00:00:00 IGIHE NETWORK KN KINYARWANDA EN ENGLISH FR FRANCAIS

Uburezi Made in Rwanda, umuti urambye w’Ireme ry’Uburezi ricumbagira

Yanditswe na Dr Emmanuel Nibishaka
Kuya 15 March 2022 saa 10:56
Yasuwe :

Ni amahirwe kuba ubuyobozi bw’igihugu bwarafashe umwanzuro wo gushyira imbaraga mu bikorerwa iwacu mu Rwanda muri gahunda izwi mu izina rya “Made in Rwanda”.

Iyo gahunda yaritabiriwe kandi byamaze kugaragara ko yatanze umusaruro mu iterambere ry’igihugu, muri gahunda yo gukunda igihugu ndetse by’umwihariko yafashije mu guhangana n’icyorezo cya covid-19 n’ingaruka zacyo.

Benshi, mu banyarwanda n’inshuti z’uRwanda, bishimira gukoresha ibyo mu Rwanda kuko ari byiza kandi bibatera ishema.

Gahunda ya “Made in Rwanda” yatangiriye kumvikana cyane mu birebana n’imyambarire ndetse n’ubugeni, ariko uko imyumvire yagiye yaguka ni ko n’urwego rw’inganda rugenda rwesa imihigo muri Made in Rwanda. Bikaba biri amahire ko ubuyobozi bw’igihugu bushyira imbaraga mu gukurura abashoramari, ibyo bikongera ibikorerwa mu Rwanda ari nako abanyarwanda benshi baronka amahirwe yo kubona imirimo.

“Made in Rwanda” ntabwo ari ibikorwa bifatika mu bucuruzi no myambarire gusa; ahubwo yigaragaza cyane mu budasa bw’igihugu mu nzego nyinshi harimo umutekano, uburezi, ubuzima, imiyoborere, ubumwe n’ubwiyunge, gahunda yo kurwanya ubukene, guteza imbere abari n’abategarugori, iterambere rishingiye ku muturage, ibikorwaremezo, ikoranabuhanga, n’ibindi. Ibyo ni byo bituma u Rwanda ruba igihugu gifite icyerekezo cyo kuba igihangange maze kikicazwa kuri “table d’honneur”.

Gusa rero, n’ubwo byinshi bigeze aheza, hari n’ibigicumbagira bishobora guteza icyuho, bikaba byadindiza umuvuduko utangarirwa na benshi mu batuye isi. Muri ibyo bitaragera ahashamaje harimo n’uburezi.

Benshi bakunze kugaragaza ko ireme ry’uburezi ridahagaze neza mu Rwanda. Ibyo kandi ntabwo ari bya bindi by’ ‘umwana murizi udakurwa urutozi. Ikibazo cy’ireme ry’uburezi ntabwo cyihishira. Kuva mu mashuri y’incuke kugeza mu mashuri makuru na za kaminuza, ireme ry’uburezi rirahangayikishije. Ibyo bigaragazwa n’ukuntu mu itangira ry’amashuri, ababyeyi bafite abana baba bahangayitse bashakisha amashuri “meza” (afite ireme) babajyanaho. Ubwo abadafite amikoro bo baricecekera, atari uko banyuzwe, ahubwo ari bya bindi ngo “ubuze uko agira agwa neza”.

Mu kugaragaza ikibazo cy’ireme ry’uburezi hari ababiteramo urwenya ngo, Gitifu w’akagari areresha mu kagari katari ake, uw’umurenge akajya mu wundi murenge, Meya na we akaba yajyanye umwana we mu kandi karere, ubwo bikarangira abafite amafaranga atubutse bambutse imipaka bashakisha aho babona ireme ry’uburezi bizeye.

Kuba ireme ry’uburezi rigaragara nk’aho ritaragera ku rwego rwizewe si ukuvuga ko inzego zibishinzwe ntacyo zikora. Iyo wegereye izo nzego akenshi usanga nazo zizi neza ko icyo kibazo gihari, ndetse zinahangayikishijwe nacyo.

Hagati aho umuntu yakwibaza ati “Ubwo ikibazo cy’ireme ry’uburezi kizakemurwa gite mu gihe buri wese ashaka kurya ibihiye nyamara ntawe ushaka kwegera imyotsi ngo dufatanye guteka?, Ese ingamba zigenda zifatwa zaba zihangana n’ikibazo nyirizina dufite cyangwa zikemura gusa ibimenyetso by’ikibazo aho kujya mu mizi yacyo?”

Ibibazo bishingiye ku ireme ry’uburezi bifite ingaruka zitandukanye ku buzima bw’abaturage ndetse n’igihugu zirimo nko kubura abakozi bashoboye kandi bashobotse bijyanye n’icyo umuvuduko w’iterambere usaba, kutabasha kwikemurira ibibazo kubera ubumenyi n’ubushobozi , kutabasha gushyira mu bikorwa gahunda bwite na gahunda z’igihugu, kudakurura ubukerarugendo bushingiye ku burezi, kudahaza abashoramari mu birebana n’abakozi bashoboye, gutanga amadovize menshi ku bajya kwiga hanze (abirihira, abarihirwa n’imiryango cyangwa abarihirwa na Leta), kugira impuguke zize hanze ariko zitarerewe mu ndangagaciro z’umuco nyarwanda, ipfunwe ryo kugira impamyebumenyi cyangwa impamyabushobozi bidatanga umusaruro n’ibindi.

Ireme ry’uburezi rirakenewe rero kugira ngo ritange igisubizo kuri ibyo bibazo byagaragaye hejuru. Nubwo benshi bemeranya ko ireme ry’uburezi rikeneye gushyirwamo ingufu, kenshi abantu bitana ba mwana bibaza uko byagenda ndetse n’uwabikora. tutirengagije ko zitukwamo nkuru, bityo ikibazo cy’ireme ry’uburezi cyabazwa mbere na mbere Minisiteri y’uburezi, ariko burya imiterere y’uburezi isaba ko haba ubufatanye bwo ku nzego zinyuranye.

Niyo mpamvu ari ngombwa ko abantu bungurana ibitekerezo hagamijwe kurebera uburezi mu ndorerwamo ya gahunda y’igihugu gifite intumbero yo kubaka iterambere ryubakiye ku bumenyi.

Nk’uko igiti kigororwa kikiri gito, ireme ry’uburezi rigomba guhera mu mashuri y’incuke, bityo rigakomeza mu mashuri abanza, kugira ngo haboneke intango ifatika ibyiciro bikurikira bizubakiraho. Gusa rero, mu kungurana ibitekerezo, ni ngombwa kuganira ku rwego rw’uruhare rw’amashuri makuru na za kaminuza, dore ko aho ari naho abanyarwanda bategereje ibitekerezo byatuma ireme rigira icyanga.

Mu kungurana ibitekerezo, hakwifashishwa ibibazo bikurikira: Ese gahunda ya “Made in Rwanda” ihagaze ite mu burezi?, Ese ireme ry’uburezi rireba nde, ni nde ritareba? Ese ni uwuhe mwihariko ufitiye igihugu akamaro uwarerewe mu Rwanda yaratira utararerewe mu Rwanda? Ese ni iki umubyeyi uhitamo kureresha hanze y’uRwanda yaba ahomba ku buryo yakumva ko igihe kigeze ngo arereshereze mu Rwanda?

Ni ukwibaza kandi ngo Ese igihugu cyagira nyungu ki mu kugira uburezi bufite ireme kandi bufite umwihariko? Ese “made in Rwanda” mu burezi hari icyo yafasha muri gahunda yo gukunda igihugu? Ese ni iki cyatuma abanyamahanga, basanzwe bakururwa na byinshi mu Rwanda, bakururwa no kwiga mu mashuri yo mu Rwanda? Ese uretse kwiga porogramu zisobanutse ni iki kindi umuntu yakungukira mu ishuri ryo mu Rwanda, kuburyo bwamuzindura?.

Ese ni iki gituma amakaminuza yo mu Rwanda (yashingiwe mu Rwanda) agaragaza intege nke ugereranyije n’ayaturutse hanze? Ese amakaminuza yo mu Rwanda akorana ate kugira ngo afashanye kubonera hamwe igisubizo kirambye ku ireme ry’uburezi? Ni izihe ndangagaciro zikwiye kuranga uwize mu ishuri ryo mu Rwanda?

Umwanzuro
Burya gahunda za Made in Rwanda, gukunda igihugu, Ndi Umunyarwanda, Iterambere rirambye, Ubudasa bw’u Rwanda, Kwishakamo ibisubizo n’izindi, ni gahunda zifite aho igomba kuzatugeza nk’igihugu gifite intumbero cyihaye mu gihe runaka. Uburezi bugomba kwinjira muri iyo nkubiri kugira ngo na gahunda zindi zitazagwingira.

Ukurikije uko ikibazo cy’ireme ry’uburezi kigenda gifata indi ntera, hakenewe ibiganiro byimbitse kandi by’igihe kirekire (National Debates) kugira ngo ikibazo cy’ireme ry’uburezi kivugutirwe umuti.

Dr Emmanuel Nibishaka ni Umuyobozi Mukuru Wungirije w’Urwego rw’Igihugu rw’Imiyoborere. Iyi nyandiko ni ibitekerezo bye bwite.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .