00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bose bagomba kurwanya Jenoside n’ingengabitekerezo yayo bivuye inyuma

Yanditswe na Mukagasana Yolande
Kuya 5 Gicurasi 2021 saa 03:30
Yasuwe :
0 0

Banyarwanda bavandimwe ni ubwa mbere mbahaye ubutumwa. Ubu butumwa si ubusanzwe kuko ari ubutumwa bw’urukundo mbasaba n’ubufatanye. Nababwiye kenshi ko amateka ya Jenoside yakorewe Abatutsi atari amateka y’abiciwe cyangwa abishe gusa. Nubwo ari amateka y’ikiremwamuntu aho kiri hose mu si, abanza kuba ayacu nk’Abanyarwanda, ari natwe bahamya bayo kuko ari ayacu tuyarusha bose. Ni amateka y’Abanyarwanda twese, ariko cyane azabungwabungwa n’u Rwanda rw’ejo. Urubyiruko rwacu, abana barwo, abuzukuru, abuzukuruza, ubuvivi n’ubuvivure, ndetse agakomeza mu binyejana byose uko bizagenda bisimburana tutagihari.

Ayo mateka ntitwayasubiza inyuma ngo ahinduke, byararangiye. Nituyashyireho akadomo tuvuge ngo ntazongere kurangwa iwacu. Kandi tujye twibuka ko nta munyarwanda utayahuriyemo n’ingaruka zakagombye kumusigira isomo rikomeye. Urwango ni rubi, iyo urufite rukwica umutima mbere y’uko n’uwo wanga abimenya. Ndashimira abarwicujije, bakicisha bugufi bagasaba imbabazi, nabyo ntibyoroshye ndabizi, ni impano y’Imana ariko Imana urayisaba, kandi iyo wicishije bugufi iraguha, ikaguhera ubuntu. Bisaba imbaraga zikomeye z’umutima, izo mwarazigabiwe, nimuzishyire mu bikorwa muzasige umurage mwiza. Bavuga ko umubyeyi gito araga abana ibyamunaniye, kuraga abana urwango ntihakabeho i Rwanda.

Nitwirinde gutoneka abarokotse Jenoside, tubafate mu mugongo muri iki gihe twibuka Abanyarwanda b’inzirakarengane bishwe urw’agashinyaguro kandi nta cyaha bakoze ari inzirakarengane baziza uko zavutse. Kandi tujye twibuka ko bapfuye nabi bicwa n’abo batagiraga icyo bapfa, bari basangiye byose, bakazira ingengabitekerezo y’urwango. Umwana w’uruhinja ntacyo yari kugira apfa n’umuntu mukuru. Twibuke ko Jenoside yakozwe ku manywa y’ihangu isi yose irebera. Abatugejeje kuri aya mateka ntabwo baricuza, n’ubu turangaye byasubira. Ariko nta kitubwira ko haba Jenoside yakorewe Abatutsi kuko ahari urwango hatabamo ibitekerezo bizima. Twatewe icyasha n’amateka nimuze tukirenge tugaragaze ko dufite agaciro n’ubumuntu.

Bayobozi b’Ubucamanza, iki gika nimwe nkigeneye. Imanza zihoraho hagati y’abantu kuko ahari abantu hanuka urunturuntu. Ariko niba hari imanza zisubizamo ibya gacaca nsanga zikwiye kwirindwa ku barokotse muri ibi bihe by’icyunamo bibazurira imibabaro n’agahinda. Simbangamiye ubucamanza no guhana uwakora icyaha uwo ariwe wese. Ariko kubyutsa ibibazo bya Gacaca mu cyunamo nabigereranya no kudaha agaciro Jenoside yakorewe Abatutsi. Abasubirishamo imanza simbabujije, ariko iyo gahunda iba ikwiye gushyirwa nyuma y’ukwezi kwa Nyakanga, nubwo imibabaro y’abarokotse Jenoside itagira igihe irangirira. Kandi icyo nibwira ni uko iyiba abarokotse bishyurwaga uko bikwiye harimo abatanakenera ubufasha bwa Leta, nayo ikaruhuka. Leta ni umubyeyi wa twese kandi ntiyigeze iterana umuturarwanda n’umwe.

Rubyiruko Rwanda rw’ejo, mwebwe nkingi twegamiye, nimwe duhanze amaso. Mumenye ko nimunyerera twe tuzagwa. Nimwe BeneRwanda, abakuze turabyina tuvamo. Nimukomere ku ndangagaciro zanyu zarangaga Abanyarwanda. Ubutwari, Ubunyangamugayo no gukunda igihugu. Mukomere ku muheto murwanire bose, ivangura muryime icyanzu.

Mwirinde gutega amatwi abababyobya. Mumeze nk’indabo mu busitani, mwese muri beza mukwiye gukundwa. Nimwe mutuma u Rwanda ruba rwiza kuko muri umutima warwo. U Rwanda ni ubusitani, mwe muri indabo zirugira rwiza, rugashashagirana ubwiza bwanyu rukifuzwa n’amahanga. Nimusigasire amateka yanyu, ejo batayabahimbira uko bashaka kandi muhari. Nimwirinde ababayobya mudata umurongo mugateshuka ku ntego. Mwirinde urwango rwabasubiza aho twavuye, nimurebe ahazaza mwiteze imbere. Musige inyuma ibibaca intege, mwitegurire isi uko muyifuza, isi itagira icyasha cy’urwango, mwiyubakire igihugu cy’urukundo mwese mucyiyumvemo nk’umubyeyi ubahetse.

Ndabasaba imbaraga z’umutuma n’ibikorwa mwe mwarokotse. Barokotse dusangiye amateka akarishye, ndabahobeye kandi ndabakomeje muri ibi bihe turimo bitatworoheye. Ndabasaba mwese gufatana mu nda, ndabasaba kugira imbaraga z’umutima. Nzi neza ko mwatanze byinshi kugirango igihugu kibeho kuko cyari cyapfuye kitakibarwa ku mugabane n’umwe w’isi.

Ndabizi abenshi imibiri yanyu yarashegeshwe, n’utabivuga agendana umutima umuremereye.

Twishwe umubiri, nyamara abicanyi hari byinshi batabashije kwica. Twarabatsinze rero n’ubwo tutakigira abacu, ariko turacyafite ubumuntu batabashije konona, indangagaciro za muntu zarabacitse, turacyafite ubumuntu n’urukundo rujyana nabwo. Turacyari imfura zishinjagira n’ubwo zaba zishira, ariko turiho nubwo batabishakaga kandi tuzabaho, ndetse tubeho neza kuko kubaho neza atari ubukungu, ari ukwakira ubuzima uko tubufite tukabwemera.

Nimukomeze mutwaze kandi mutwaze gitwari. Ubona tugenda, duseka, dukunda, tugerageza kubaho nk’abandi, agirango turiho nkabo muri byose. Oya, tugendana intimba itazapfa gushira kandi iremereye cyane, tukarenzaho ngo tubeho n’ubwo kwiyibagiza ibyo twabonye bitatworohera. Tubikora ngo dutere intambwe, duhagarare tutajegera dushyire ikirenge imbere y’ikindi bikunde. Bishoboka byaba indoto wakanguka ugasanga wibeshye. Uko niko kuri kwacu tutasubiza inyuma kuko bidakunda.

Nta munsi waruse iyindi kuva Mata kugeza Nyakanga hashize imyaka makumyabiri n’irindwi, uretse kubona inkotanyi ziduhingutseho. Zahojeje abatabasha guhora, zavuye abakomeretse ku mibiri ndetse no kumutima, zagaburiye abicwa n’inzara, zatubereye imbyeyi ntacyo twabona tuzitura. Zatwigishije ubwiyunge twari tuziko budashoboka, batubera intwaramuheto zitubonera kure twe tutagitekereza.

Bagenzi banjye dusangiye amateka, ntawe uturusha kuyamenya. Nimuze duhaguruke kuko isi mbi yarahagurutse. Yahagurukiye u Rwanda n’abana barwo. Turwanye abahakana amateka yadusize uko tumeze uyu munsi. Twikwemerera n’umwe kuyapfobya cyangwa kuyahakana. Dukore iyo bwabaga tumurwanye kuko ntawundi uzabidukorera ni twe ubwacu. Harabaye ntihakabe Isi yaradutereranye birazwi ntacyo nayo yakora ngo ibisubize inyuma ngo bikunde. Nitureke badutinyire ko tuba mu isi y’abazima nyamara turi no mu y’abacu badusize ntawe ubishaka. Batuba hafi hose no mu gihe cyose, ingufu zabo nizo zacu, ntawe uzadutsinda twitwaje ukuri gukakaye nka Jenoside.

Banyarwanda mufite Imana, nituyisigasire itazongera kuducika, turwanire icyubahiro cyo kuba abantu, turwanye urwango rwa Jenoside n’ingengabitekerezo yayo.

Harabaye ntihakabeho Jenoside ukundi mu gihugu cyacu.

Yolande Mukagasana yasabye abanyarwanda bose ko bagomba kurwanya Jenoside n’ingengabitekerezo yayo bivuye inyuma

Fondation Yolande Mukagasana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .