Kibeho, ikirezi cy’u Rwanda n’Isi

Yanditswe na Mutangana Steven
Kuya 27 Ugushyingo 2020 saa 12:28
Yasuwe :
0 0

Hagitangira kuvugwa cyane, mu 1981, abantu bahageze kenshi kandi ari benshi. Abari batarahagera bakumva inkuru zivuga ko “i Kibeho habera amabonekerwa”.

Amateka ya Kibeho agaragaza ko ku wa 28 Ugushyingo 1981 ari bwo umwana wo mu kigero cy’imyaka 16 wigaga mu kigo cy’amashuri yisumbuye yabonekewe na Bikira Mariya, akamubwira ko ari “Nyina wa Jambo”.

Nyuma y’imyaka 39, Kibeho ntiri mu bitabo, filime, inkuru zishushanyije n’iz’amajwi n’amashusho, indirimbo n’izindi ngeri z’ibihangano ndengamipaka gusa. Kibeho n’ibyayo biri mu mihigo y’Akarere iherereyemo, Nyaruguru.

Kibeho n’inzira ziyigana biri mu bikurikiranirwa hafi n’inzego zishinzwe ibikorwaremezo n’ubukerarugendo. Yewe, guhera mu 2008, Kibeho yagaragaye ku rutonde rurerure rw’ahantu ndangamurage hakozweho ubushakashatsi n’inzego zari zifite umuco mu nshingano z’u Rwanda.

Mu 2001 nibwo Kiliziya gaturika yemeje bidasubirwaho ko koko Bikira Mariya yabonekeye abanyeshuri batatu bigaga i Kibeho.

Iki cyemezo kihagira ahantu ha mbere muri Afurika habereye amabonekerwa yemewe n’ubuyobozi bubifitiye ububasha. Kugeza ubu nta handi kuri uyu mugabane harabera amabonekerwa yemewe na kiliziya. Ahandi hazwi hemejwe ni nka Lourdes mu Bufaransa na Fatima muri Portugal, ku mugabane w’u Burayi.

Abakobwa batatu babonekewe mu 1981-1989 ni Alphonsine Mumureke (guhera 28 Ugushyingo 1981), Nathalie Mukamazimpaka (guhera 12 Mutarama 1982) na Marie Claire Mukangango (guhera 2 Werurwe 1982). Babiri muri bo baracyariho, barimo Nathalie Mukamazimpaka uba i Kibeho na Alphonsine Mumureke ni umubikira ku Mugabane w’i Burayi. Marie Claire Mukangango wari warashatse, yaguye muri Jenoside yakorewe Abatutsi mu 1994.

Ukwizera kwa Musenyeri Bigirumwami kuri Kibeho kwabaye impamo

Musenyeri Aloys Bigirumwami (Musenyeri wa mbere w’Umunyarwanda u Rwanda rwagize), yagaragaje ko yizeraga cyane ko Kibeho izahinduka ahantu hakomeye hakorerwa ingendo nyobokamana (Igitabo Des Apparitions à Kibeho, annonce de Marie au Coeur de l’Afrique, 0.E.I.L, 1984, p.20 cya Gabriel Maidron).

Ibyari mu kwizera kwa Musenyeri Bigirumwami, byabaye impamo. Ku wa 15 Kanama 1988, Musenyeri Gahamanyi Jean Baptiste, yatanze uburenganzira bwo kuhakorera amasengesho ahuza abantu benshi. Ku wa 15 Nzeri 2001, Abashumba ba Kiriziya mu Rwanda bose bahakoreye urugendo nyobokamana rwanitabiriwe na bamwe mu bagize Guverinoma. Abashumba ba kiriziya bo mu bihugu byo mu karere k’ibiyaga bigari nabo baruhakoreye mu 2002. Ku wa 31 Gicurasi 2003 nibwo hatashywe ku mugaragaro shaperi yahubatswe yibutsa ayo mabonekerwa (Sanctuaire Notre-Dame de Kibeho), mu muhango witabiriwe n’uwari Perezida w’Inteko Ishinga Amategeko Umutwe wa Sena Dr Vincent Biruta, mu izina rya Guverinoma y’u Rwanda. Mu 2015, hashyizwe ibimenyetso ndangamurage (reliques) bya Mutagatifu Yohani-Paulo II.

Haratezwa imbere mu by’ubukerarugendo

Nk’uko tubisoma ku rubuga murandasi rw’Akarere ka Nyaruguru, muri iki gihe i Kibeho hakurura ba mukerarugendo benshi baba baturutse mu mpande zose z’Isi. Ikaba ariyo mpamvu “Leta y’u Rwanda ibinyujije mu kigo cy’Igihugu gishinzwe iterambere (RDB) bahashyize mu hantu hagomba gutezwa imbere”. Aka karere kemeza ko mu byo abantu bakaziho cyane harimo na Kibeho nk’ubutaka butagatifu.

RDB iranga Kibeho mu hantu nyaburanga hakorerwa ubukerarugendo bushingiye ku muco. Muri gahunda ngari ya “Visit Rwanda” nayo Kibeho iramenyekanishwa. Ku minsi ibiri y’ingenzi, kuwa 15 Kanama no ku wa 28 Ugushyingo, Kibeho yakira abantu bagera bari hagati ya 25,000 na 30,000 (mu bihe byiza bitari ibyo turimo bya COVID-19). Barimo abava muri Amerika, Polonye, Repubulika ya Czech, Slovakiya, U Bufaransa, U Butaliyani, U Buhindi, Uganda, Repubulika Iharanira Demokarasi ya Congo, Tanzaniya n’ahandi.

Mu bikorwaremezo bifasha iterambere rya Kibeho, twavuga umuhanda wa kaburimbo (Huye-Kibeho-Munini) uri hafi kuzura, amazi n’amashanyarazi, iminara y’itumanaho rigezweho, amavuriro, amashuri abanza n’ayisumbuye, serivisi z’amacumbi, isoko na gare bya kijyambere. Mu hantu ndangamurage haherereye hirya no hino mu gihugu, ni ho honyine hafite radiyo ihakorera inafite inshingano zo kumenyekanisha amateka yaho ariyo Kibeho Radio Maria yahashinzwe mu 2018.

Mu mishinga minini Kibeho itegereje, harimo Bazilika nini izahubakwa mu gihe kiri imbere ishobora kuzagira ubushobozi bwo kwakira abantu barenga ibihumbi icumi.
Kuhagira nk’ubutaka butagatifu, ni amahirwe akomeye bamwe mu bazi agaciro kabyo bagereranya n ‘ikirezi cy’u Rwanda ndetse n’isi muri rusange.

Kibeho habaye isango y'abemera Bikira Mariya, iterambere n'ubukerarugendo

Mutangana Steven, Umusomyi wa IGIHE.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .