu Rwanda zitangira viza aho umuntu yinjirira mu gihugu, ku bantu bose aho baba baturutse ku isi. Baba biteze ko abo bashyitsi baza kuvugisha ukuri, ku mpamvu zumvikana, hashingiwe ku mpamvu z’urugendo rwabo.

Mu buryo bubabaje, iteka si ko bigenda.

Ubwo Lurquin yahageraga, yagannye Ubunyamabanga bw’Urugaga rw’Abavoka mu Rwanda, abaza icyo bisaba kugira ngo umuntu abe Umunyamategeko mu Rwanda.

Ubunyamabanga bwamusobanuriye ibisabwa, bumumenyesha ko hashingiwe ku ngingo ya 7 y’Itegeko nº 83/2013 ryo ku wa 11/09/2013 rishyiraho Urugaga rw’Abavoka mu Rwanda, rikanagena imitunganyirize n’imikorere byarwo, Abavoka bo mu mahanga bemererwa gukorera mu Rwanda mu gihe amategeko y’iwabo atabuza abanyarwanda bene ubwo burenganzira.

Ntabwo bari bazi ko Me. Lurquin yarenze ku mategeko agenga abinjira mu Rwanda, akabeshya ku mpamvu z’urugendo rwe mu Rwanda, aho yinjiriye mu gihugu kuri viza y’ubukerarugendo aho kuba viza y’akazi, yashoboraga kumwemerera gukomeza urugendo rwo gushaka ibyangombwa byo gukorera mu gihugu.

Bagize ibyo bamenya ubwo Perezida w’Urugaga rw’Abavoka i Bruxelles yandikiraga Urugaga rw’Abavoka mu Rwanda, amenyekanisha umunyamuryango warwo, Me Vincent Lurquin kuri mugenzi we wo mu Rwanda.

Perezida w’Urugaga rw’Abavoka mu Rwanda yarasubije, abaza niba iyo ntambwe yaba ari intangiriro nshya y’umubano w’ingaga zo mu Rwanda na Bruxelles.

Yaramubajije ati “Ese abavoka b’Abanyarwanda bashobora kwemererwa kunganira abakiliya mu nkiko z’i Bruxelles mbahaye icyemeza ko ari abanyamuryango bacu?”

Igisubizo cyaje nyuma y’iminsi itatu Me Lurquin yaravuye mu gihugu ku wa 10 Ukwakira 2020, cyemeza ko bidashoboka ko abanyamategeko b’Abanyarwanda bunganira abakiliya mu bucamanza bwaho.

Umwavoka asabwa kuba ari umubiligi cyangwa umuturage wo mu Muryango w’Ubumwe bw’u Burayi. Abavoka badaturuka mu Muryango w’Ubumwe bw’u Burayi bashobora kwemererwa gukorera i Bruxelles mu buryo bw’umwihariko, mu gihe habayeho gukomorerana hagati y’Ingaga z’abavoka z’ibihugu byombi, cyangwa mu gihe hari amasezerano yasinywe hagati y’bihugu.

Nta masezerano nk’ayo yabayeho hagati y’ibihugu byacu byombi.

Perezida w’Urugaga rw’abavoka mu Rwanda yaje kumuhakanira. Yamusobanuriye ko u Rwanda rufite itegeko nk’iryabo n’amasezerano hagati y’ibihugu byo muri Afurika y’Iburasirazuba, atuma abavoka bo mu karere bunganira abakiliya muri kimwe mu bihugu bikagize.

Yamugaragarije icyizere ko wenda ayo masezerano ashobora kuzabaho, akazatuma abanyamategeko bo mu bihugu byombi babasha gukora umwuga nta nkomyi.

Twabanje gutekereza ko birangiriye aho, ariko twari twasuzuguye ukwikunda kw’inshuti yacu y’Umubiligi. Ubwo yageraga mu Bubiligi, Me Lurquin yagiye mu bitangazamakuru avuga ko yangiwe kubonana n’umukiliya we, bivuze ko adashoboka kubona ubutabera bunoze mu Rwanda.

Vincent Lurquin wari wiyoberanyije, akabeshya inzego z’abinjira n’abasohoka, yasubiyeyo yijujutira ko atafashwe mu buryo bwihariye mu Rwanda.

Yagize amahirwe kuko atafatiwe ku Kibuga Mpuzamahanga cy’Indege cya Kigali kubera kurenga ku mabwiriza agenga abinjira mu gihugu no gushaka kurenga ku mabwiriza agenga gukorera mu Rwanda.

Paul Rusesabagina afite abanyamategeko babiri bishyurwa mu misoro y’abaturage. Hejuru y’ibyo byose hari aho mbona ikibazo.

Kugira ngo uregwa ahabwe umwunganizi wishyurwa na guverinoma, agomba kugaragaza icyemezo ko atishoboye, ko ari mu cyiciro cya mbere cy’Ubudehe (kigenewe abafashwa na leta) ku buryo atabasha kwiyishyurira umwavoka.

Paul Rusesabagina ni umukire, ariko uyu mugabo arimo gufashwa mu misoro yacu, nyamara abagizwe imfubyi cyangwa abapfakajwe n’ibikorwa by’umuryango we w’iterabwoba wa MRCD na FLN, ntabwo bahawe iyo nkunga ngo baregere impozamarira. Nizere ko Minisiteri y’ubutabera ibibona ngo nabo bahabwe ubutabera.

Ku rundi ruhande, hari ikindi kibazo cyigeze kubaho, cy’umunyamerikakazi winjiye mu Rwanda kuri viza y’ubukerarugendo, arangije asaba kubonana na Ingabire Victoire muri gereza.

Ubwo uwo mugore yangirwaga, yarasizoye. Birababaje kuba duhura n’abantu nk’aba b’abiyemezi. Abantu bumva ko igihe bageze muri Afurika, impanda zigomba kuvuzwa maze amarembo yose akugururwa.

Tugwa mu kantu hano iyo abimenyereza umwuga bahaguruka bakavuga ko bashaka guhura na Perezida. Maze imyaka 26 mu Rwanda, ntabwo ndahura na we mu kiganiro cyacu twenyine, nta nubwo napfa kubisaba, ariko buri gihe ndamutora.

Nyamara ntibibuza ko iyo ngiye mu Burayi, mbwira buri wese ko perezida ari umuntu wa hafi tuvugana kenshi.

Ukwikuza kw’abazungu ni indwara, indi nshuro umuvugizi wa Rusesabagina w’umunyamerikakazi, Kitty Kurth, we yarakabije ati: ‘Niba Paul Rusesabagina atarekuwe mu cyumweru kimwe, tuzatera umugongo u Rwanda tunasabe umuryango mpuzamahanga kubigenza utyo”.

Ibyumweru byarashize ibindi birataha, Rusesabagina ari muri gereza mu gihe abantu nkanjye baciye bugufi bari hanze bategereje ko ikirere kibasekera.

Hari abantu bashaka kubakira amazina ku bibereye mu bibazo. Barakinira ku hazaza habo n’urubyaro rwabo. Ndahamya ko Rusesabagina wamaze kwakira ibigomba kuba, bakwiye kumuha amahoro akisobanura imbere y’ubutabera mu gihugu.

Hari abavoka badaterwa ipfunwe no kubwira abo bunganiraga bati “Ihangane twatsinzwe, uzamara imyaka yawe yose muri gereza, ariko ntugire ikibazo, urubanza rwawe rutanze umusanzu mu kuzafata ibindi byemezo ku manza zizarukurikira ndetse ibisekuru bizaza bazaruvanamo amasomo.”

Umukiliya ikimuraje ishinga ni ukurekurwa no gutsinda urubanza, ntabwo bakeneye kwifashishwa mu nyungu bwite z’abavoka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .