00:00:00 IGIHE NETWORK KN KINYARWANDA EN ENGLISH FR FRANCAIS

Itsinda ry’impuguke za Loni: Ishusho y’indi Opération Turquoise

Yanditswe na Gatete Nyiringabo Ruhumuliza
Kuya 29 June 2023 saa 11:01
Yasuwe :

Ubwanditsi: Ibikubiye muri iyi nyandiko, ni ibitekerezo bwite by’umwanditsi Gatete Nyiringabo Ruhumuliza. Ni Umunyamategeko ndetse akaba n’Umusesenguzi mu byerekeye politiki yo mu Karere k’Ibiyaga bigari.

Opération Turquoise yari igizwe n’abasirikare 2500 b’Abafaransa, boherejwe mu Rwanda mu 1994 kugira ngo bakingire ikibaba ingabo zatsinzwe z’ubutegetsi bwa Habyarimana, kugeza zihungiye muri Zaire, nyuma yo gukora Jenoside yakorewe Abatutsi.

Icyo gihe, Abafaransa bazihaye intwaro kugira ngo zizagaruke mu Rwanda, bituma Paul Kagame yohereza ingabo muri Zaire zongera gutsinda abo bahoze mu Ngabo za Habyarimana, zicyura impunzi, zikuraho ubutegetsi bwari bubashyigikiye burangajwe imbere n’umunyagitugu, Mobutu Wazabanga. Izo ngabo zatsinzwe zitwa FDLR.

Mu ntangiriro z’iki cyumweru, Inzobere z’Umuryango w’Abibumbye ku Mutekano muri Repubulika Iharanira Demokarasi ya Congo (GoE) zatangaje raporo zishinja Ingabo z’u Rwanda (RDF) kugira uruhare mu bikorwa bya gisirikare mu Burasirazuba bwa RDC no gushyigikira umutwe wa M23. Mu kumvikanisha ibyo birego, izo nzobere zanagaragaje amazina y’abasirikare bakuru b’ingabo mu Rwanda babigizemo uruhare muri RDC.

GOE ni urwego rwashyizweho mu 2004 na Komite igena ibihano mu Kanama ka Loni gashinzwe Umutekano ku Isi, kugira ngo rukurikirane ibijyanye n’imvururu mu Burasirazuba bwa RDC. Manda yayo ivugururwa buri mwaka.

Raporo ishinja Ingabo za Congo, FARDC ko zivanze na FDLR, umutwe w’Iterabwoba uyobowe n’abagize uruhare muri Jenoside yakorewe Abatutsi n’indi mitwe yayogoje abaturage.

Raporo ya GoE igaragaza ko iyi mitwe iyobowe na FDLR, yahawe intwaro nshya, ibikoresho ndetse yishyurwa ibihumbi by’amadorali ya Amerika kugira ngo irwane na M23.

M23 ni umutwe w’abarwanyi b’Abanye-Congo bavuga Ikinyarwanda, bimwe uburenganzira ku gihugu cyabo bafatwa nk’Abatutsi bakomoka mu Rwanda.

Raporo y’izi nzobere ishinja M23 guhonyora uburenganzira bw’abaturage, harimo n’ubwicanyi yashinjwe ko yakoreye i Kishishe.

Kuva yashingwa, GoE yakunze kutumvikana na Guverinoma y’u Rwanda ndetse Umuhuzabikorwa wayo wa mbere Steve Hege yaje kwirukanwa nyuma y’uko bigaragaye ko ahengamiye kuri FDLR.

Mbere yo guhabwa inshingano nk’Umuhuzabikorwa wa GoE, Steve Hege yateye icyuhagiro FDLR ndetse agaragaza ko uburyo bwonyine bwatuma isubira mu Rwanda ni uko umuryango mpuzamahanga wakongera igitutu kuri Guverinoma y’u Rwanda, ukaruhatira kujya mu biganiro n’uyu mutwe w’abajenosideri.

Ubwo yari ahawe inshingano, yagerageje kugera ku nzozi ze binyuze mu gushinja u Rwanda ko rukorera ibyaha muri RDC.

Umuhuzabikorwa mushya w’iri tsinda ni Umunyamategeko w’Umubiligi Melanie De Groof, wize Amategeko muri Kaminuza ya Antwerp, ishuri rihembera inzangano zishingiye ku moko, rikunze kugaragara inshuro nyinshi rikora ubushakashatsi mu Rwanda buyobowe n’Umubiligi Filip Reyntjens, uhakana Jenoside yakorewe Abatutsi, uryigishamo ndetse wahoze ari Umujyanama wa Perezida Habyarimana.

Imyitwarire ya Kaminuza ya Antwerp yerekanye mu bihe bitandukanye ko isigaye yarabaye icyanzu gihembererwamo amoko mu Rwanda.

Ukuri ni uko GoE ihabwa amakuru na FDLR ndetse iri tsinda ry’inzobere ryabyiyemereye ubwaryo. Ku ipaji ya 110 mu migereka, raporo yemeza iti “Twahaye Guverinoma y’u Rwanda urutonde rw’abasirikare ba RDF bakorera muri RDC, isubiza ko abo bantu 12 bakomojweho muri raporo yacu bagaragaye mu mashusho y’icengezamatwara ya FDLR.’’

Indi gihamya yabonywe n’inzobere za Loni igaragaza ubufasha u Rwanda ruha M23 ni inyandiko ishaje y’iheshabubasha, bivugwa ko yatanzwe n’umwe mu basirikare ba RDF ayiha mugenzi we mu gihe yaba aguye ku rugamba.

“Izi nyandiko ziri hasi, zabonywe n’umutwe witwaje intwaro wari uhanganye na M23 na RDF, zasinyweho n’abasirikare ba RDF n’umuyobozi wabo, Lt. Col. Emmanuel Mugabo, ndetse zisobanura ko abasirikare ba RDF bahaye abavandimwe babo ububasha bwo kugera kuri konti zabo za banki… Umwe mu basirikare ba RDF yemereye iri tsinda ko abasirikare ba RDF rimwe na rimwe bitwaza izi nyandiko iyo boherejwe ku rugamba.’’

Aya makuru anyuranye n’ukuri ndetse hatangwa urugero kuri Pte. Barore Elyse, niba abaho, kuko telefoni ye ntibaho. Cyane ko nta sosiyete y’itumanaho mu Rwanda ifite nimero 9791088723 .

Dore urwo rwandiko: “Hagati ya Ugushyingo 2022 na Werurwe 2023, raporo yemeza ko ingabo za RDF zabonywe muri Teritwari za Rutshuru, Masisi na Nyiragongo. Ingabo z’u Rwanda rimwe na rimwe zibana n’abarwanyi ba M23.”

Ibi babimenye bate? Raporo igaragaza ko “ibi byemejwe n’agatabo kabonywe n’inzobere za Loni muri Mushaki, umujyi uri mu maboko y’inyeshyamba. Iyo nyandiko igaragaza amazina n’amapeti y’abasirikare b’Abanyarwanda boherejwe muri misiyo muri aka gace.’

Mu bigaragara, Inzobere za Loni zageze kuri ako gatabo gafite umutwe ugira uti “Urutonde rw’abasirikare b’Abanyarwanda boherejwe muri RDC.’’

Birasa n’aho ako gatabo kakozwe hagamijwe ko GoE izakifashisha mu kuyobya uburari. Nk’umuntu wabanye n’abasirikare mbere, ndabizi neza ko nta gisirikare, yewe n’inyeshyamba zitunga intonde nk’izo. Ibi ni bimwe mu bihamya bidashinga biri muri raporo yose ya Loni, abarwanyi ba FDLR bahaye inzobere ngo zitangaze, bizera ko ntawe uzabyitaho.

Ahandi muri raporo, harimo ko ibikorwa bya gisirikare u Rwanda rushyigikiramo abarwanyi M23 bigenzurwa ndetse bikayoborwa n’Umujyanama wa Perezida Kagame mu by’Umutekano, Gen James Kabarebe.

Kwemeza ibi ni ukubura amakuru ahagije ku mikorere y’Igisirikare cy’u Rwanda ndetse n’imiyoborere y’u Rwanda muri rusange. Afande Kabarebe ntari ku rwego rwo kuyobora ibikorwa biteye kuriya. Mu gihe kuvuga izina rye bishobora kumvikana nk’ibikurura benshi, umujenerali wabaye Umugaba Mukuru w’Ingabo na Minisitiri w’Ingabo ntashobora gutanga amabwiriza ku gice cy’ingabo za RDF ku rugamba.

Igihe cye kinini akimara mu bigo ya gisirikare yigisha abasirikare bato indangagaciro z’Ingabo z’u Rwanda nk’uko abakuru mu Rwanda bahanura abato.

Izi nzobere za Loni zikwiye kugirwa inama yo kutifuza ko Afande Kabarebe abyinjiramo kuko igihe yayoboye ingabo muri Zaïre, yageze i Kinshasa mu mezi make, akuraho umunyagitugu Mobutu, ashyiraho undi muyobozi, aba Umugabo Mukuru w’Ingabo. Yashyizeho Joseph Kabila, umwe mu bari bashinzwe umutekano kugira ngo asimbure se nka Perezida w’igihugu kigari kandi gikungahaye. Icyo gihe yari jenerali ufite inyenyeri ebyiri, uyu munsi afite enye…

Mu 2008, umucamanza wo muri Espagne, mu gisa n’urutonde rwakuwe kuri internet, yasohoye impapuro zisaba itabwa muri yombi ku basirikare bakuru 40 bari mu buyobozi bwa RDF.

Nta gihamya ifatika yubakiyeho, uyu Munya-Espagne yashyizeho impapuro zo guta muri yombi aba Banyafurika byihuse, abashinja ibyaha bikomeye ariko ntacyo yakurikiranye mu Ukwakira 2015 ubwo Umuyobozi w’Urwego rw’Ubutasi rw’u Rwanda yatabwaga muri yombi ari mu Bwongereza mu ishyirwa mu bikorwa ry’izo mpapuro.

Lieutenant General Karenzi Karake yararekuwe ndetse Urukiko rw’Ikirenga rwa Espagne rutesha agaciro ubusabe bw’Umucamanza Fernando Andreu Merelles.

Icyo gihe, ba Jenerali barimo James Kabarebe, Jean Bosco Kazura, Frank Mugambage na Rugumyangabo Gacinya, bose bari ku rutonde rwakozwe n’uwo Munya-Espagne. Bisa nk’aho Inzobere za Loni zongeye kurutangaza nyuma y’imyaka 16.

Ni iyihe mpamvu yatuma Inzobere za Loni zishinja u Rwanda kwivanga mu Burasirazuba bwa RDC? Reka mbisobanure, Abanye-Congo bavuga Ikinyarwanda ntibajya batsindwa mu buryo bwa gisirikare, wenda byashoboka mu bijyanye na dipolomasi.

Iyo batangiye urugamba rugamije guharanira ko bemerwa byuzuye nk’abaturage ba RDC no gusubiza mu byabo bagenzi babo bagera ku 300.000 bahunze, bashinjwa gukora ibyaha, abayobozi babo bugashyirirwaho na ICC impapuro zisaba ko batabwa muri yombi, bagashyirirwaho ibihano n’ibihugu byose, ari byo bituma ikibazo cy’Abatutsi b’Abanye-Congo bari mu nkambi zitandukanye mu Karere gikomeza kuburirwa igisubizo imyaka myinshi.

Ibi biragenda bikageza igihe bongereye kwisuganya, nyuma y’imyaka 10 cyangwa irenga, bagatangira urugamba rushya, ibirego bishya bigakurikira, gutyo gutyo. Ni uku byahoze mu binyacumi bitatu bishize.

Abanyapolitiki bo muri RDC nta nyungu bafite mu gukemura ikibazo cy’Abanyamulenge n’Abanye-Congo bavuga Ikinyarwanda, baba abari imbere mu gihugu no hanze yacyo kuko Inzobere za Loni zibarwanira intambara ya dipolomasi zishinja u Rwanda mu gihe Ingabo za Loni, MONUSCO, inyeshyamba n’abacanshuro b’ubwoko bwose bahora mu ntambara.

Mu mezi ashize, njye na bagenzi banjye twagiye mu Burasirazuba bwa Congo mu gace karimo intambara, tujyanywe no gukora iperereza ku bwicanyi bwakorewe i Kishishe, aho Itsinda rya Loni rishinja M23 ko yakoreye ibyaha.

Icyo gihe, imibare y’abagezweho ingaruka n’ubwo bwicanyi yari iri kugabagabanwa hagati ya Loni, imiryango itegamiye kuri leta na Guverinoma ya RDC, aho nta ruhande na rumwe muri izo rwari rwarigeze rukora iperereza ahabereye ubwo bwicanyi: Bamwe bakavuga 150 bishwe, 200, 300, imva rusange n’abafashwe bugwate bakagirwa imbohe zikoreshwa imibonano mpuzabitsina.

Icyo gihe Guverinoma ya Congo yanatangaje icyunamo cy’iminsi itatu mu gihugu hose, ambasade zo mu bihugu byo mu Burengerazuba bw’Isi zohereza ubutumwa bwo kwihanganisha ndetse n’Intumwa ya Loni muri RDC itanga ikiganiro mu Kanama k’Umutekano k’Umuryango w’Abibumbye, anasaba ibihano.

Icyadutangaje ni uko twageze i Kishishe dusanga abaturage bakomeje ubuzima bwabo nk’ibisanzwe. Imirwano y’igihe gito yabaye hagati ya M23 n’Ihuriro rya FARDC, Mai-Mai na FDLR yaguyemo abarwanyi 13 n’abasivile umunani.

Nta mva rusange cyangwa ubwicanyi bwo guca abantu imitwe bwabaye, abaturage bo muri Kishishe bari bakomeje ibikorwa byabo.

Muri raporo, inzobere za Loni zatanze umuburo ko M23 ifite ibirindiro i Rutshuru, yitegura kwihuza na “Twirwaneho”, umutwe w’Abanyamulenge ubarizwa muri Kivu y’Amajyepfo.

Igikorwa cyari cyatangiye gisa nka gahunda mpuzamahanga yo gusaba ibihano no gushyiraho impapuro zisaba itabwa muri yombi, cyapfuye urw’ikirago, ariko nta n’umwe haba Guverinoma ya RDC, imiryango itegamiye kuri leta cyangwa Loni, wigeze agira umuhate wo gukuraho iki kinyoma.

Ikindi, Raporo y’Impuguke za Loni ivuga ko M23 ibarizwa i Rutchuru iri hafi kwihuza na Twirwaneho, umutwe w’Abanyamulenge ubarizwa muri Haut Plateaux muri Kivu y’Epfo.

Byonyine, intera itandukanya ibirindiro by’iyi mitwe yombi ntishobora gutuma yihuza. Mu gihe intera irenga ibilometero 482, kuzamuka imisozi no kumanuka ibibaya byo bishobora gutuma ukoresheje umuhanda agenda ibilometero 1000, urwo ni urugendo rwo kuva i Kigali ugana i Nairobi, mu gihe hagati aho harimo ubwoko bwinshi bw’abandi baturage.

Abazi Minembwe, kuri gakondo y’Abanyamulenge aho Twirwaneho ifite ibirindiro, kuzamuka umusozi wa Rusizi muri Uvira ukagera muri Haut Plateaux ni urugendo rw’icyumweru kimwe n’amaguru. Hanyuma ni ukubera iki abantu bakabya?

Buri mwaka ingabo ziri mu butumwa bw’Umuryango w’Abibumbye bwo kugarura Amahoro muri RDC, MONUSCO, ziba zigomba kongererwa manda. Iyo iki gihe cyegereje, inzobere z’Umuryango w’Abibumbye zihutira gusohora raporo ihuruza inzego z’ubutegetsi n’abavuga rikijyana muri RDC ngo batangaze ko u Rwanda rugiye gutera igihugu cyabo kugira ngo manda ya Monusco MONUSCO.

Hari umugani w’umurwaza ukomeza kuvuga ko umurwayi arembye kugira ngo akomeze yirire ingemu, cyangwa yungukire ku murwayi. Umurwayi ntiyivugira, ahubwo abo mu muryango we n’inshuti ze bavugisha umurwaza agasaba ibyo umurwayi akeneye. “Umurwayi yansabye ko mbamenyeshe ko akeneye umuvinyo n’inyama z’umwijima (Foie gras) kandi ko ejo yumva azaba ashaka lobsters [inyama ihenze y’ikinyamujonjorerwa]”.

Itsinda ry’Inzobere za Loni muri iki kibazo ni abarwaza na ho umurwayi ni Repubulika Iharanira Demokarasi ya Congo.

Kugira ngo umuntu asobanukirwe neza izingiro ry’ibibazo bya RDC byasaba kubanza no kumenya byinshi ku Mujyi wa Goma, uri mu Burasirazuba bw’iki gihugu kibarurwamo umutungo kamere udasangwa ahandi mu Isi, ndetse ni ho hantu hakorerwa cyane ubucuruzi bwa magendu.

Kugira ngo ubashe kumva ibibazo byo mu Burasirazuba bwa Congo, bisaba kumva neza manda ya Monusco, no kumva neza aho Umujyi wa Goma uhagaze ku rwego mpuzamahanga.

Goma irimo ibyicaro by’imiryango mpuzamahanga yose ikorera muri RDC, ni icyicaro cy’ubucuruzi bw’amabuye y’agaciro, abanyereza imitungo, amabandi yo ku rwego mpuzamahanga kandi ingabo za Monusco ni zo zibacungira umutekano muri ibyo bikorwa. Monusco ntiri muri RDC ku nyungu z’abaturage ba Congo.

Muri make uko ibintu bihagaze, ubutaka bunini bwa Congo ntabwo bwigeze buremerwa kuba igihugu cy’abaturage babwo beza -Abanye-Congo. Cyashyizwe ku ruhande kugira ngo kibe ububiko aho ibihugu bikomeye mu by’inganda bizajya biza gukura amabuye y’agaciro.

Igisasu kirimbuzi cyatewe i Nagasaki na Hiroshima mu ntambara ya Kabiri y’Isi yose, cyakozwe muri Uranium yakuwe Shinkolobwe mu Ntara ya Haut-Katanga.

Imvururu na guverinoma idafite ingufu bigomba gusigasirwa, abanyapolitiki bamunzwe na ruswa bagomba kugumaho kugira ngo ibihugu byo mu Burengerazuba bw’Isi bikomeze bikungahare.

Goma ni umurwa mukuru w’amabuye y’agaciro yo ku Isi, umujyi w’ingenzi cyane nka Paris, New York cyangwa se Genève, ndetse ifite agaciro gakomeye kurusha Kinshasa, Umurwa Mukuru wa RDC.

Iterambere ry’u Rwanda rifatwa nk’ikibazo, ku buryo rishobora gutuma abaturage b’Abanye-Congo batangira kubaza ibibazo. Mu kubyirinda, hahimbwe imvugo igaragaza u Rwanda nk’inkomoko y’ikibi cyose muri Congo.

Ibitangazamakuru byo mu burengerazuba bw’isi bihora bibibutsa ngo “Ibyo mubona byose mu Rwanda ni ibyanyu.”

Igitangaje, abanyamahanga bikundira i Goma kurusha nka Lubumbashi, kuko ari ho byoroshye kugera kandi haturanye n’u Rwanda, bikabaha uburyo bworoshye bw’indege (RwandAir), imihanda myiza n’amarembo aborohereza guhunga iruka ry’ibirunga, umutekano muke n’ibindi.

Kuri paji ya 17 ya raporo ishinja Maj Gen Franck Mugambage wanabaye Ambasaderi w’u Rwanda muri Uganda ubu akaba ari Umugaba w’Inkeragutabara, ko ayoboye ibikorwa muri RDC. Nyamara uyu mujenerali ari mu kiruhuko cy’uburwayi, mu gihe Brigadier Rugumyangabo Gacinya we yagiye mu kiruhuko ajya kwikorera mu bworozi mu cyaro, kuva mu 2018.

Muri rusange, iyi raporo yanditse mu buryo itera icyuhagiro umutwe w’iterabwoba wa FDLR, ikawugaragaza nk’aho uharanira uburenganzira bwawo, igashumuriza abaturage ba RDC umutwe wa M23 n’u Rwanda.

Hari aho igira iti “Ibitero bishya bigambiriwe bya M23 ku basivili byarubuye, hagabwa ibitero byaguyemo abantu byibasiye abaturage bakorana cyangwa bakekwaho gufasha FDLR n’indi mitwe yitwaje intwaro. Ibikorwa birimo gufata ku ngufu, no kubikora mu kivunge bigizwemo uruhare n’abarwanyi ba M23, byaragaragaye cyane. Imitwe yitwaje intwaro yo mu gihugu na FDLR baremye ihuriro bise “Congolese Patriotic Resistants”, ryarwanyije M23 rifatanyije na FARDC. Ibyo bikorwa byahuzwaga n’abasirikare bakuru muri FARDC, bafasha iyo mitwe mu bikoresho, intwaro n’ibijyanye n’amikoro.”

Ntabwo umuntu yashinja umutwe gufata ku ngufu no guterwa inkunga n’u Rwanda icyarimwe. Icya mbere ni uko mu myaka ine ya mbere y’urugamba rwo kubohora u Rwanda ndetse n’amezi make y’urugamba rwo muri Zaire mu myaka ya 1990, ingabo za RPF zari ziyobowe na Paul Kagame ntizigeze zishinjwa gufata ku ngufu, habe na rimwe.

M23 iyobowe n’abahoze mu ngabo za RPF na yo yaba ifite imyumvire n’imyitozo imeze ityo, kuko ni ko imitwe ifashwa na za Leta ikora!

Icya kabiri, Ingabo z’u Rwanda ziri mu butumwa bw’amahoro muri Centrafrique zitaje abacanshuro b’umutwe wa Wagner, nyuma y’uko bashinjwe ibirego byo gufata ku ngufu.

Ibindi biteye inkeke muri raporo ni uko abayanditse basa n’abashaka guha ishingiro itotezwa rikorerwa Abatutsi bo muri RDC. Ku bwabo “M23 yitwaje imvugo ya Jenoside”, wabyaye umwuka w’icyoba, imvugo zibiba urwango n’ibikorwa by’urugomo birimo ubwicanyi bukorerwa imiryango bwibasira abadashyigikiye M23”...

Bakomeza ngo “gukoresha imvugo ya Jenoside bigizwemo uruhare na M23 ndetse n’ubuyobozi bw’u Rwanda byatumye abasivili bibasirwa cyane, ndetse bishobora kuba imbarutso y’isubiranamo ry’amoko.”

Muri make, nta muntu ugomba kugaragaza cyangwa kwamagana ubwicanyi bukomeje gukorerwa Abatutsi bo muri Congo, cyangwa ngo asabe ko impunzi zatataniye mu bihugu byo mu karere zatahuka kuko ari “ukwitwaza Jenoside” kandi biri “kumwikanisha uburakari bw’abanye-Congo.”

Ibi si bishya kuri twe Abanyarwanda, nta rujijo rwatejwe na Melanie De Groof wo muri Kaminuza ya Antwerp, wavuze ko “Jenoside mu Rwanda yatewe n’uburakari abaturage batewe n’uko RPF yateye u Rwanda, kuko mbere ya 1990 igihugu cyari gifite amahoro”, ndetse umujyanama we Filip Reyntjens yakomeje kubivuga guhera mu 1994.

Mu gitabo cyitwa “Court of Remorse, Inside the International Criminal Tribunal for Rwanda” umwanditsi Thierry Cruvellier asobanura ko “ubwo ICTR yashyirwagaho, umunyamategeko w’Umufulama witwa Luc de Temmerman mugenzi wa Reyntjens wari umujyanama mu by’amategeko wa Perezida Habyarimana Juvenal, yari mu ba avoka ba mbere baburaniye abajenosideri muri ICTR i Arusha, by’umwihariko Nderubumwe Rutaganda wari umuyobozi wungirije w’Interahamwe, wakatiwe igifungo cya burundu nyuma yo guhamwa n’ibyaha bya Jenoside yakorewe Abatutsi.

Luc yahawe ikiraka n’abajenosideri cyo gushaka abavoka mu bihugu bivuga Igifaransa, abahuriza i Nairobi.

Yarababwiye ati “mugiye guhabwa akazi ko kuburanira abantu baregwa gukora Jenoside. Akazi kanyu si ukuburanira abo bantu ku byaha bakoze, ahubwo ni uguhagarara ku ngengabitekerezo ya Parmehutu. Mugomba gukoresha ubushobozi bwose mufite mu guhakana ko Jenoside yakorewe Abatutsi yabayeho. Mugomba kandi kubikora igihe muri mu Rukiko cyangwa hanze yarwo.”

Abenshi mu bavoka bari muri izo manza na n’ubu baracyafite iyo myumvire, nk’uko bisobanurwa nyuma na Andrew Wallis mu gitabo cye cyitwa “Stepp’d into Blood”.

Mu kiganiro yagiranye na Radio y’Abadage, Deutsche Welle, nyuma y’umunsi umwe abarwanyi b’imitwe ya CODECO na ADF-Nalu ikorera muri Beni na Ituri bagabye igitero muri Uganda bakica abantu 42 mu kigo cy’amashuri, Umuvugizi w’Ingabo za Uganda yashinje ingabo za Congo FARDC ubufatanyacyaha muri icyo gitero: Yasobanuye ko igihe cyose UPDF irwanye n’iyi mitwe ifatamo n’abasirikare ba FARDC. Yahise arahira ko UPDF Idashobora gukomeza gukorana n’igisirikare gifatanya n’inyeshyamba ziza kwica abaturage ba Uganda. Mu myaka yashize FDLR yavogereye umupaka w’u Rwanda itwicira abaturage.

Ibyo byose babizi neza, ntibisaba ubwenge bwinshi kumva ko guverinoma iyo ari yo yose izirikana inshingano zayo, ituranye n’ahantu hari umutekano muke kandi hari icyuho cy’imiyoborere, huzuye imitwe yitwaje intwaro, irimo n’umwe wiyemeje kwica abaturage bayo, ifite inshingano, ikoresheje uburyo mpuzamahanga, zo kurinda umutekano w’abaturage, by’umwihariko mu gihe iyo mitwe yitwaje intwaro ifashwa byeruye n’ingabo za Leta.

Umwanzuro y’Akanama ka Loni gashinzwe Umutekano [uheruka ni 2641 (2022)] usobanura inshingano z’Inzobere za Loni, usaba mu buryo bwumvikana guverinoma ya RDC kubaha ubusugire bw’ibihugu bituranyi, ikabivuga muri aya magambo.

“Mu gushimangira ubusugire, ubwigenge, ubumwe n’ubusugire bw’ubutaka bwa RDC, kimwe n’ubw’ibihugu byose byo mu karere, no gushimangira ko hakenewe kubaha amahame yo kutavogerana, guturana mu mahoro n’ubufatanye bw’ibihugu bigize akarere.”

Nyamara raporo z’Itsinda ry’inzobere za Loni zifatwa n’abayobozi ba RDC nk’ibikombe begukanye, Minisitiri wa RDC ushinzwe itangazamakuru akagirana ikiganiro n’abanyamakuru ari kumwe n’abahagarariye Loni, bagasubiramo amatangazo y’ibihugu bikomeye ku Isi aharabika u Rwanda.

Nyamara uko ni ko Abahema batuye muri Ituri na Kivu y’Amajyaruguru bari kwicwa umunsi ku wunsi n’abarwanyi bafashwa n’ingabo za RDC, bazizwa ko basa n’Abatutsi, ntacyo bibabwiye. Uko kubura umutimanama guteye amakenga.

Mu ndorerwamo y’amategeko mpuzamahanga, raporo zerekana ko ingabo za FARDC zifatanya n’umutwe w’iterabwoba wa FDLR iri ku rutonde mpuzamahanga rw’imitwe y’iterabwoba, nyuma y’uko Perezida Felix Tshisekedi atangarije mu ruhame ko ashaka guhirika ubuyobozi bw’u Rwanda, Guverinoma y’u Rwanda ifite uburenganzira bwose bwo gukora ibyo ishoboye ubwo bufatanye ntibugere ku ntego.

Bitarangaje kuba nubwo hari inzira y’ibiganiro bya Nairobi na Luanda bigamije kugarura amahoro arambye mu Burasirazuba bwa RDC, Guverinoma ya Congo itarigeze yubahiriza n’umurongo n’umwe mu byo yiyemeje, ahubwo ikodesha abacanshuro b’i Burayi itumira ingabo z’amahanga ndetse yifatanya n’imitwe yitwaje intwaro irimo n’abajenosideri ngo bose babafashe kwiyicira abaturage kandi ibyo byose bikorwa Loni irebera

Muri raporo yacu ya Kishishe, dusobanura ko atari ubwa mbere hahimbwe inkuru z’ubwicanyi mu Burasirazuba bwa RDC bigatangazwa n’ibitanyamakuru bikomeye ndetse n’abantu bazwi, ariko bigahinyuzwa nyuma y’iperereza aho byabereye.

Nyamara iyo ukuri kugaragaye, nta mbaraga zishyirwamo ngo kumenyekane nk’izikoreshwa mu gusakaza ikinyoma.

Mu cyiswe ‘Ubwicanyi bwa Kipupu’ muri Kivu y’Amajyepfo “imibare y’abantu 220 babuguyemo yahise itangazwa n’abagize inteko ishinga amategeko y’Intara, bikwirakwizwa mu binyamakuru mpuzamahanga. Kuri iyo nshuro, Denis Mukwege unafite igihembo cy’amahoro cyitiriwe Nobel yaravuze ati “ni abantu bamwe bakomeje kutwica” [ashaka kuvuga Abanye-Congo b’Abatutsi].

Umubare w’abaguye muri ubwo bwicanyi waje kumanuka bigaragara ko bari 15, nyuma y’uko MONUSCO na Guverinoma ya RDC basuye agace ubu bwicanyi bwabereyemo ku wa 29 Nyakanga 2020. Nasobanuye ako kumiro burambuye iby’aya mu nkuru yabanje, kandi Mukwege ntiyigeze ahindura ibyo yatangaje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .