Uko Museveni agerageza guhungabanya u Rwanda, Uganda irushaho kuhababarira

Yanditswe na Muhumuza Alex
Kuya 9 Werurwe 2021 saa 09:42
Yasuwe :
0 0

Hari inkuru ya Charles Kazooba iherutse gutambuka muri Sky News Uganda ariko yari agahomamunwa kuko itari igamije kuvuga koko ku bibazo byugarije Umuryango wa Afurika y’Iburasirazuba, ahubwo yari igamije kuyobya rubanda.

Umutwe wayo ubwawo uvuga ko “Kagame asize Afurika y’Iburasirazuba mu bibazo birenze (Kagame leaves East Africa more wounded” ) , nyamara ahubwo umutwe wari ukwiriye guhinduka kugira ngo ujyane n’ibiyirimo. Yakabaye ifite umutwe uvuga uti “Gushyigikira imitwe y’iterabwoba irwanya u Rwanda kwa Museveni, byashyize mu kaga ubukungu bwa Uganda”.

Kuba Kazooba yemera ko “Museveni afitanye umubano wihariye n’abatavuga rumwe na Leta y’u Rwanda barimo umushoramari mu nganda z’amatabi Tribert Rujugiro na Kayumba Nyamwasa wahoze ari Umugaba w’Ingabo” byakabaye igihamya ko umuyobozi wa RNC, umutwe w’iterabwoba wagize uruhare mu bitero bya gerenade zatewe mu Mujyi wa Kigali mu 2010, akaba n’umuterankunga mukuru w’uwo mutwe, atari umuntu usanzwe wo kwita utavuga rumwe na Leta. Mu yandi magambo, uko kuyobya uburari kwa Kazooba nta mutwe n’ikibuno bifite, ni nka kwa kwigira rutare kwa Museveni.

Nk’imbanza ihora ishaka ko ibibazo bya Afurika bikemurwa n’abanyafurika ubwabo kandi nk’umuntu uhoza Afurika ku mutima (haba mu magambo no mu bikorwa bitandukanye na mugenzi we wa Uganda), Perezida Kagame inshuro nyinshi yashakishije uburyo ibibazo bibangamiye umubano w’u Rwanda na Uganda byakemuka ariko birananirana.

Icya mbere, yabigaragaje hifashishijwe uburyo bwa dipolomasi ubwo Abanyarwanda batabwaga muri yombi umusubirizo muri Uganda. Yongeye kubigaragaza mu nama zikomeye yagiye ahuriramo na Perezida Museveni nk’igihe habaga Inama y’Umuryango wa Afurika Yunze Ubumwe i Addis Abeba tariki 29 Mutarama 2018, yongera muri Werurwe uwo mwaka ubwo yagiriraga uruzinduko i Kampala.

Mu buryo bumwe nk’ubwa Kazooba bwo kutava ku izima, Museveni yanze gucana umubano n’imitwe y’iterabwoba yiyemeje kudurumbanya umutekano w’u Rwanda. Gushimuta Abanyarwanda byarakomeje, abagize amahirwe bagakira iyo nzira y’umusaraba bakajugunywa ku mupaka ari intere, nta n’umwe ugejejwe mu nkiko za Uganda.

Nyamara, nubwo icyo gihugu cyakomeje kuzamura ibirego by’ubutasi, nta n’umwe wigeze abibazwa mu rukiko, bisobanuye ko bwari uburyo bwo kugira abo bibasira, aho kuba ikibazo cy’abaza gutata koko. Ibikorwa bya Uganda mu gukorana na RNC byarakomeje kugeza ubwo Museveni ubwe yivugira ko mu buryo bw’impanuka, yahuye n’abayobozi ba RNC.

Mu gukomeza kugerageza gukemura ibi bibazo, Perezida Kagame yasabye Angola na RDC ubufasha mu buhuza. Kugeza ubu Uganda yanze gushyira mu bikorwa amasezerano y’ubufatanye ibihugu byombi byasinye.

Abayoboke ba RNC barakidegembya ku butaka bwa Uganda ndetse bakomeje ibikorwa byabo byo gushaka abayoboke, bashinga ibigo byo guhuguriramo abayoboke muri Uganda mu gihe Abanyarwanda bakomeje gutabwa muri yombi bakajyanwa muri gereza zitazwi. Aho kubanza gukemura ibi bibazo byatumye umupaka ufungwa, abavuzanduru ba Museveni bakomeje kwitatsa.

Kazooba mu nkuru ye avuga ko Minisiteri ishinzwe Umuryango wa Afurika y’Iburasirazuba muri Uganda, yatangaje ko mu gihe cy’amezi atatu ya mbere ubwo Umupaka wa Gatuna wafungwaga, Kampala yahombye miliyoni 664 z’amadolari.

Hagati ya Kanama 2019 na Kanama 2020, Banki Nkuru ya Uganda yatangaje ko ibyoherezwaga mu Rwanda byamanutse cyane, bigera ku gaciro ka miliyoni 5.1 z’amadolari bivuye kuri miliyoni 131 z’amadolari ugererangije ibihe nk’ibyo hagati ya 2018 na 2019.

Mbere y’uko umupaka ufungwa, Uganda yinjizaga nibura miliyoni 18 z’amadolari ku kwezi. Amabuye y’agaciro avuye mu Rwanda, icyayi n’ikawa binyura muri Uganda iyo bigiye ku Cyambu cya Mombasa. Kuri ubu, 80 % by’ibyo u Rwanda ruvana hanze binyura muri Tanzania.

Kazooba ashaka kumvikanisha ko u Rwanda rukwiriye kuba rureka Uganda igakomeza kurukuramo amafaranga menshi yo kujya gutera inkunga RNC.

Mu bigaragara, gutera inkunga imitwe y’iterabwoba bigira ikiguzi. Ahubwo umuntu yakwibaza impamvu Kazooba adakuramo umwanzuro, w’uko gukomeza kwikakaza kwa Museveni gukomeje gushyira mu kaga ubukungu bwa Uganda, bikabangamira ubuhahirane mu karere.

None se niba u Rwanda n’u Burundi byarafashe inzira yo gushakira umuri ibibazo biri hagati y’umubano wabyo harimo n’ikibazo cy’Umutwe w’Iterabwoba wa FLN wagize uruhare mu bitero byo mu 2018 byagabwe mu Majyepfo y’u Rwanda, Museveni wakabaye afatwa nk’umuntu mukuru n’inararibonye, we yakabaye akora ibirenze ibya mugenzi we w’u Burundi.

Uko bigaragara ahubwo, gukomeza kwihagararaho bishobora no kuzabangamira byinshi, birimo no kwitambika imbaraga z’abandi bayobozi mu karere zigamije kubaka Umuryango wa Afurika y’Iburasirazuba uhamye.

Umupaka wa Gatuna ugabanya Uganda n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .