Umunezero w’umugore, urufunguzo rw’urugo rutekanye

Yanditswe na Pastor Desire Habyarimana
Kuya 24 Mutarama 2020 saa 10:39
Yasuwe :
0 0

Ubusanzwe umugore ni we mugenzuzi w’ibikorerwa mu rugo byose, ari nayo mpamvu, umunezero we ugira impinduka nziza zikomeyemeye ku byishimo by’umuryango wose kurusha umugabo.

Ubushakashatsi bwerekeranye n’imibanire mu ngo, bwagaragaje ko umunezero w’umugore ufite akamaro ntagereranywa mu kubungabunga no gushyigikira imitekerereze myiza y’abana mu muryango mu kigero cy’ubwangavu n’ubugimbi.

Mu bushakashatsi bujyanye n’imibanire mu ngo buyobowe na Harry Benson ndetse na Professor Steve McKay wo muri Kaminuza ya Lincoln, basanze ingo 13,000 zihamya ko umugore ari we uzana amahoro n’umutekano mu bana kuva bakivuka kugeza bubatse ingo zabo.

Iyo umubyeyi yeretse umwana we umunezero uri ku kigero cyo hejuru mu gihe cy’amezi 9 y’ubukure bituma azamuka neza agakurana imyumvire myiza kandi ubwonko buba bufungutse.

Muri ubu bushakashatsi babajije uburyo ababyeyi bagaragariza abana babo ibyishimo n’uburyo bicarana baganira. Basanze umwana waganirijwe n’ababyeyi be kuva afite amezi 9 kugeza yujuje imyaka 14, ari we ugira ubuzima bwiza mu gihe umwana utarabonye umunezero w’ababyeyi muri iki kigero usanga ibibazo byo mu mutwe ariwe bibarizwaho.

Mu gikorwa cyo kugaragariza abana umunezero, ku mugore byikuba incuro ebyiri kuruta uko umugabo yabikora. Ibi bizanira umuryango imibereho myiza.
Benson yavuze ijambo ryamamaye hose ati“umugore wishimye, ubuzima bwishimye”, kandi ibi ni ukuri.

Benson yakomeje avuga ko urufunguzo rw’umuryango wishimye ari uko umugabo akunda umugore by’ukuri hanyuma urukundo rwose umugore ahawe akarusangiza abana ndetse agashyiraho n’uburyo bwe karemano yavukanye.

Uburinganire bushishishikariza abashakanye (umugore n’umugabo) gufatanya kurera ku kigero kingana ariko kugeza ubu abagabo ntabwo babikora ahubwo usanga abagore ari bo baharirwa inshingano.

Abagabo bagomba kuzuzanya n’abagore babo mu kwita ku bana, ikindi kandi abagabo bakwiye gufata mu mitwe yabo ko kubaha abagore babo no guca bugufi ntabwo bisobanura guta agaciro ahubwo ni ukubaka icyizere cy’umuryango uzira amakimbirane.

Pasiteri Habyarimana Desire yatanze inama zo kugira umuryango wishimye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .