Kwihangira imirimo ni cyo cyerekezo cyo guhashya ubukene

Yanditswe na

Ephrem Mugobokanshuro

Kuya 10 Mutarama 2015 saa 06:32
Yasuwe :
0 0

Mu mwaka w’i 1930 mu gihe cy’ihungabana ry’ubukungu ku isi, Abahanga mu by’ubukungu barimo Umugabo witwa John Maynard KEYNES bafashe iya mbere mu gushishikariza abatuye isi guhashya ubukene, bihangira Imirimo.
Abantu benshi bagiye bagaragaza ukuntu Umurimo ukozwe neza uhesha agaciro nyirukuwukora. Ibi bigaragarira mu bitekerezo binyuranye, ndetse n’imigani ijyanye no gukunda Umurimo. Bamwe bati :’’ Le Travail anoblit l’Homme.’’ Ngenekereje mu Kinyarwanda bati : « Umugabo aterwa ishema n’Umurimo (...)

Mu mwaka w’i 1930 mu gihe cy’ihungabana ry’ubukungu ku isi, Abahanga mu by’ubukungu barimo Umugabo witwa John Maynard KEYNES bafashe iya mbere mu gushishikariza abatuye isi guhashya ubukene, bihangira Imirimo.

Abantu benshi bagiye bagaragaza ukuntu Umurimo ukozwe neza uhesha agaciro nyirukuwukora. Ibi bigaragarira mu bitekerezo binyuranye, ndetse n’imigani ijyanye no gukunda Umurimo. Bamwe bati :’’ Le Travail anoblit l’Homme.’’ Ngenekereje mu Kinyarwanda bati : « Umugabo aterwa ishema n’Umurimo yihangiye ».

Umunyarwanda nawe yungamo ati : « Nta Murimo mubi ubaho, usibye uwo kwiba no kuroga ». Abandi bati : « L’Oisiveté est l’Art de tous les Vices. » Bikaba bisobanuye ngo kuba imburamukoro niyo ntandaro y’amabi yose abaho.

Mugobokanshuro Ephrem watanze iki gitekerezo

Ku bemera Imana n’ijambo ryayo, Bibiliya igera n’aho ivuga iti : Udakora ntakarye.

Abakurambere b’Abanyarwanda kandi baciye imigani myinshi igenura ku murimo, bagira bati :

 Wanga guhingira Umwana w’Inyoni, uwawe akicwa n’inzara.
 Amaboko yanga gukorera inda, yapfa akayipfumbata
 Mu nda harara inzara, hakazinduka inzigo.
 Utayirimanye (inzara) ntayishira.
 Iyo utiyigishije, Isi irakwigisha

Mu bandi Bantu bagiye bashyigikira ibitekerezo mbaturabukungu twavuga nka Abraham MASLOW, aho agira ati: “Kugirango umuntu abeho neza agomba kugira aho akika umusaya (ni ukuvuga icumbi /Logement), akagira icyo afungura kandi gikungahahe ku ntungamubiri atari ugusamura, kandi Umuntu agakenera kwihesha agaciro no kugahesha abandi (Estime de soi et envers autrui). Ati ibi byose ntiwabigeraho wiyicariye gusa, bikaba bisaba gukora cyane, kugirango umusaruro uboneke ari nawo uvamo biriya byose nkenerwa.”

Robert DARWIN we ati: « Ubuzima ni urugamba (Struggle for Life/La Vie est un Combat.) Ntabwo uru rugamba avuga ari urwa ngwino turwane, ahubwo ni urugamba rwo kwiyumvisha ko ugomba kugira gahunda mu buzima bwawe, ko nta wundi uzakubeshaho utirwanyeho.

Charles BAUDELAIRE nawe ati : « Ubuzima bwose kugirango bube bwiza, bisaba kubutegura. Icyo uzaba kiraharanirwa. Nta mibereho myiza ishobora kukwisangisha. Byose ugomba guhatana ngo ubigereho kandi ntawe uhutaje.»

Ibi byose twavuze bwari uburyo bwo gukangurira Umuntu kwiteza imbere, akavana amaboko mu mifuka, agakora.

Mu bibazo rero by’ingorabahizi abantu benshi bakunda kuvuga,ku isonga haza ikibazo cy’ubushomeri (Chômage) . Iri jambo ry’ubushomeri Abantu benshi bakunze kutaryumva neza no kuryitiranya.

Ubushomeri ni iki ?

Ubundi kugirango witwe Umushomeri ugomba kuba warigeze kugira Akazi, nyuma ukaza kugatakaza mu gihe runaka ku mpamvu zitandukanye. Umusore w’Ingimbi cyangwa umukobwa w’inkumi ukirangiza amashuri ye, mu gihe agishaka Akazi kugirango arebe ko iminsi yakwisunika, ntabwo akwiye kwita Umushomeri.

Uko Ubukungu bw’Isi bugenda burushaho kuzahara, ikibazo kigenda kigaragarira buri wese mu batuye Isi ni icy’ubushomeri bugenda bufata indi ntera, ku buryo n’iwacu mu Rwanda icyo kibazo kigaragara.

Bamwe bati : « Leta nk’Umubyeyi wacu, udushoboza kuri buri kintu cyose, birimo n’amashuri tukiga tukaminuza, dore turarangije, none igihe ni iki duhe n’Akazi dushyire mu ngiro ibyo watwigishije, … »

Igitekerezo nk’iki ntabwo ari kibi, kuko burya buri wese muri twe aba yifuza kugira imibereho myiza haba kuri we cyangwa se umuryango we.

Ubundi kugirango Igihugu gitere imbere, kigira gahunda y’Uburezi kuri bose (Education pour tous(toutes) / Education for all). Ibi U Rwanda rwamaze kubigeraho kubera Abayobozi barwo bahaye Abanyagihugu amahirwe yo kujijuka binyuze mu kwigishwa ubumenyi ngiro cyangwa ubundi bumenyi muri rusange.

Mu bijyanye n’Ubukungu, hari icyo bita : ‘La Loi de l’Offre et la Demande’. Mu bukungu kandi uko ikintu kigenda kirushaho kubura ku Isoko niko kirushaho kugira agaciro (Tout Bien Economique doit être Rarissime).

Dufate nk’urugero rw’Umuntu wese urangije amashuri yaba Ayisumbuye ndetse na Kaminuza, dukurikije ko umubare ari munini cyane, ugereranyije n’Akazi kari ku Isoko ry’Umurimo, haba muri Leta, Ibigo bya Leta (Services Publics ou Para-Publics) ndetse n’Ibigo bikomeye by’Abikorera ku giti cyabo (Secteur Privé), byagora kubonera buri wese ubyifuje Akazi.

Dore ingamba numva natangaho igitekerezo, kugirango duhashye ubukene tunihangira Umurimo.

 Buri Munyarwanda wese ushaka kwiteza imbere, agomba kwigirira icyizere( Avoir confiance en soi/self-confidence)
 Kwirinda icyo aricyo cyose cyaguca intege (Eviter l’Auto-censure)
 Kugira intumbero (Avoir une détermination)
 Gukorera mu Matsinda (Travailler en pleine collégialité)
 Kwirinda imitekerereze yo guhabwa buri gihe Akazi / gukorera abandi
 Kwagura Amasoko y’imbere ndetse n’ayo hanze (Intégration Régionale)
 Kugira uruhare mu izamuka ry’Ubukungu bw’Igihugu bufatiye ku bushobozi mu bukungu bwacyo/ Produit National Brut (P.N.B)

Kugirango kwihangira Imirimo bishobokere buri wese wifuza kwiteza imbere, numva kubwanjye hakwiye kwegeranywa Imishinga yose ishobora gukorwa mu Gihugu ndetse hagashyirwaho Ibyiciro by’Abantu bifuza gukora iyo mishinga. Imishinga itanga icyizere cyo kugirira Abantu benshi akamaro no kubaha akazi karambye, ikaba yahabwa Igishoro kitagira Ingwate ziremereye.

Abatangizi mu bucuruzi bari bakwiye kugira bimwe basonerwa
Nk’ubu mu Rwanda dukeneye icyo bita : ‘Code d’Investissement’, aho Umushoramari cyangwa Rwiyemezamirimo ahabwa umwitangirizwa w’igihe gifatika nk’imyaka 5 cyangwa se 10 hari bimwe asoneweho Imisoro n’Amahoro mu gihe Umushinga we ucyiyubaka.

Iyo ‘Code d’Investissement’ cyangwa ‘Régime de Zone Franche’ bifasha ba Rwiyemezamirimo gukomeza Ubucuruzi bwabo. Nyuma y’igihe Umushinga umaze kubyara inyungu, Ba Rwiyemezamirimo bakaboneraho gutanga Imisoro ku Nyungu mu buryo burambye, kuko noneho baba bafite aho bayikura biteganyirije.

Ibi bizatuma Rwiyemezamirimo ashobora kubona Igishoro gihoraho (Autofinancement : Fonds de Roulement :Cash-Flow) aho kumva ko buri Munyarwanda wese yatega amaso Ahari Akazi ahantu hose hamanikwa Amatangazo(Tableaux d’Affichage).

Ikindi cyaranze Abasogokuruza bacu, ni ugutabarana aho rukomeye. Umuntu cyangwa se Itsinda ry’Abantu bashobora kurumbya Imishinga yabo mu buryo butunguranye. Mu Rwanda dukwiye Ikigega Kigoboka ba Rwiyemezamirimo barumbije mu buryo butunguranye : FONDS D’ENTRAIDE ET DE SOLIDARITE COMMERCIALE. Urugero ushobora gukora Umushinga w’Ubuhinzi bw’Urutoki, rukibasirwa rwose mu gihe gito na Kirabiranya….

Nkaba nakwanzura ino nyandiko ngirango mpamagarire buri wese, kumva Impuruza mbateye, ngo duhashye ubukene, twihangira Imirimo.

U Rwanda ruzazamurwa n’Amaboko y’Abana barwo nta n’umwe uvuyemo.

Igitekerezo-nama cya :
MUGOBOKANSHURO Ephrem
Akagari ka CYASEMAKAMBA
Umurenge wa KIBUNGO
Akarere ka NGOMA
INTARA Y’UBURASIRAZUBA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .